طلبہ کے تعلیمی سفر میں یہ ’’۵؍ ایپس‘‘ یقیناً مددگار ثابت ہوں گے

Updated: June 19, 2020, 4:28 PM IST | Taleemi Inquilab Desk | Mumbai

ٹیکنالوجی کے دور میں اب معلومات حاصل کرنا مشکل نہیں رہ گیا ہے۔ پہلے معلومات حاصل کرنے کیلئے لوگ کتب خانوں کا رخ کرتے تھے اور مختلف کتابیں پڑھتے تھے مگر اب معلومات حاصل کرنے کیلئے محض ایک اسمارٹ فون چاہئے اور انٹرنیٹ کا کنکشن۔ آپ نے گوگل سے سوال پوچھا اور اس نے آپ کو جواب کے علاوہ مزید کئی آپشنز بھی دے دیئے۔ ایک طالب علم اپنی معلومات میں اضافہ کرنے کیلئے ہمیشہ کوشاں رہتا ہے۔ اسلئے وہ انٹرنیٹ پر تعلیمی مشمولات تلاش کرتا ہے اور انہیں ذہن نشین کرنے کی کوشش کرتا ہے۔ اسمارٹ فون اور ایپس کی آمد نے ان چیزوں کو مزید آسان بنادیا ہے۔ طلبہ نصابی تعلیم حاصل کرنے کے علاوہ فون میں چند ایپس ڈاؤن لوڈ کرکے ان سے بھی استفادہ کرسکتے ہیں ۔ ہوم ورک سے لے کر پروجیکٹس اور جنرل نالج کوئز کی تیاری تک طلبہ مختلف ایپس کا فائدہ اٹھا سکتے ہیں ۔ یوں تو پلے اسٹور اور ایپ اسٹور پر آپ کو بے شمار تعلیمی ایپس مل جائیں گے۔ تاہم، آج جانئے ۵؍ مددگار ایپس کے بارے میں۔

