ہندوستان کے نوجوان اوپننگ بلے باز یشسوی جیسوال کو منگل کو انگلینڈ کے خلاف ٹیسٹ سیریز میں شاندار کارکردگی کے بعد فروری کیلئے آئی سی سی کے `پلیئر آف دی منتھ ایوارڈ کیلئے منتخب کیا گیا

ہندوستان کے نوجوان اوپننگ بلے باز یشسوی جیسوال کو منگل کو انگلینڈ کے خلاف ٹیسٹ سیریز میں شاندار کارکردگی کے بعد فروری کیلئے  آئی سی سی کے `پلیئر آف دی منتھ ایوارڈ کیلئے  منتخب کیا گیا۔۲۲؍ سالہ بائیں ہاتھ کے بلے باز نے انگلینڈ کے خلاف ۵؍ میچوں کی اس سیریز میں۷۱۲؍ رن بنائے جو کہ انگلینڈ کے خلاف ٹیسٹ سیریز میں کسی ہندوستانی بلے باز کا سب سے بڑا اسکور ہے۔ اس دوران انہوں نے ۲؍ ڈبل سنچریاں اور ۳؍ نصف سنچریاں بنا کر ہندوستان کو۱۔۴؍ سے جیتنے میں اہم کردار ادا کیا۔
انہوں نے راجکوٹ میں اپنی ڈبل سنچری کے دوران۱۲؍ چھکے لگا کر ٹیسٹ اننگز میں سب سے زیادہ چھکوں کا ریکارڈ برابر کیا۔ جیسو ال نے آئی سی سی پلیئر آف دی منتھ ایوارڈ ملنے کے بعد کہاکہ ’’ `میں آئی سی سی کا ایوارڈ حاصل کر کے خوش ہوں اور مجھے امید ہے کہ مجھے مستقبل میں مزید ایوارڈس ملیں گے۔  انہوں نے کہاکہ  `یہ میرے اور میری پہلی ۵؍ میچوں کی سیریز کیلئے  بہترین تھی۔  میں نے اچھی  بلے بازی کی اور  ہم سیریز۱۔۴؍ سے جیتنے میں کامیاب رہے۔ یہ میرے لئے  اپنے تمام ساتھیوں کے ساتھ ایک ناقابل یقین تجربہ رہا ہے۔
وشاکھاپٹنم میں۲۱۹؍ رن کی اننگز کھیلنے کے بعد انہوں نے راجکوٹ میں ناٹ آؤٹ ۲۱۴؍رن  بنائے۔ ۲۲؍ سال اور۴۹؍ دن کی عمر میں  وہ ڈان بریڈمین اور ونود کامبلی کے بعد مسلسل ۲؍ ڈبل سنچریاں بنانے والے دنیا کے تیسرے کم عمر کھلاڑی بن گئے۔ انہوں نے فروری میں ۳؍ ٹیسٹ میچوں میں۱۱۲؍ کے  اوسط سے۵۶۰؍ رن بنائے جس میں ۲۰؍ چھکے شامل تھے۔ جیسوال نے نیوزی لینڈ کے لیجنڈ کین ولیمسن اور سری لنکا کے اوپنر پاتھم نسانکا کو  پیچھے کرکے یہ اعزاز حاصل کیا۔