سلمان خان نے ’بگ باس ۲۰‘ کے پہلے ’ویک اینڈ کا وار‘ میں امیدواروں کی کمزور کارکردگی پر برہمی کا اظہار کرتے ہوئے انہیں اپنی صلاحیتیں دکھانے کا موقع ضائع نہ کرنے کی تلقین کی۔ انہوں نے شو کے کاسٹنگ عمل کی تفصیلات بتاتے ہوئے کہا کہ ہزاروں افراد کے انٹرویو کے بعد صرف۱۶؍امیدواروں کا انتخاب کیا جاتا ہے، جنہیں اپنی شخصیت کے ذریعے ناظرین کے دل جیتنے کا موقع ملتا ہے۔

سلمان خان کی میزبانی میں ’بگ باس سیزن۲۰‘ کا آغاز۶؍ ستمبر کو ہوا۔ ناظرین نئی سیزن کے شرکا کو دیکھنے کیلئے خاصے پُرجوش تھے، تاہم ٹیلی ویژن اور فلمی دنیا کے چند معروف چہروں کے علاوہ زیادہ تر نئے نام سامنے آنے پر کئی ناظرین مایوس بھی ہوئے۔ بگ باس کی اس اہم سیزن کو پہلے ہی ہفتے میں بھی خاطر خواہ پذیرائی نہیں مل سکی اور امیدواروں کے انتخاب اور یادگار لمحات کی کمی پر تنقید کا سامنا کرنا پڑا۔ اس صورتحال کے درمیان سیزن کے پہلے ’ویک اینڈ کا وار‘ میں سلمان خان نے گھر کے ارکان کو اپنی کارکردگی بہتر بنانے کا مشورہ دیا اور شو میں امیدواروں کے انتخاب کے عمل پر بھی کھل کر بات کی۔ 
ہفتہ وار ملاقات کے دوران سلمان خان نے اس سال کے امیدواروں کو ملنے والی تنقید کا ذکر کرتے ہوئے کہا، ’’ہم نے سوچا تھا کہ امیدواروں کا انتخاب بہت سوچ سمجھ کر کریں گے، لیکن کبھی کبھی ہمارا انتخاب بھی غلط ثابت ہو جاتا ہے۔ جو لوگ شو میں نظر نہیں آ رہے، ان کا دفاع یہ ہوتا ہے کہ وہ کھیل میں بہت کچھ کر رہے ہیں، لیکن حقیقت یہ ہے کہ آپ جو کچھ کہہ یا کر رہے ہیں، وہ نشر کیے جانے کے قابل نہیں ہے۔ ‘‘اس کے بعد سلمان نے انفرادی طور پر بعض امیدواروں کو بھی مخاطب کیا اور کہا کہ وہ اپنی صلاحیتوں کے مطابق کارکردگی دکھانے میں ناکام رہے ہیں۔ انہوں نے امان سے کہا، ’’امان، تم چاہتے تھے کہ تم میں مرکزی کردار والی توانائی نظر آئے، ہے نا؟ پھر تم ایک کردار ادا کرنے والے فنکار کی طرح کیوں گھوم رہے ہو؟ تم صرف چند لمحوں کے لیے نظر آتے ہو، پھر اس کی ذمہ داری دوسروں پر کیوں ڈالتے ہو؟ کیا کسی نے یہ سوچا کہ اگر وہ ایک خاص مقام تک نہیں پہنچ سکے تو شاید غلطی ان کی اپنی ہے، پوری دنیا کی نہیں ؟‘‘
سلمان نے اودیتی سے بھی کہا، ’’دنیا میں بہت سے خوبصورت لوگ ہیں۔ اودیتی، تمہیں یہاں صرف اپنی خوبصورتی کی وجہ سے نہیں لایا گیا۔ تمہاری شخصیت کی وجہ سے تمہیں منتخب کیا گیا ہے۔ ٹیم تم سے بہت متاثر ہوئی تھی، اسی لیے تم اس شو کا حصہ ہو۔ ‘‘

یہ بھی پڑھئے: عامر خان پہلی بار سپر ہیرو کے کردار میں نظر آسکتے ہیں، بات چیت جاری

