جیمز کیمرون نے اپنی نئی فلم ’’اوتار: فائر اینڈ ایش‘‘ کے بجٹ کو ’’اتنہائی زیادہ‘‘ قرار دیتے ہوئے کہا ہے کہ فلم کو منافع کیلئے باکس آفس پر غیر معمولی کمائی کرنا ہوگی۔ انہوں نے اعتراف کیا کہ اگرچہ فلم یقینی طور پر پیسہ کمائے گی، لیکن اصل سوال یہ ہے کہ کیا یہ مستقبل کی اوتار فلموں کیلئے بنیاد فراہم کر پائے گی؟

سال کی سب سے بڑی اور انتہائی متوقع فلموں میں سے ایک جیمز کیمرون کی ’’اوتار: فائر اینڈ ایش‘‘، ’’اوتار‘‘ فرنچائز کی تیسری قسط ہے۔ یہ سلسلہ ۲۰۰۹ء میں شروع ہوا تھا جبکہ دوسرا حصہ ’’اوتار: دی وے آف واٹر‘‘ ۲۰۲۲ء میں ریلیز کیا گیا تھا۔ فلم کی ریلیز سے قبل، جیمز کیمرون سے اس کے بجٹ کے بارے میں سوال کیا گیا، جو بظاہر بہت زیادہ ہے۔ اگرچہ وہ مخصوص اعداد و شمار بتانے سے گریزاں رہے، تاہم انہوں نے اعتراف کیا کہ بجٹ ’’انتہائی بڑا‘‘ ہے اور منافع کیلئے فلم کو ’’دو میٹرک ٹن پیسہ‘‘ کمانا ہوگا۔
میتھیو بیلونی کے پوڈکاسٹ دی ٹاؤن پر گفتگو کرتے ہوئے کیمرون نے کہا کہ ’’لوگ عموماً سیکوئلز کو پسند نہیں کرتے، سوائے اس کے کہ وہ ’’لارڈ آف دی رِنگز‘‘ جیسی سیریز ہو، جہاں ناظرین کرداروں کے انجام کے بارے میں جاننے کے خواہشمند ہوتے ہیں۔ میرے لئے ’’اوتار ۳‘‘ کہانی کے اس خاص حصے کا اختتام ہے،البتہ ممکن ہے کہ عوام اسے ایسے نہ دیکھیں۔‘‘ بجٹ سے متعلق سوال پر انہوں نے نیم مزاحیہ لہجے میں کہا کہ ’’یہ ایک میٹرک ٹن پیسہ ہے، اور منافع کیلئے ہمیں اس سے بھی دوگنا کمانا ہوگا۔ مجھے اس بات میں کوئی شک نہیں کہ فلم پیسہ کمائے گی، مگر اہم سوال یہ ہے کہ کیا یہ اتنا کمائے گی کہ مزید فلمیں بنانے کا جواز پیدا ہو؟‘‘

یہ بھی پڑھئے:’’گھر پر جنوبی افریقہ کے خلاف نہیں جیت سکتے، ۲۰۲۷ء ورلڈ کپ بھول جائیں‘‘

کیمرون نے بتایا کہ وہ تقریباً ۲۰؍ سال سے اوتار کی دنیا پر کام کر رہے ہیں، اور اگر یہ سلسلہ یہاں ختم بھی ہوجائے تو وہ اسے قبول کرلیں گے۔ تاہم، انہوں نے اشارہ دیا کہ اگر فلم میں کسی سوال کا جواب رہ جائے تو وہ اسے شاید ایک کتاب کی صورت میں مکمل کریں گے۔ انہوں نے واضح کیا کہ اوتار فرنچائز کو کسی اور ہدایتکار کے حوالے کرنے کا ان کا کوئی منصوبہ نہیں ہے۔ انہوں نے کہا کہ ’’اگر اوتار کی مزید فلمیں بنیں، تو میں کم از کم بطور پروڈیوسر لازمی شامل رہوں گا۔‘‘

یہ بھی پڑھئے:روہت کو ورلڈکپ ۲۰۲۷ء میں کھیلنا ہے تو بی سی سی آئی کی شرطیں ماننی ہوں گی

⸻یاد رہے کہ ’’اوتار‘‘ کا بجٹ ۲۳۷؍ ملین ڈالر تھا جبکہ اس نے ۹۲ء۲؍ بلین ڈالر کمائے تھے۔ یہ کر آج بھی دنیا کی سب سے زیادہ کمائی کرنے والی فلم ہے۔ ’’اوتار ۲‘‘ کا بجٹ ۳۵۰؍ ملین ڈالر تھا اور اس نے ۳۴ء۲؍ بلین ڈالر کا کاروبار کیا تھا۔ یہ دنیا کی تیسری سب سے زیادہ کمائی کرنے والی فلم ہے۔ یہ کامیابیاں ’’اوتار: فائر اینڈ ایش‘‘ کیلئے توقعات مزید بڑھاتی ہیں۔ یہ فلم ۱۹؍ دسمبر ۲۰۲۵ء کو سنیما گھروں میں ریلیز ہوگی۔