For Representation Purpose Only. Photo INN

علامتی تصویر۔ تصویر: آئی این این

فوٹو میتھ
ریاضی ایک ایسا مضمون ہے جس کا نام سن کر تقریباً ہر طالب علم گھبرا جاتا ہے۔ اسے آسان بنانے کیلئے بہت سے ایپس بنائے گئےہیں تاکہ طلبہ کو سہولت ہو اور وہ اس مضمون سے خوفزدہ نہ ہوں بلکہ اس کی تیاری دیگر تمام مضامین ہی کی طرح کریں اور امتحانات میں اچھے سے اچھے نمبروں سے کامیاب ہونے کی کوشش کریں ۔ یوں تو پلے اسٹور (اینڈرائڈ) اور ایپ اسٹور (آئی او ایس) پر بہت سے ایسے ایپس دستیاب ہیں جن کی مدد سے طلبہ ریاضی کے پیچیدہ سوالات نہ صرف حل کرسکتے ہیں بلکہ انہیں سمجھ بھی سکتے ہیں ۔ تاہم، ان میں سب سے منفرد ایپ ’’فوٹو میتھ‘‘ ہے۔ متعدد ریاضی دانوں نے اس ایپ کو بہترین قرار دیا ہے۔ اس میں طالب علم کو ریاضی کا سوال لکھ کر یا پرنٹ کرکےاس کی تصویر ’’فوٹو میتھ‘‘ ایپ پر کھینچیں ، پھر یہ ایپ نہ صرف آپ کو وہ سوال سمجھائے گا بلکہ ’اسٹیپ بائے اسٹیپ‘ اسے حل کرنے کا طریقہ بھی بتائے گا۔ اسے استعمال کرنے کیلئے اسمارٹ فون کا انٹرنیٹ سے کنکٹ ہونا ضروری نہیں ہے۔
سائنس تھری سکسٹی
سائنس بیشتر طلبہ کا پسندیدہ مضمون ہوتا ہے۔ ڈاکٹر اور انجینئر بننے والے طلبہ کو اس مضمون میں خاصی دلچسپی ہوتی ہے۔ متعدد طلبہ ایسے بھی ہوتے ہیں جو سائنسداں بننا چاہتےہیں ، ایسے میں انہیں چاہئے کہ وہ اسکول میں سائنس پڑھنے کے علاوہ کچھ وقت اپنے طور پر بھی سائنس کی معلومات حاصل کرنے کیلئے مخصوص کریں ۔ سائنس ۳۶۰؍ ایک ایسا ایپ ہے جو طلبہ کو ذہن میں رکھتے ہوئے نہایت ہی دلچسپ انداز میں ڈیزائن کیا گیا ہے۔یہ ایپ سائنس ۳۶۰؍ نالج نیٹ ورک اور نیشنل سائنس فاؤنڈیشن کے اشتراک سے بنایا گیا ہے۔ اس ایپ سے اسکول کے ساتھ کالج اور یونیورسٹی کے طلبہ بھی فائدہ اٹھا سکتے ہیں ۔ یہ ایپ بہت سادہ ہے۔ ایک چھوٹی جماعت کا طالب علم بھی اسے آسانی سے آپریٹ کرسکتا ہے۔ اس میں سائنس کی مناسبت سےتمام تصاویر، گرافکس اور ویڈیوز ہیں جو کافی ہائی کوالیٹی کی ہیں ۔ کسی بھی تصویر پر کلک کرنے پر اس کی تفصیلات واضح ہوجاتی ہے۔
یوڈی می
ماہرین تعلیم کا کہنا ہے کہ یوڈی می طلبہ کیلئے ایک بہت ہی کارآمد ایپ ہے۔ اس ایپ پر مختلف مضامین، سائنس سے لے کر بزنس اور ڈرائنگ سے لے کر پرسنل ڈیولپمنٹ کے ڈیڑھ لاکھ سے زائد ٹیوٹوریلس اور ویڈیوز موجود ہیں جنہیں ماہرین نے تیار کیا ہے۔ اس ایپ کی مدد سے آپ اپنی صحت کا بھی خیال رکھ سکتے ہیں اور اپنے پسندیدہ مضمون کے بارے میں زیادہ سے زیادہ معلومات حاصل کرسکتے ہیں ۔ اس دوران اگر آپ کو کوئی چیز سمجھ میں نہیں آتی یا کوئی کانسپٹ مشکل محسوس ہوتا ہے تو آپ ایپ پر موجود انسٹرکٹر یا دیگر طلبہ کی مدد لے سکتے ہیں ۔ علاوہ ازیں ، اگر آپ کے پاس ایک نیا اور بہتر ایپ بنانے کا آئیڈیا ہے تو یوڈی می کے ماہرین اسے بنانے کیلئے آپ کو ہاتھوں ہاتھ لیں گے۔ اس ایپ کی خاص بات یہ ہے کہ یہاں آپ کو ۲۴؍ گھنٹے کوئی ایکسپرٹ ملے گا جو آپ کی مدد کرے گا۔ اس ایپ پر آپ مباحثہ بھی کرسکتے ہیں ۔ اگر آپ کو سروے کرنا ہے تو آپ کو اس ایپ پر یہ سہولت بھی ملے گی۔
مائے ہوم ورک اسٹوڈنٹ پلانر
یہ ایپ، اینڈرائڈ اور آئی او ایس دونوں پلیٹ فارمز پر دستیاب ہے۔ اس لئے آئی فون اور اینڈرائڈ کے فونز استعمال کرنے والے طلبہ اس سے بآسانی فائدہ اٹھا سکتے ہیں ۔اس ایپ پر اپنا ذاتی ٹائم ٹیبل بناکر اس کی مدد سے پڑھائی کرسکتے ہیں ۔ اس سے آپ کو معلوم ہوگا کہ آپ کو ہوم ورک کب کرنا ہے، کون سے مضمون کا ہوم ورک کرنا ہے، آپ کا کون سا ٹیسٹ ہونے والا یا کون سا پروجیکٹ آپ کو مکمل کرنا ہے۔ یہ تمام معلومات آپ کو اس ایپ میں صرف ایک مرتبہ فیڈ کرنی ہوں گی اس کے بعد وہ مقررہ وقت پر آپ کو یاد دلادے گا کہ آپ کو کب کیا کرنا ہے۔ اس کی مدد سے طلبہ اپنے کاموں کو آرگنائز کرسکتے ہیں ۔ اس طرح انہیں کوئی بھی چیز یاد رکھنےکی ضرورت نہیں پڑے گی اور اگر وہ کوئی چیز بھول جائیں گے تو انہیں اس ایپ کے ذریعے یاد آجائے گا۔ اس ایپ پر ایک مرتبہ آئی ڈی بنالینے کے بعد آپ اسے دیگر کسی بھی اسمارٹ فون، ٹیبلٹ حتیٰ کہ ڈیسک ٹاپ پر بھی استعمال کرسکتے ہیں ۔
کوئز لیٹ
اپنی معلومات میں اضافہ کرنے کیلئے بیشتر طلبہ بے چین رہتے ہیں ۔ ایسے طلبہ جنرل نالج کوئز میں حصہ لیتے ہیں ۔ متعدد طلبہ ایسے بھی ہوتے ہیں جنہیں کوئز میں حصہ نہیں لینا ہوتا مگر وہ ہر وقت اپنی معلومات میں اضافہ کرنے کی کوشش میں رہتے ہیں ۔ انہیں جنرل نالج کی کوئی کتاب مل جائے یا اخبار میں کوئی کالم، وہ اسے پڑھے بغیر چین سے نہیں بیٹھتے۔ یوں تو پلے اسٹور اور ایپ اسٹور پر بہت سے جنرل نالج ایپ ہیں لیکن کوئز لیٹ استعمال کرنے میں آسان ہے جس میں جنرل نالج کے ہزاروں سوال فیڈ ہیں ۔ وقتاً فوقتاً اس میں اضافہ کیا جاتا رہتا ہے۔ یہ بہت ہی پرکشش ایپ ہے جو ہر عمر کے طالب علم کو اپنی جانب راغب کرتا ہے۔ کوئز لیٹ اپنی ویب سائٹ پر دعویٰ کرتا ہے کہ اسے استعمال کرنے کے بعد ۹۰؍ فیصد طلبہ کے نتائج بہتر آتے ہیں ۔ یہ ایپ طلبہ کو دلچسپی کا سامان فراہم کرتا ہے اور پڑھائی کو آسان بنا کر پیش کرتا ہے۔ اس پر ہر مضمون کے سوالات موجود ہیں ۔

طلبہ کے تعلیمی سفر میں یہ ’’۵؍ ایپس‘‘ یقیناً مددگار ثابت ہوں گے

متعلقہ خبریں