ہالی ووڈ کی معروف اداکارہ انجیلینا جولی ہالی ووڈ سے کنارہ کشی اختیار کرنا چاہتی ہیں جس کی بڑی وجہ انہوں نے ان کی سماجی زندگی خاص طور پر بریڈ پٹ سےعلیحدگی کے بعد پیدا ہونے والے حالات کو بتایا ہے۔

ہالی ووڈ اداکارہ انجیلینا جولی نے کہا کہ ’’اگر میں انڈسٹری میں آج ہی شروعات کرتی ہوں تو شاید اداکاری کو کبھی اپنا کریئر نہیں بناتی۔‘‘ اداکار جون ووئٹ اور مارچیلین برٹرینڈ کی بیٹی ۴۸؍ سالہ انجیلینا نے کہا کہ’’ لاس اینجلس میں رہتے ہوئے ان کی ’’واقعی ایک سماجی زندگی‘‘ہے کیونکہ جب بھی وہ اپنا گھر چھوڑتی ہیں، انہیں پاپرازیوں کی طرف سے غیرضروری توجہ کا مرکز بننا پڑتا ہے، جو ان کی ہالی ووڈ کو چھوڑنے کی ایک اہم وجہ ہے۔ انجیلینا نے ایک انٹرویو میں اداکار بریڈپٹ سے علاحدگی کا حوالہ دیتے ہوئے کہا کہ’’میں آج اداکارہ بننا نہیں چاہوں گی، جب میں نے شروعات کی تھی تب اتنے عوامی ہونے کی اور اتنا مشہور ہونے کی توقع نہیں کی تھی۔ یہ میری طلاق کے بعد کے معاملات ہیں۔ میں اپنی زندگی آزادی سے جینے اور سفرکی صلاحیت کھوچکی ہوں۔ میں امید کرتی ہوں کہ میں اپنازیادہ سے زیادہ وقت کمبوڈیا کے گھر میں گزاروں جہاں ان کا گود لیا ہوا بیٹا میڈوکس رہتاہے۔‘‘ آسکر جیتنے کے بعد شہرت ، اس کے بعد افسردگی اوراس وقت خود کشی کے خیالات آنے پر انہوں نے کہا تھا کہ ’’میں نے اسے کبھی بھی اہم نہیں سمجھا تھا۔ میں کافی پُرسکون جگہ پر پلی بڑھی ہوں۔ دنیا کے تمام مقامات میں سے ہالی ووڈ صحت مند جگہ نہیں ہے۔ اس لئے میں نے اسے چھوڑنے کا فیصلہ کیاہے۔‘‘