کیلیفورنیا کی ڈیموکریٹ رہنما عائشہ وہاب نے خصوصی انتخابات میں کامیابی حاصل کرکے سابق رکنِ کانگریس ایرک سویل ویل کی باقی ماندہ مدت کیلئے ایوانِ نمائندگان کی نشست جیت لی۔ وہ امریکی کانگریس میں خدمات انجام دینے والی پہلی افغان نژاد امریکی ہوں گی۔ وہاب نے اسرائیل کیلئے امریکی فوجی امداد میں کمی کا مطالبہ کیا ہے اور غزہ میں اسرائیلی کارروائیوں پر تنقید کی ہے۔ نومبر میں وہ دوبارہ اسی نشست کیلئے مکمل دو سالہ مدت کے انتخاب میں حصہ لیں گی۔

کیلیفورنیا کی قانون ساز عائشہ وہاب نے خصوصی انتخابات میں کامیابی حاصل کرلی ہے اور اب وہ سابق رکنِ ایوانِ نمائندگان ایرک سویل ویل کی باقی ماندہ مدت کیلئے خدمات انجام دیں گی، جو جنوری میں ختم ہوگی۔ ڈیموکریٹ رہنما ایرک سویل ویل کیلیفورنیا کے گورنر کے عہدے کیلئے انتخاب لڑ رہے تھے، تاہم جنسی زیادتی اور ہراسانی کے الزامات سامنے آنے کے بعد انہوں نے اپریل میں اپنی انتخابی مہم ختم کردی اور کانگریس سے استعفیٰ دے دیا۔ واضح ہو کہ سویل ویل نے ان الزامات کی تردید کی ہے۔

یہ بھی پڑھئے: اسرائیل: بن گوریون ہوائی اڈے پر مزدوروں کی ہڑتال، ۸۳؍ لاکھ ڈالر کا نقصان

عائشہ وہاب نے کیلیفورنیا کے ۱۴؍ ویں کانگریشنل ڈسٹرکٹ کے خصوصی انتخاب میں بے ایریا ریپڈ ٹرانزٹ (BART) کی ڈائریکٹر میلیسا ہرنینڈز کو شکست دی۔ یہ حلقہ سان فرانسسکو بے کے مشرقی جانب واقع المیڈا کاؤنٹی کے بعض علاقوں پر مشتمل ہے۔ اس انتخاب میں اسرائیل نواز لابنگ گروپ ’’امریکن اسرائیل پبلک افیئرز کمیٹی‘‘ (AIPAC) سے وابستہ سپر پی اے سیس نے عائشہ وہاب کے خلاف اشتہارات اور سوشل میڈیا مہمات پر لاکھوں ڈالر خرچ کئے، جبکہ ان کی حریف کی حمایت بھی کی۔ عائشہ وہاب نے اسرائیل کیلئے امریکی فوجی امداد میں کمی کا مطالبہ کیا ہے۔ ان کا کہنا ہے کہ اسرائیل نے غزہ میں نسل کشی کی ہے۔ دوسری جانب میلیسا ہرنینڈز کا مؤقف ہے کہ اسرائیل کو اپنے دفاع کا حق حاصل ہے۔

یہ بھی پڑھئے: امریکہ کی ایران کے خلاف معاشی جنگ، ایران کی نئے ہتھیار استعمال کرنے کی دھمکی

وہاب نے سستے اور قابلِ استطاعت مکانات اور رہائش تک بہتر رسائی کو بھی اپنی سیاسی ترجیحات میں شامل کیا ہے۔ انہوں نے ۲۰۲۳ء میں ذات پات کی بنیاد پر امتیازی سلوک پر پابندی عائد کرنے کیلئے ایک بل بھی پیش کیا تھا، جس نے ملک بھر میں توجہ حاصل کی۔ تاہم ڈیموکریٹ گورنر گیون نیوزوم نے اس بل کو ویٹو کردیا تھا۔ ان کا کہنا تھا کہ شہری حقوق کے قوانین پہلے ہی اس نوعیت کے امتیازی سلوک کو ممنوع قرار دیتے ہیں۔

یہ بھی پڑھئے: بنگلہ دیش: بی این پی لیڈر مرزا فخرالاسلام عالمگیر نئے صدر منتخب

عائشہ وہاب ۲۰۱۸ء میں ہیورڈ سٹی کونسل کی نشست جیت کر امریکہ میں کسی عوامی عہدے کیلئے منتخب ہونے والی پہلی افغان نژاد امریکی بن گئی تھیں۔ اب وہ کانگریس میں خدمات انجام دینے والی پہلی افغان نژاد امریکی ہوں گی۔ عائشہ وہاب اور میلیسا ہرنینڈز نومبر میں ایک بار پھر مدِمقابل ہوں گی۔ اس انتخاب میں فیصلہ ہوگا کہ اگلی مکمل ۲؍ سالہ مدت کیلئے اس کانگریشنل ڈسٹرکٹ کی نمائندگی کون کرے گا۔