یش راج فلمز کی اسپائی یونیورس کی پہلی خاتون مرکزی کردار پر مبنی فلم ’’الفا‘‘ کی ریلیز تاریخ ایک بار پھر تبدیل کر دی گئی ہے۔ عالیہ بھٹ، شروری، بوبی دیول اور انیل کپور کی اداکاری سے مزین یہ فلم اب ۱۰؍ جولائی کے بجائے ۳؍ جولائی ۲۰۲۶ء کو سنیما گھروں کی زینت بنے گی۔

بالی ووڈ کی سب سے زیادہ متوقع فلموں میں شمار ہونے والی ’’الفا‘‘ کی ریلیز تاریخ میں ایک بار پھر تبدیلی کر دی گئی ہے۔ عالیہ بھٹ اور شروری کی مرکزی کرداروں پر مشتمل یہ ایکشن تھریلر اب ۱۰؍ جولائی ۲۰۲۶ء کے بجائے ۳؍ جولائی ۲۰۲۶ء کو سنیما گھروں میں نمائش کے لیے پیش کی جائے گی۔ فلم، جسے یش راج فلمز کی مشہور اسپائی یونیورس کا حصہ قرار دیا جا رہا ہے، ابتدا میں کرسمس ۲۰۲۵ء پر ریلیز ہونے والی تھی۔ تاہم فرنچائز کی گزشتہ فلم ’’وار ۲‘‘ کی مایوس کن کارکردگی کے بعد اسٹوڈیو نے اپنی آئندہ ریلیز حکمتِ عملی پر نظرثانی کی اور ’’الفا‘‘ کو ۲۰۲۶ء تک مؤخر کر دیا۔

یہ بھی پڑھئے : کرن جوہر نے انسٹاگرام پر شاہ رخ خان کو اَن فالو کردیا

بعد ازاں فلم کے لیے ۱۷؍ اپریل ۲۰۲۶ء کی تاریخ مقرر کی گئی، لیکن چند ماہ بعد اسے دوبارہ تبدیل کرتے ہوئے ۱۰؍ جولائی ۲۰۲۶ء تک منتقل کر دیا گیا۔ اب تازہ اطلاعات کے مطابق فلم کو ایک ہفتہ پہلے ریلیز کرنے کا فیصلہ کیا گیا ہے۔ فلمی ویب سائٹس اور تجارتی ذرائع کے مطابق، اس تبدیلی کی بنیادی وجہ ’’دھمال ۴‘‘ کی ریلیز میں تاخیر ہے۔ اجے دیوگن، ارشد وارثی، رتیش دیشمکھ اور جاوید جعفری کی یہ کامیڈی فلم پہلے ۳؍ جولائی کو ریلیز ہونے والی تھی، لیکن اب اسے ۱۷؍ جولائی ۲۰۲۶ء تک ملتوی کر دیا گیا ہے۔ ذرائع نے بتایا کہ ۳؍ جولائی کی تاریخ اچانک خالی ہونے کے بعد پروڈیوسر آدتیہ چوپڑہ نے محسوس کیا کہ ’’الفا‘‘ کو اس موقع سے فائدہ اٹھانا چاہیے۔ ذرائع کے مطابق، ’’جب ’’دھمال ۴‘‘ آگے بڑھ گئی تو ۳؍ جولائی ایک مثالی تاریخ بن گئی۔ چونکہ اس دن کسی بڑی ہندی فلم کی ریلیز طے نہیں تھی، اس لیے فیصلہ کیا گیا کہ ’’الفا‘‘ کو ایک ہفتہ پہلے سنیما گھروں میں لایا جائے۔‘‘
فلمی تجزیہ کاروں کا ماننا ہے کہ اس فیصلے سے ’’الفا‘‘ کو باکس آفس پر اضافی فائدہ حاصل ہو سکتا ہے۔ ۱۷؍ جولائی کو نہ صرف ’’دھمال ۴‘‘ ریلیز ہوگی بلکہ ’’دی اوڈیسی‘‘ بھی دنیا بھر میں نمائش کے لیے پیش کی جائے گی۔ ایسے میں ’’الفا‘‘ کو ان دونوں بڑی فلموں کی آمد سے قبل تقریباً دو ہفتوں کا نسبتاً کھلا میدان میسر آ جائے گا۔ تجارتی ماہرین کے مطابق، ’’اگر ’’الفا‘‘ ۳؍ جولائی کو ریلیز ہوتی ہے تو اسے ۱۷؍ جولائی تک مضبوط کاروبار کرنے کے لیے مناسب وقت ملے گا۔ یہ فائدہ خاص طور پر اس لیے اہم ہے کیونکہ ۱۰؍ جولائی کو بھی کوئی بڑی بالی ووڈ فلم شیڈول نہیں ہے، جس سے اسے مسلسل دو ہفتوں تک نمایاں اسکرین اسپیس مل سکتی ہے۔‘‘

یہ بھی پڑھئے : آئی ایم ڈی بی:مقبول ترین ہندوستانی شخصیت یدھویر اہلاوت، جانئے کون ہیں؟

فلم کی ہدایت کاری شیو راویل نے کی ہے، جنہوں نے اس سے قبل ’’دی ریلوے مین‘‘ کے ذریعے خاصی شہرت حاصل کی تھی۔ ’’الفا‘‘ میں عالیہ بھٹ ایک مرکزی ایکشن کردار میں نظر آئیں گی جبکہ شروری ان کے ساتھ اہم کردار ادا کر رہی ہیں۔ فلم میں بوبی دیول منفی کردار میں جبکہ انیل کپور ایک کلیدی کردار میں جلوہ گر ہوں گے۔ 
یش راج اسپائی یونیورس گزشتہ ایک دہائی کے دوران بالی ووڈ کی کامیاب ترین فرنچائزز میں شمار ہوتی رہی ہے۔ اس سیریز کا آغاز ’’ایک تھا ٹائیگر‘‘ سے ہوا، جس کے بعد ’’ٹائیگر زندہ ہے‘‘، وار‘‘، ’’پٹھان‘‘ اور ’’ٹائیگر ۳‘‘ جیسی فلموں نے باکس آفس پر شاندار کامیابی حاصل کی۔ اگرچہ فرنچائز کی حالیہ فلم ’’وار ۲‘‘ توقعات پر پورا اترنے میں ناکام رہی، تاہم یش راج فلمز کو امید ہے کہ ’’الفا‘‘ نہ صرف اسپائی یونیورس میں ایک نئی سمت متعارف کرائے گی بلکہ ایک خاتون مرکزی کردار والی ایکشن فرنچائز کے طور پر بھی اپنی الگ شناخت قائم کرے گی۔