آئی ایم ڈی بی کی تازہ ترین ہفتہ وار ’’ٹاپ ۳۰؍ مقبول ترین ہندوستانی شخصیات‘‘ کی فہرست میں ایک حیران کن تبدیلی سامنے آئی ہے۔ اس بار کسی سپر اسٹار یا بڑی فلمی شخصیت کے بجائے نوجوان اداکار یدھویر اہلاوت نے پہلی پوزیشن حاصل کی ہے۔ نیٹ فلکس کی حالیہ فلم ’’کرتویہ‘‘ میں اپنی متاثر کن اداکاری کے بعد یدھویر کے بارے میں شائقین کی دلچسپی میں نمایاں اضافہ دیکھنے میں آیا، جس کے نتیجے میں وہ آئی ایم ڈی بی کی مقبولیت درجہ بندی میں سرفہرست پہنچ گئے۔ انہوں نے ایشوریہ رائے بچن، وجئے اور موہن لال جیسی بڑی شخصیات کو بھی پیچھے چھوڑ دیا۔

دنیا کے معروف فلمی اور تفریحی ڈیٹا بیس پلیٹ فارم آئی ایم ڈی بی کی جانب سے جاری کی جانے والی ہفتہ وار ’’ٹاپ ۳۰؍ مقبول ترین ہندوستانی شخصیات‘‘ کی تازہ فہرست نے فلمی حلقوں اور شائقین کو حیران کر دیا ہے۔ عام طور پر اس فہرست میں وہ اداکار اور اداکارائیں سرفہرست رہتے ہیں جن کی فلمیں سنیما گھروں میں کامیابی حاصل کر رہی ہوں یا جن کے او ٹی ٹی منصوبے سوشل میڈیا پر ٹرینڈ کر رہے ہوں۔ تاہم اس ہفتے کی درجہ بندی میں ایک نوجوان اداکار نے تمام بڑی شخصیات کو پیچھے چھوڑتے ہوئے پہلی پوزیشن حاصل کر لی۔ آئی ایم ڈی بی کی تازہ درجہ بندی کے مطابق نوجوان اداکار یدھویر اہلاوت اس وقت ہندوستان کی سب سے زیادہ مقبول شخصیت بن گئے ہیں۔ ان کی یہ کامیابی حال ہی میں ریلیز ہونے والی نیٹ فلکس فلم ’’کرتویہ‘‘ میں ان کی غیر معمولی اداکاری کے بعد سامنے آئی ہے۔

فلم میں سیف علی خان مرکزی کردار ادا کر رہے ہیں، جبکہ یدھویر اہلاوت نے ایک ایسے ۱۴؍ سالہ لڑکے کا کردار نبھایا ہے جسے قتل کرنے کی کوشش کی جاتی ہے۔ کہانی میں سیف علی خان ایک پولیس افسر کے روپ میں نظر آتے ہیں، جنہیں اس بچے کی حفاظت کی ذمہ داری سونپی جاتی ہے۔ فلم میں یدھویر کی جذباتی اور پختہ اداکاری نے نہ صرف ناقدین بلکہ عام ناظرین کو بھی متاثر کیا۔ فلم کی ریلیز کے بعد سوشل میڈیا پر ان کی کارکردگی کے حوالے سے بڑے پیمانے پر گفتگو ہوئی، جس کے نتیجے میں ان کے بارے میں جاننے کی دلچسپی میں نمایاں اضافہ دیکھا گیا۔

رپورٹس کے مطابق نیٹ فلکس پر ۱۵؍ مئی کو فلم کی ریلیز کے بعد آئی ایم ڈی بی پر یدھویر اہلاوت کے پروفائل کے وزٹس میں غیر معمولی اضافہ ہوا، جس نے انہیں پلیٹ فارم کی ہفتہ وار مقبولیت کی فہرست میں نمبر ایک مقام تک پہنچا دیا۔ آئی ایم ڈی بی کی یہ درجہ بندی دنیا بھر کے صارفین کی جانب سے اداکاروں اور شخصیات کے پروفائلز پر آنے والے ٹریفک، سرچز اور دلچسپی کی بنیاد پر تیار کی جاتی ہے۔ اسی وجہ سے اسے شائقین کی موجودہ دلچسپی کا ایک اہم پیمانہ سمجھا جاتا ہے۔ ہریانہ سے تعلق رکھنے والے یدھویر اہلاوت نے اپنے فلمی سفر کا آغاز ۲۰۱۹ء میں ریلیز ہونے والی فلم ’’سانڈ کی آنکھ‘‘ سے کیا تھا۔ اس کے بعد وہ فلم ’’لو ہاسٹل‘‘ اور ویب سیریز ’’کو ایڈ‘‘ سمیت مختلف فلموں اور ویب سیریز میں نظر آئے۔

یہ بھی پڑھئے: اسٹیون اسپیلبرگ کی یو ایف او تھریلر ’’ڈسکلوزر ڈے‘‘ کا ٹریلر جاری

اگرچہ ان کے کریئر کے ابتدائی برسوں میں انہیں زیادہ تر کم عمر کرداروں میں کاسٹ کیا جاتا رہا، تاہم ’’کرتویہ‘‘ میں ان کی اداکاری کو ان کے کریئر کا اب تک کا سب سے بڑا بریک تھرو قرار دیا جا رہا ہے۔ دلچسپ بات یہ ہے کہ یدھویر نے ایک سابق انٹرویو میں وضاحت کی تھی کہ اگرچہ وہ اکثر نوعمر کردار ادا کرتے ہیں، لیکن حقیقی زندگی میں وہ نابالغ نہیں ہیں۔ ان کا کہنا تھا کہ ان کی جسمانی ساخت اور چہرے کے خدوخال کی وجہ سے انہیں کم عمر کرداروں کیلئے موزوں سمجھا جاتا ہے۔ فلمی مبصرین کا کہنا ہے کہ آئی ایم ڈی بی کی تازہ درجہ بندی اس بات کا ثبوت ہے کہ مضبوط اداکاری اور یادگار کردار آج بھی بڑے ناموں اور اسٹار پاور پر سبقت لے جا سکتے ہیں۔ یدھویر اہلاوت کی یہ کامیابی نہ صرف ان کیلئے ایک اہم سنگ میل ہے بلکہ نوجوان اداکاروں کیلئے بھی حوصلہ افزا مثال سمجھی جا رہی ہے۔