جب ہم چکنائی لگے ہاتھوں پر صابن ملتے ہیں تو صابن کے سالمات چکنائی کی تہہ کے ساتھ رابطہ قائم کرنے لگتے ہیں۔ ان کے پانی سے دور رہنے والے حصے چکنائی میں داخل ہو جاتے ہیں جبکہ پانی سے قریب رہنے والے حصے پانی کی طرف رخ رکھتے ہیں۔

روزمرہ زندگی میں ہم اکثر دیکھتے ہیں کہ اگر ہاتھوں پر تیل، گھی یا کسی چکنی چیز کی تہہ جم جائے تو صرف پانی سے ہاتھ دھونے پر چکنائی پوری طرح صاف نہیں ہوتی لیکن جیسے ہی صابن استعمال کیا جاتا ہے، ہاتھ صاف ہو جاتے ہیں۔ کیا آپ نے کبھی سوچا کہ آخر ایسا کیوں ہوتاہے؟
چکنائی اور پانی آپس میں کیوں نہیں گھلتے؟
اس بات کو سمجھنے کیلئے پہلے پانی اور چکنائی کی خصوصیات کو جاننا ضروری ہے۔ پانی کے سالمات (Molecules) کی ساخت ایسی ہوتی ہے کہ ان میں برقی بار کی تقسیم غیر مساوی ہوتی ہے۔ اسی وجہ سے پانی کو قطبی (Polar) مادہ کہا جاتا ہے۔ اس کے برعکس تیل اور گھی میں موجود چکنائی کے بیشتر سالمات غیر قطبی (Non-polar) ہوتے ہیں۔ عام طور پر قطبی مادے دوسرے قطبی مادوں میں اور غیر قطبی مادے غیر قطبی مادوں میں بہتر طور پر حل ہوتے ہیں۔ چونکہ پانی قطبی جبکہ چکنائی زیادہ تر غیر قطبی ہوتی ہے، اس لئے دونوں آسانی سے ایک دوسرے میں حل نہیں ہوتے۔ یہی وجہ ہے کہ صرف پانی سے ہاتھ دھونے پر چکنائی آسانی سے نہیں اترتی۔ پانی ہاتھ کی سطح سے گزر تو جاتا ہے لیکن چکنائی کے ساتھ تعلق اتنا مضبوط نہیں ہوتا کہ وہ اسے مؤثر انداز میں اپنے ساتھ بہا لے جائے۔

یہ بھی پڑھئے: باہر رکھنے پر چاکلیٹ پگھل جاتا ہے، کیوں؟

صابن کی کیمیائی ساخت کا راز
صابن کی سب سے اہم خصوصیت یہ ہے کہ اس کے ہر سالمے میں دو مختلف حصے موجود ہوتے ہیں۔ ایک حصہ پانی کے ساتھ آسانی سے تعلق قائم کرتا ہے، جبکہ دوسرا چکنائی کی طرف راغب ہوتا ہے۔ یہی خصوصیت صابن کو پانی اور چکنائی کے درمیان رابطہ قائم کرنے کے قابل بناتی ہے۔ 
صابن چکنائی کو کیسے الگ کرتا ہے؟
جب ہم چکنائی لگے ہاتھوں پر صابن ملتے ہیں تو صابن کے سالمات چکنائی کی تہہ کے ساتھ رابطہ قائم کرنے لگتے ہیں۔ ان کے پانی سے دور رہنے والے حصے چکنائی میں داخل ہو جاتے ہیں جبکہ پانی سے قریب رہنے والے حصے پانی کی طرف رخ رکھتے ہیں۔ اس عمل سے چکنائی اور پانی کے درمیان رابطہ بہتر ہو جاتا ہے۔ ہاتھوں کو آپس میں رگڑنے سے صابن چکنائی کی تہہ کو چھوٹے چھوٹے قطروں میں تقسیم کرنے میں مدد دیتا ہے۔ صابن کے سالمات ان قطروں کی سطح پر جمع ہو جاتے ہیں اور انہیں دوبارہ آپس میں مل کر ایک بڑی تہہ بنانے سے روکتے ہیں۔ اس طرح چکنائی جلد کی سطح سے الگ ہو کر پانی میں معلق رہتی ہے اور ہاتھ دھوتے وقت بہہ جاتی ہے۔ صابن کا کام صرف چکنائی دور کرنا نہیں بلکہ جلد پر گردوغبار، پسینہ، جلد سے خارج ہونے والے تیل، خوراک کے ذرات اور جراثیم موجود ہو سکتے ہیں۔ صابن اور پانی مل کر ان ذرات کو جلد سے الگ کرنے اور انہیں پانی کے ساتھ بہانے میں مدد دیتے ہیں۔