انیل کپور نے اپنی نئی فلم ’’صوبیدار‘‘ کے ٹریلر لانچ پر انکشاف کیا کہ گھر میں ان کے ساتھ کسی سپر اسٹار جیسا برتاؤ نہیں ہوتا۔ انہوں نے ہنستے ہوئے کہا کہ کبھی کبھی شوٹنگ سے پہلے وہ اپنی اہلیہ سنیتا کپور سے ۱۰؍ ہزار روپے تک مانگ لیتے ہیں۔

بالی ووڈ کے سینئر اداکار انیل کپور اپنی تازہ ترین فلم ’’صوبیدار‘‘ کی ریلیز کی تیاری کر رہے ہیں۔ حال ہی میں ٹریلر لانچ ایونٹ کے دوران انہوں نے اپنی ذاتی زندگی سے جڑا دلچسپ انکشاف کیا۔ انہوں نے کہا کہ ’’میرے گھر پر کوئی میرا پرستار نہیں ہے۔ آج جب میں گھر سے نکل رہا تھا، میں نے اپنی بیوی سے کہا کہ میں ٹریلر لانچ کرنے جا رہا ہوں، اس نے پوچھا، ’’کون سی فلم؟‘‘ اسے نہیں معلوم کہ میری پیشہ ورانہ زندگی میں کیا ہو رہا ہے؟ اور یہ وہ خاندان ہے جس سے میں آیا ہوں، وہ میرے ساتھ بالکل ویسا ہی سلوک کرتے ہیں۔ کبھی کبھی میں شوٹنگ سے پہلے ۱۰؍ سے ۱۵؍ ہزار روپے تک مانگتا ہوں۔‘‘ ان کے اس بیان پر تقریب میں قہقہے گونج اٹھے۔

یہ بھی پڑھئے: ’’ون پیس‘‘ سیزن ۲؍ کے پہلے دو ایپی سوڈ ۱۰؍ مارچ کو سنیما گھروں میں ریلیز ہوں گے

انیل کپور اکثر اپنی اہلیہ سنیتا کپور کے بارے میں محبت سے بات کرتے ہیں۔ انہوں نے ماضی میں کئی بار کہا ہے کہ ان کی کامیابی میں سنیتا کا اہم کردار رہا ہے۔ ایک انٹرویو میں انہوں نے بتایا کہ فلم ’’صوبیدار‘‘ میں ان کے کردار کی جذباتی گہرائی پر ان کی حقیقی زندگی کے تعلقات کا اثر ہے۔ انہوں نے کہا کہ ’’صوبیدار میں، مجھے لگتا ہے کہ میں نے اپنی بیوی کے ساتھ اپنے تعلقات کو کھودیا ہے۔‘‘ انہوں نے واضح کیا کہ اپنی بیٹیوں سونم کپور اور ریا کپور کے ساتھ ان کا رشتہ زیادہ تر دوستوں جیسا ہے، اس لیے کردار کی تیاری میں انہوں نے بیوی کے ساتھ تعلق کو زیادہ بنیاد بنایا۔
اس فلم میں انیل کپور کے ساتھ رادھیکا مدن، سوربھ شکلا، آدیتہ راول، مونا سنگھ اور فیصل ملک اہم کرداروں میں نظر آئیں گے۔ فلم کی ہدایت کاری سریش تریوینی نے کی ہے جبکہ پروڈیوسرز میں وکرم ملہوترا، انیل کپور اور سریش تریوینی شامل ہیں۔ یہ فلم ۵؍ مارچ سے امیزون پرائم ویڈیو پر اسٹریم ہوگی۔

یہ بھی پڑھئے: نانی کی ’’دی پیراڈائز‘‘ کا پہلا گانا ’’آیا شیر‘‘ ریلیز، ٹرینڈنگ

فلم ہندوستان کے قلب میں بسنے والے صوبیدار ارجن موریا کی کہانی بیان کرتی ہے، جو فوجی زندگی کے بعد شہری ماحول میں خود کو ڈھالنے کی کوشش کرتا ہے۔ یونیفارم اتارنے کے بعد اسے نہ صرف معاشرتی چیلنجز کا سامنا کرنا پڑتا ہے بلکہ اپنی بیٹی کے ساتھ کشیدہ تعلقات کو بھی سنبھالنا ہوتا ہے۔