بالی ووڈ کے سپر اسٹار شاہ رخ خان کی انتہائی منتظر فلم ’’کنگ‘‘ ۲۰۲۶ء کے کرسمس سیزن میں عالمی فلموں کے درمیان باکس آفس پر سخت مقابلے کے لیے تیار ہے۔

بالی ووڈ کے سپر اسٹار شاہ رخ خان کی انتہائی منتظر فلم ’’کنگ‘‘  ۲۰۲۶ء کے کرسمس سیزن میں عالمی فلموں کے درمیان باکس آفس پر سخت مقابلے کے لیے تیار ہے۔ ہدایت کار سدھارتھ آنند کی یہ ایکشن تھرلر فلم ۲۴؍ دسمبر ۲۰۲۶ء کو سنیما گھروں میں ریلیز ہوگی، یعنی یہ ہالی ووڈ کی دو بڑی فلموں ’’ایونجرز: ڈومز ڈے‘‘ (Avengers: Doomsday) اور’ ’ڈیون: پارٹ تھری‘‘ (Dune: Part Three) کی ریلیز کے ایک ہفتے بعد اور’’جومانجی: اوپن ورلڈ‘‘ (Jumanji: Open World) کی ریلیز سے ایک دن پہلے نمائش کے لیے پیش کی جائے گی۔ اس طرح دسمبر کا آخری ہفتہ فلم بینوں کے لیے خاصا دلچسپ ہونے والا ہے، کیونکہ اس دوران بالی ووڈ اور ہالی ووڈ کی بڑی فلمیں ایک دوسرے کے مقابل ہوں گی۔ 
شاہ رخ خان نے ۲۷؍ اکتوبر کو فلم کا نیا پوسٹر جاری کرتے ہوئے اس کی ریلیز کی تاریخ کی تصدیق کی تھی۔ اس سے قبل فلم کی ریلیز ملتوی ہونے اور ۲۰۲۷ء تک آگے بڑھائے جانے کی قیاس آرائیاں کی جارہی تھیں، تاہم اداکار نے واضح کردیا کہ فلم طے شدہ پروگرام کے مطابق ۲۴؍ دسمبر ۲۰۲۶ء کو سنیما گھروں میں آئے گی۔ فلم کے پوسٹر میں شاہ رخ خان سفید اور سرمئی بالوں کے ساتھ ہاتھ میں پستول لیے نظر آرہے ہیں، جبکہ ان کے ہونٹوں میں گلاب کا پھول دکھائی دیتا ہے۔ پوسٹر کے ساتھ اداکار نے اپنے کردار کے حوالے سے ایک دل چسپ جملہ بھی شیئر کیا، جس نے مداحوں میں فلم کے بارے میں تجسس مزید بڑھا دیا ہے۔ 

یہ بھی پڑھئے:فلم ’’کنگ‘‘ کا پہلا گیت ’تو مل جائے‘ ریلیز، مداحوں کو ’پٹھان‘ اور ’جوان‘ کی یاد تازہ ہوگئی

’’کنگ‘‘ سے ایک ہفتہ قبل ۱۸؍ دسمبر ۲۰۲۶ء کو مارول اسٹوڈیوز کی ’’ایونجرز: ڈومز ڈے‘‘ اور معروف ہدایت کار ڈینس ویلینیو کی ’’ڈیون: پارٹ تھری‘‘ سنیما گھروں میں ریلیز ہوں گی۔ ’’ایونجرز: ڈومز ڈے‘‘ میں رابرٹ ڈاؤنی جونیئر، کرس ایونز، کرس ہیمس ورتھ، پیڈرو پاسکل اور دیگر معروف فنکار شامل ہیں، جبکہ’’ڈیون: پارٹ تھری‘‘ بھی دنیا بھر میں سائنس فکشن فلموں کے شائقین کی توجہ کا مرکز بننے کی توقع ہے۔ دونوں فلموں کی ایک ہی دن ریلیز سے عالمی باکس آفس پر پہلے ہی سخت مقابلے کی صورت حال پیدا ہونے کا امکان ہے۔ 
کرسمس کے موقع پر مقابلہ مزید دلچسپ ہوجائے گا، کیونکہ ڈوین جانسن، کیون ہارٹ، جیک بلیک اور کیرن گیلن کی فلم ’’جومانجی: اوپن ورلڈ‘‘ ۲۵؍ دسمبر ۲۰۲۶ء کو ریلیز ہونے والی ہے۔ اس فلم کی ریلیز بھی پہلے دسمبر کی دوسری تاریخ کے لیے مقرر تھی، لیکن بعد میں اسے تبدیل کرکے ۲۵؍دسمبر کردیا گیا۔ ’’کنگ‘‘ کی ریلیز کے محض ایک دن بعد ایک اور بڑی ہالی ووڈ فلم سینما گھروں میں پہنچے گی۔ 

یہ بھی پڑھئے:بیلن ڈی اور جیتنے کے بعد پہلے ہی میچ میں ہیری کین پنالٹی گنوا بیٹھے

 سدھارتھ آنند کی ہدایت کاری میں بننے والی ’’کنگ‘‘ میں شاہ رخ خان کے ساتھ ان کی بیٹی سہانا خان بھی اہم کردار میں نظر آئیں گی۔ یہ پہلی مرتبہ ہوگا جب باپ بیٹی کی یہ جوڑی ایک ساتھ بڑے پردے پر دکھائی دے گی۔ فلم میں دپیکا پڈوکون، ابھیشیک بچن، رانی مکھرجی، انیل کپور، جیکی شراف، ارشد وارثی، جیدیپ اہلاوت اور دیگر فنکار بھی شامل ہیں۔ فلم کو ریڈ چلیز انٹرٹینمنٹ اور مارفلکس پکچرز تیار کررہے ہیں۔ فلمی تجارت کے ماہرین کے مطابق دسمبر کا یہ ریلیز شیڈول ہندوستانی اور عالمی فلمی بازار کے لیے اہم ثابت ہوسکتا ہے۔ ’’ایونجرز: ڈومز ڈے‘‘ اور’ ’ڈیون: پارٹ تھری‘‘ کو بین الاقوامی سطح پر بڑی توجہ ملنے کی توقع ہے، جبکہ ’’جومانجی: اوپن ورلڈ‘‘ کی اپنی مضبوط شائقین کی تعداد ہے۔ ایسے میں ’’کنگ‘‘ کے لیے سنیما گھروں میں مناسب اسکرینز اور شو ٹائم حاصل کرنا ایک اہم معاملہ ہوگا۔ تاہم شاہ رخ خان کی ہندوستان اور بیرونِ ملک مقبولیت فلم کے لیے بڑا سہارا بن سکتی ہے۔ ان کی سابقہ کامیاب فلموں ’’پٹھان‘‘ اور’ ’جوان‘‘ نے بھی عالمی سطح پر شاندار کاروبار کیا تھا۔ اب دیکھنا یہ ہے کہ کیا ’’کنگ‘‘ ہالی ووڈ کی ان بڑی فلموں کے درمیان اپنی جگہ مضبوط بنانے اور کرسمس کے موقع پر باکس آفس پر کامیابی حاصل کرنے میں کامیاب ہوتی ہے یا نہیں۔