ہندوستانی ٹیم کے ہیڈ کوچ کا عہدہ سنبھالنے کے بعد سے گوتم گمبھیر ۹؍ میں سے ۵؍ ہوم ٹیسٹ ہار چکے ہیں۔ اپنے گھر پر نیوزی لینڈ اور جنوبی افریقہ کے خلاف کلین سویپ سے شائقین اور سابق لیجنڈز ناراض ہیں۔ انہیں شدید تنقید کا نشانہ بنایا گیا ہے۔

 جنوبی افریقہ کے خلاف ہوم ٹیسٹ سیریز میں شکست پر شائقین شدید ناراض ہیں۔ جولائی۲۰۲۴ء میں ہندوستانی مردوں کی کرکٹ ٹیم کے ہیڈ کوچ کا عہدہ سنبھالنے کے بعد سے، گوتم گمبھیر گھر پر کھیلے گئے نو میں سے پانچ ٹیسٹ میچ ہار چکے ہیں۔ ان کے دور میں ہندوستان کو دو ہوم سیریز میں کلین سویپ کا سامنا کرنا پڑا ہے۔ وہ ہندوستان کے ہیڈ کوچ کے طور پر سب سے زیادہ گھریلو ٹیسٹ ہارنے کا ناپسندیدہ ریکارڈ بھی رکھتے ہیں۔
 گمبھیر کو شائقین، سابق لیجنڈز اور کرکٹ ماہرین کی جانب سے شدید تنقید کا سامنا کرنا پڑا ہے۔ کچھ نے تو کم از کم ٹیسٹ فارمیٹ میں انہیں کوچ کے عہدے سے ہٹانے کا مطالبہ بھی کیا ہے۔جنوبی افریقہ کے خلاف ٹیسٹ سیریز کے اختتام کے بعد، ہندوستان اب ٹیمبا باؤما کی قیادت والی ٹیم کے خلاف تین میچوں کی ون ڈے سیریز کھیلے گا۔ گمبھیر جمعہ کو رانچی میں اپنے ٹریننگ سیشن کے دوران ہندوستانی کھلاڑیوں کے ساتھ شامل ہوئے۔ اس دوران ہندوستانی  شائقین نے گمبھیر کو نشانہ بنایا۔آن لائن گردش کرنے والے ایک ویڈیو میں، ایک مداح گمبھیر سے کوچنگ چھوڑنے کا مطالبہ کر رہا ہے۔وائرل ویڈیو میں مداح کو یہ کہتے ہوئے سنا جا رہا ہے’’گھر پر ۰۔۳؍ جنوبی افریقہ کے خلاف  ہار گئے ، کوچنگ چھوڑ دو، آپ گھر پر جنوبی افریقہ کے خلاف نہیں جیت سکتے، ۲۰۲۷ء کے ورلڈ کپ کو بھول جاؤ۔‘‘

Crowd is cooking Gambhir.💀 pic.twitter.com/llcpCZLoAQ

— Gems of Cricket (@GemsOfCrickets) November 28, 2025

کولکاتا کے ایڈن گارڈنز میں کھیلے گئے سیریز کے پہلے ٹیسٹ میں ہندوستان  کو صرف تین دن میں ۳۰؍ رنز سے شکست کا سامنا کرنا پڑا۔ ۲۲؍ سے۲۶؍ نومبر تک گوہاٹی کے بارساپارا کرکٹ اسٹیڈیم میں کھیلے گئے دوسرے ٹیسٹ میں ہندوستان   کو۴۰۸؍ رنز کی شرمناک شکست کا سامنا کرنا پڑا۔ یہ گوہاٹی میں کھیلا گیا ہندوستان  کا پہلا ٹیسٹ تھا اور رنز کے فرق سے  ٹیم  کی سب سے بڑی شکست تھی۔ 

یہ بھی پڑھئے:رانچی میچ میںرو۔کو‘ کی جوڑی تاریخ رقم کرےگی

ہندوستان اور جنوبی افریقہ کے درمیان ۳؍ میچوں کی ون ڈے سیریز کا پہلا میچ اتوار۳۰؍ نومبر کو رانچی میں کھیلا جائے گا۔ اگلے دو میچز ۳؍ دسمبر کو رائے پور اور  ۶؍ دسمبر کو وشاکھاپٹنم میں کھیلے جائیں گے۔ شبھ من گل گردن کی انجری کے باعث باہر ہیں۔ گزشتہ ماہ سڈنی میں آسٹریلیا کے خلاف تیسرے ون ڈے میں ون ڈے کے نائب کپتان شریاس ایّر بھی زخمی ہو گئے تھے۔ کے ایل راہل کو ون ڈے سیریز کے لیے کپتان مقرر کیا گیا ہے۔