عامر خان پروڈکشنز کی فلم ’’ایک دن‘‘، جس میں جنید خان اور سائی پلوّی مرکزی کردار ادا کر رہے ہیں، یکم مئی کو سنیما گھروں میں ریلیز ہونے کے لیے تیار ہے۔ عام طور پر فلموں کی ٹکٹیں ریلیز سے چند دن پہلے فروخت کے لیے دستیاب ہوتی ہیں۔

عامر خان پروڈکشنز کی فلم ’’ایک دن‘‘، جس میں جنید خان اور سائی پلوّی مرکزی کردار ادا کر رہے ہیں، یکم مئی کو سنیما گھروں میں ریلیز ہونے کے لیے تیار ہے۔ عام طور پر فلموں کی ٹکٹیں ریلیز سے چند دن پہلے فروخت کے لیے دستیاب ہوتی ہیں، لیکن مداح اس وقت حیران رہ گئے جب انہوں نے دیکھا کہ  ’’ایک دن‘‘ کی ایڈوانس بکنگ پہلے ہی شروع ہو چکی ہے۔ بالی ووڈ ہنگامہ کے مطابق، عامر خان نے ایک نئی ریلیز حکمتِ عملی اپناتے ہوئے فلم کی بکنگ ریلیز سے ۳۹؍ دن پہلے ہی کھول دی ہے۔
ایک دن کی ایڈوانس بکنگ 
رپورٹ کے مطابق  اس ابتدائی آغاز کے ساتھ ہی ہندوستان  کے تقریباً ۲۰؍ شہروں میں ٹکٹوں کی فروخت شروع ہو چکی ہے، جبکہ کچھ منتخب سنیما گھروں میں فی الحال یکم مئی کے لیے صرف ایک شو رکھا گیا ہے۔ بڑے شہروں میں دہلی-این سی آر سب سے آگے ہے جہاں ۲۴؍ اسکرینز پر ایڈوانس بکنگ کھولی گئی ہے، اس کے بعد ممبئی میں ۱۱؍ اسکرینز شامل ہیں۔ اس کے علاوہ چندی گڑھ اور پونے جیسے شہروں میں بھی محدود شوز کے ساتھ بکنگ شروع ہو گئی ہے، جہاں ہر شہر میں ۳؍تھیٹرز میں ٹکٹ دستیاب ہیں۔ دلچسپ بات یہ ہے کہ رائے پور، گورکھپور اور احمد آباد جیسے چھوٹے مراکز میں بھی ابتدائی بکنگ ریکارڈ کی گئی ہے۔
رپورٹ کے مطابق، ۱۱؍ اپریل صبح ۸؍ بجے تک رائے پور کے پی وی آر سٹی سینٹر میں ۴۶؍ ٹکٹ فروخت ہو چکے تھے۔ اس کے بعد احمد آباد کےپی وی آر   پیلیڈیم مال میں ۳۷؍ ٹکٹ فروخت ہوئے جبکہ گورکھپور کے آئنوکس اورین مال میں ۱۸؍ بکنگز ریکارڈ کی گئیں۔ ممبئی اور دہلی این سی آر کے کئی سنیما گھروں میں بھی تقریباً ۲۰؍ ٹکٹ فی مقام فروخت ہوئے ہیں۔ مجموعی طور پر، ہندوستان  بھر میں اب تک ۵۲۰؍ سے زائد ٹکٹ بک کیے جا چکے ہیں۔

یہ بھی پڑھئے:رونالڈو کا جادو برقرار: ۲۴؍واں گول داغ کر النصر کی فتح یقینی بنا دی

فلم ’’ایک دن‘‘ کے بارے میں
 عامر خان نے ’’ایک دن‘‘ کے بارے میں کہاکہ ’’یہ ایک خالص رومانوی فلم ہے، ایک کلاسک انداز کی محبت کی کہانی  اور یہ وہ قسم کی رومانوی فلم ہے جو مجھے پسند ہے۔ بطور ناظر، مجھے نرم و نازک رومانوی فلمیں بہت پسند ہیں۔ مجھے جذباتی محبت کی کہانیاں بہت اچھی لگتی ہیں۔ یہ ایک کلاسک، قدرے جادوئی محبت کی کہانی ہے  اور جب میں نے پہلی بار اس کا اسکرپٹ سنا تو مجھے بہت پسند آیا۔ مجھے خوشی ہے کہ ہم نے آخرکار سائی پلوّی کو منتخب کیا۔ وہ ایک بہترین اداکارہ ہیں اور انہوں نے شاندار کام کیا ہے۔‘‘ یہ فلم سائی پلوّی کی ہندی فلموں میں پہلی انٹری بھی ہے۔

یہ بھی پڑھئے:پہلی فلم پانے کیلئے ۱۵؍ سال لگے، امسال ۳؍ فلمیں ریلیز ہورہی ہیں: اویناش تیواری جذباتی

 
عامر خان پروڈکشنز کے بینر تلے بننے والی ’’ایک دن‘‘ میں سائی پلوّی اور جنید خان مرکزی کرداروں میں نظر آئیں گے۔ اس فلم کی ہدایت کاری سنیل پانڈے نے کی ہے جبکہ اسے عامر خان، منصور خان اور اپرنا پروہت نے پروڈیوس کیا ہے۔ فلم یکم مئی ۲۰۲۶ء کو سنیما گھروں میں ریلیز ہوگی۔