سلمان خان نے بگ باس کی کاسٹنگ کے عمل کے بارے میں کیا کہا؟
سلمان خان نے شو میں امیدواروں کے انتخاب کے عمل پر روشنی ڈالتے ہوئے کہا کہ بگ باس کی ٹیم ہزاروں افراد سے ملاقات اور انٹرویو کرتی ہے، جن میں سے صرف۱۶؍ افراد کو منتخب کیا جاتا ہے۔ انہوں نے کہا، ’’ہزاروں لوگ ہیں جن سے بگ باس کی ٹیم ملاقات اور انٹرویو کرتی ہے۔ ان میں سے آپ۱۶؍ افراد کو منتخب کیا گیا ہے۔ مختلف شعبوں سے تعلق رکھنے والی شخصیات کو منتخب کرنے میں تقریباً آٹھ ماہ لگتے ہیں۔ ‘‘انہوں نے مزید کہا، ’’مثلاً بہت سے لوگ اس فارمیٹ میں اسکاؤٹ او پی کو جانتے ہیں، لیکن اب دوسرے لوگ بھی اسے جانیں گے۔ روہد کا تعلق آسٹریا سے ہے، اب لوگ اسے بھی جانیں گے۔ ہم نے مختلف شعبہ ہائے زندگی سے لوگوں کو منتخب کیا ہے۔ جب آپ لوگ یہاں آئے تو لوگوں نے سوال کیا کہ یہ کیسی کاسٹنگ ہے، لیکن ایک ہفتے کے بعد سب لوگ کچھ کرداروں کو پسند کرنے لگے۔ کچھ لوگوں نے پہلے ہی ہفتے میں اپنے بارے میں بننے والے منفی تاثر کو تبدیل کرنے میں کامیابی حاصل کی۔ باقی لوگوں کو بھی ایسا ہی کرنا چاہیے۔ ‘‘
سلمان نے رِہیتی کو مخاطب کرتے ہوئے کہا، ’’اس وقت تم گھر میں ایک ایسے پتھر کی طرح ہو جس پر جلد کائی جم جائے گی۔ ‘‘ روہد سے انہوں نے کہا، ’’تم یہاں لوگوں کے دل جیتنے آئے تھے، لیکن میں نے تمہیں دو تین اقساط میں بھی نہیں دیکھا۔ تمہیں ایلی اورام یا نتالیہ جانوژیک کی طرح زبان کی رکاوٹ کا بھی سامنا نہیں ہے۔ ‘‘سلمان نے بگ باس کی روایت کا ذکر کرتے ہوئے کہا کہ اس شو میں شامل ہونے والا ہر شخص ضروری نہیں کہ پہلے سے اسٹار ہو۔ لوگ اپنی شخصیت کی بنیاد پر یہاں آتے ہیں۔ انہوں نے کہا کہ ایسے بہت سے لوگوں کے لیے بھی بگ باس کے گھر میں آنے کا موقع موجود ہے جو معروف شخصیات نہیں ہیں۔ وہ یہاں اپنی صلاحیتوں کا مظاہرہ کرکے شو سے اسٹار بن کر باہر نکل سکتے ہیں۔ سلمان نے آخر میں امیدواروں سے کہا، ’’اب یہاں سے آپ لوگوں کی اصل شخصیت سامنے آنا شروع ہوگی۔ میں یہاں آپ لوگوں کا فیصلہ کرنے نہیں آیا۔ میں صرف اپنی رائے کا اظہار کروں گا، لیکن میں چاہتا ہوں کہ آپ سب اس موقع سے فائدہ اٹھائیں، نہ کہ کسی موقع کے آنے کا انتظار کرتے رہیں۔ ‘‘
’بگ باس ۲۰؍میں ماہی وج، آصف خان، امرپالی دوبے، امان گاندھی، کینیکا مان، اسکاؤٹ او پی، ینگ ڈی ایس اے، روہد خان، اریشفا خان، رِہیتی تیواری، ایشا رکھی، اودیتی سنگھ، قاضی توقیر، لو گِل، میری کوم اور کشال تنور عرف گُلّو شامل ہیں۔ بگ باس کا نیا سیزن ہر پیر سے اتوار رات۹؍ بجے جیو ہاٹ اسٹار پر نشر ہوتا ہے، جبکہ کلرز ٹی وی پر اس کی نشریات رات ساڑھے ۱۰؍بجے ہوتی ہیں۔