اگرچہ اے سی کوچ کا درجۂ حرارت ایک حد تک متوازن رکھا جاتا ہے لیکن بعض مسافروں کو زیادہ ٹھنڈ محسوس ہوتی ہے جبکہ بعض کو کم۔ ایسی صورت میں دوسری چادر اضافی آرام فراہم کرتی ہے۔

ہندوستانی ریلویز کے اے سی کوچز میں سفر کرنے والے مسافروں کو عام طور پر ایک تکیہ، ایک کمبل، چہرے یا ہاتھ صاف کرنے کا تولیہ اور دو عدد صاف چادریں فراہم کی جاتی ہیں۔ کیا آپ نے کبھی غور کیا کہ آخر ایک کے بجائے دو چادریں دینے کی کیا ضرورت ہے؟ 
ایک چادر بستر بچھانے کیلئے
پہلی چادر کا بنیادی مقصد برتھ (Berth) یا گدے پر بچھانا ہوتا ہے۔ روزانہ ہزاروں افراد ایک ہی برتھ استعمال کرتے ہیں، اس لئے اگرچہ کوچز کی صفائی کی جاتی ہے، پھر بھی براہِ راست گدے پر لیٹنے کے بجائے صاف چادر بچھانا زیادہ محفوظ اور آرام دہ سمجھا جاتا ہے۔ اس سے مسافر کو صاف ستھرا ماحول میسر آتا ہے اور گدے کے ساتھ براہِ راست رابطہ بھی نہیں رہتا۔ 
دوسری چادر اوڑھنے یا کمبل پر بچھانے کیلئے
دوسری چادر عام طور پر اوڑھنے یا کمبل کے ساتھ استعمال کرنے کیلئے دی جاتی ہے۔ اے سی کوچز میں فراہم کیا جانے والا کمبل اگرچہ ہر استعمال کے بعد مقررہ نظام کے تحت دھلتا اور صاف کیا جاتا ہے لیکن بہت سے مسافر حفظانِ صحت کے پیشِ نظر کمبل کو براہِ راست اوڑھنے کے بجائے اس کے اوپر چادر استعمال کرنا پسند کرتے ہیں۔ اس طرح جسم اور کمبل کے درمیان ایک اضافی صاف تہہ موجود رہتی ہے۔

یہ بھی پڑھئے: دودھ کا رَنگ سفید جبکہ مکھن کا زرد ہوتا ہے، کیوں؟

بہتر حفظانِ صحت اور جراثیم سے تحفظ
روزانہ لاکھوں افراد انڈین ریلوے میں سفر کرتے ہیں، اس لئے بستر کی صفائی نہایت اہم معاملہ ہے۔ دو چادریں فراہم کرنے سے مسافر بستر اور کمبل دونوں کو الگ الگ صاف چادروں سے ڈھانپ سکتا ہے جس سے جراثیم، گردوغبار اور جِلدی مسائل کے خدشات مزید کم ہو جاتے ہیں۔ یہی وجہ ہے کہ یہ انتظام مسافروں کی صحت کیلئے مفید سمجھا جاتا ہے۔ 
مختلف موسموں میں سہولت
اگرچہ اے سی کوچ کا درجۂ حرارت ایک حد تک متوازن رکھا جاتا ہے لیکن بعض مسافروں کو زیادہ ٹھنڈ محسوس ہوتی ہے جبکہ بعض کو کم۔ ایسی صورت میں دوسری چادر اضافی آرام فراہم کرتی ہے۔ گرمی کے موسم میں کئی لوگ صرف چادر اوڑھنا پسند کرتے ہیں، جبکہ سرد موسم میں کمبل کے ساتھ چادر استعمال کرتے ہیں۔

یہ بھی پڑھئے: زیر تعمیرعمارتوں کے باہر ڈجیٹل ڈسپلے ہوتا ہے، کیوں؟

عالمی ریلوے معیارات سے ہم آہنگی
دنیا کے کئی ممالک(روس، قزاخستان، ازبکستان اور چین وغیرہ) میں طویل فاصلے کی ٹرینوں میں بھی بستر کی علاحدہ تہیں فراہم کی جاتی ہیں تاکہ صفائی، آرام اور حفظانِ صحت کے معیارات برقرار رہیں۔ انڈین ریلویز کا دو چادریں فراہم کرنے کا نظام بھی اسی اصول کے مطابق مسافروں کو بہتر سفری سہولت فراہم کرتا ہے۔