بورڈ آف کنٹرول فار کرکٹ ان انڈیا (بی سی سی آئی) نے ہندوستان اور پاکستان کے درمیان بڑھتی ہوئی کشیدگی کے پیش نظر انڈین پریمیئر لیگ (آئی پی ایل)۲۰۲۵ء کے بقیہ میچز کو ایک ہفتے کیلئے ملتوی کر دیا ہے۔

جمعہ کی سہ پہر جاری کردہ ایک بیان میں بی سی سی آئی کے سیکریٹری دیوجیت ساکیا نے کہا کہ آئی پی ایل۲۰۲۵ء کو فوری طور پر ایک ہفتے کیلئے ملتوی کر دیا گیا ہے۔ بی سی سی آئی کے سینئر حکام اور آئی پی ایل گورننگ کونسل نے تمام اہم اسٹیک ہولڈرز کے ساتھ مشاورت کے بعد آئی پی ایل کو ایک ہفتے کیلئے ملتوی کرنے کا فیصلہ کیا ہے۔ میٹنگ میں آئی پی ایل کے چیئرمین ارون دھومل بھی موجود تھے۔ ساکیا نے کہا کہ متعلقہ حکام اور اسٹیک ہولڈرز کے ساتھ مشاورت کے بعد صورتحال کا جامع جائزہ لینے کے بعد ٹورنامنٹ کے نئے شیڈول اور مقامات کے بارے میں مزید معلومات دی جائیں گی۔ 

یہ بھی پڑھئے: رویندرجڈیجہ نے ڈیون براوو کا ریکارڈ توڑ دیا چنئی کیلئے سب سے زیادہ وکٹ لینےوالے گیندباز بن گئے

لکھنؤ سے موصولہ اطلاع کے مطابق آج وہاں رائل چیلنجرز بنگلور اور لکھنؤ سپر جائنٹس کے درمیان ہونے والے میچ کے ٹکٹوں کی رقم واپس کی جارہی ہے اور اسٹیڈیم کے تمام دروازے بند کردیئے گئے ہیں۔ تمام۱۰؍ فرنچائزز اور اہم اسٹیک ہولڈرز کو فیصلے سے آگاہ کر دیا گیا ہے۔ خیال کیا جا رہا ہے کہ یہ فیصلہ کھلاڑیوں کی حفاظت کو مدنظر رکھتے ہوئے کیا گیا ہے۔ اس سے قبل جمعرات کو دھرم شالہ میں پنجاب کنگز اور دہلی کیپٹلز کے درمیان جاری میچ منسوخ کر دیا گیا تھا۔ میچ کے بعد آئی پی ایل کے چیئرمین ارون دھومل نے کہا تھا کہ بورڈ صورتحال پر گہری نظر رکھے ہوئے ہے اور کوئی بھی حتمی فیصلہ مرکزی حکومت کی مشاورت سے کیا جائے گا۔ واضح رہے کہ آئی پی ایل۲۰۲۵ءمیں اب تک۵۸؍ میچ کھیلے جا چکے ہیں جن میں دھرم شالہ میں ہونے والے میچ کی منسوخی بھی شامل ہے۔ گروپ مرحلے میں ۱۲؍ میچز باقی ہیں۔