ایک ضلعی عدالت نے بالی ووڈ سپر اسٹار سلمان خان، ان کی بہن الویرا خان اگنی ہوتری اوربیئنگ ہیومن جیولری برانڈ کی لائسنس یافتہ کمپنی کے ڈائریکٹرز کو ۵؍ اکتو بر کو عدالت میں پیش ہونے کا حکم دیا ہے۔ یہ حکم چندی گڑھ کے تاجر ارون گپتا کی جانب سے دائر کردہ ایک فوجداری شکایت پر جاری کیا گیا ہے۔

 ایک ضلعی عدالت نے بالی ووڈ سپر اسٹار سلمان خان، ان کی بہن الویرا خان اگنی ہوتری اوربیئنگ ہیومن  جیولری برانڈ کی لائسنس یافتہ کمپنی کے ڈائریکٹرز کو ۵؍ اکتو بر کو عدالت میں پیش ہونے کا حکم دیا ہے۔ یہ حکم چندی گڑھ کے تاجر  ارون گپتا  کی جانب سے دائر کردہ ایک  فوجداری شکایت  پر جاری کیا گیا ہے۔ شکایت میں الزام لگایا گیا ہے کہ انہوں نے بیئنگ ہیومن  جیولری شوروم قائم کرنے کے لیے تقریباً ۳؍کروڑ روپے کی سرمایہ کاری کی، لیکن معاہدے کے مطابق انہیں مطلوبہ تعاون فراہم نہیں کیا گیا۔

یہ بھی پڑھئے:انگلینڈ کے تیز گیندباز جان ٹرنر نے محض ۲۵؍ برس کی عمر میں کرکٹ سے ریٹائرمنٹ لے لیا

شکایت میں کیا الزامات ہیں؟
ارون گپتا کے مطابق انہوں نے تقریباً ایک کروڑ روپے  شوروم کے قیام پر خرچ کیے۔ ان کا کہنا ہے کہ انہیں برانڈ کی جانب سے تشہیر، مارکیٹنگ اور جیولری کی مسلسل فراہمی کا وعدہ کیا گیا تھا، لیکن یہ وعدے پورے نہیں ہوئے، جس کے باعث انہیں کروڑوں روپے کا نقصان اٹھانا پڑا۔ انہوں نے یہ دعویٰ بھی کیا کہ افتتاحی تقریب میں سلمان خان کی شرکت کا یقین دلایا گیا تھا  تاہم افتتاح کے موقع پر ان کے بہنوئی آیوش شرما نے شرکت کی۔
شکایت میں مزید کہا گیا کہ ۲۰۲۰ء میں وہ دفتر، جہاں سے جیولری کا اسٹاک ملنا تھا، بند ہو گیا تھا۔ ارون گپتا کے مطابق انہوں نے سلمان خان سے ایک ملاقات کے دوران مسئلہ حل کرنے کی یقین دہانی بھی حاصل کی، مگر بعد میں ان کے خطوط کا کوئی جواب نہیں ملا۔
پرانا معاملہ دوبارہ عدالت میں
 یہ تنازع پہلی بار ۲۰۲۱ء میں سامنے آیا تھا، جب چندی گڑھ پولیس نے سلمان خان، الویرا خان اور دیگر افراد کو پوچھ گچھ کے لیے طلب کیا تھا۔ اب تقریباً پانچ سال بعد یہ معاملہ پولیس انکوائری سے آگے بڑھ کر عدالتی کارروائی کے مرحلے میں داخل ہو گیا ہے۔

یہ بھی پڑھئے:پیرا ٹیبل ٹینس کھلاڑی نور جہاں آئی ٹی ٹی ایف ورلڈ پیرا فیوچر لاہٹی میں حصہ لیں گی

بیئنگ  ہیومن کا مؤقف
بیئنگ ہیومن فاؤنڈیشن   نے ۲۰۲۱ء میں ان الزامات کی تردید کرتے ہوئے کہا تھا کہ یہ تنازع صرف لائسنس یافتہ کمپنی اور دوسرے فریق کے درمیان ہے۔ فاؤنڈیشن کے مطابق سلمان خان، الویرا خان یا خود بیئنگ ہیومن فاؤنڈیشن اس معاہدے کا حصہ نہیں تھے۔ بیان میں یہ بھی واضح کیا گیا تھا کہ سلمان خان صرف  بیئنگ ہیومن  برانڈ کے مالک ہیں اور فاؤنڈیشن کے ٹرسٹی نہیں ہیں۔
اگلا مرحلہ
عدالت نے تمام نامزد افراد کو ۵؍ اکتوبر  کو پیش ہونے کی ہدایت دی ہے۔ فی الحال شکایت میں لگائے گئے الزامات عدالت میں ثابت نہیں ہوئے ہیں  جبکہ سلمان خان کے فریق کا مؤقف برقرار ہے کہ وہ اور ان کی بہن اس معاہدے کا حصہ نہیں تھے، جس پر یہ تنازع قائم ہے۔