نکہت زرین نے اپنی شاندار کارکردگی کو جاری رکھتے ہوئے منگل کو خواتین کے ۵۱؍ کلوگرام زمرے کے پری کوارٹر فائنل میں جاپان کی یوما نشیناکا کو۰۔۵؍ سے شکست دے کر آخری ۸؍میں جگہ بنالی۔

 دو بار کی عالمی چمپئن  نکہت زرین نے لیور پول میں جاری ورلڈ باکسنگ چمپئن شپ میں اپنی شاندار کارکردگی کو جاری رکھتے ہوئے منگل کو خواتین کے ۵۱؍ کلوگرام زمرے کے پری کوارٹر فائنل میں جاپان کی یوما نشیناکا کو۰۔۵؍ سے شکست دے کر آخری ۸؍میں جگہ بنالی۔۲۹؍ سالہ نکہت کو ابتدائی راؤنڈ میں جاپانی باکسر سے سخت مقابلہ ملا، لیکن اس ہندوستانی باکسر کو کوئی نہیں روک سکا، جو اس سال اپنا پہلا بین الاقوامی ٹورنامنٹ کھیل رہی ہیں۔ درحقیقت، جاپانی باکسر کو نکہت کی لَے توڑنے کی کوشش میں ضرورت سے زیادہ کلینچنگ کرنے پر دو پنالٹی  پوائنٹس بھی ملے۔ ورلڈ باکسنگ کپ آستانہ کی طلائی تمغہ جیتنے والی جیسمین لیمبوریا نے خواتین کے۵۷؍ کلوگرام زمرے  میں دو بار کی اولمپین برازیل کی جوسیلین سرکیرا رومیو کو شکست دے کر کوارٹر فائنل میں جگہ بنا لی ہے۔

یہ بھی پڑھیئے:تیونس نے فیفا ورلڈ کپ۲۰۲۶ء کے لیے کوالیفائی

جیسمین اور رومیو اس سے قبل آستانہ میں گولڈ میڈل کے لیے مدمقابل آئی تھیں  جہاں  ہندوستانی باکسر ایک قریبی مقابلے کے بعد فاتح بنیں لیکن لیورپول میں جیسمین نے تینوں راؤنڈز میں۰۔۵؍ کا اسکور کیا اور اب وہ عالمی  چمپئن  شپ میں تمغہ جیتنے سے صرف ایک جیت دور ہیں۔ہندوستان نے حال ہی میں تشکیل دی گئی باکسنگ کی بین الاقوامی گورننگ باڈی ورلڈ باکسنگ کے زیراہتمام منعقد ہونے والی اس پہلی عالمی چمپئن شپ میں۲۰؍ رکنی دستے کو میدان میں اتارا ہے۔  مردوں اور خواتین دونوں مقابلوں میں اچھی کارکردگی کا مظاہرہ کرنے کی امید ہے۔
ورلڈ باکسنگ کپ کے سلور میڈلسٹ ابھیناش جام وال نے بھی مردوں کے۶۵؍ کلوگرام زمرے کے دوسرے راؤنڈ میں میکسیکو کے ہیوگو بیرن کو۰۔۵؍ سے شکست دے کر اپنی مہم جاری رکھی تاہم، خواتین کے۵۴؍ کلوگرام زمرے میں ساکشی کا سفر یہاں ختم ہوا کیونکہ وہ راؤنڈ آف۱۶؍ میں ترکی کی ہیتیس عقبہ سے۰۔۵؍ سے ہار گئیں۔لیورپول میں سناماچا چانو کی مہم بھی قزاخستان کی نتالیہ بوگڈانووا سے۰۔۵؍ سے ہار کر ختم ہوئی۔سچن (مردوں کے۶۰؍ کلوگرام) کو قزاخستان کے بیبرس جیکسن سے۱۔۴؍ سے شکست ہوئی جبکہ نیرج پھوگاٹ کو خواتین کے۶۵؍ کلوگرام زمرے میں انگلینڈ کی مقامی امید سچا ہکی سے۲۔۳؍ سے ہار کا سامنا کرنا پڑا۔