بگ باس۲۰؍ کے پہلے ’ویک اینڈ کا وار‘ میں سلمان خان نے گلوکار قاضی توقیر کی شاندار کارکردگی اور دو دہائیوں پر محیط جدوجہد کو سراہا۔ سلمان خان نے قاضی کی ذہنی مضبوطی اور مشکل حالات میں ہمت نہ ہارنے کی تعریف کرتے ہوئے دیگر شرکا کو بھی ان سے سبق سیکھنے کا مشورہ دیا۔

اگرچہ بگ باس ۲۰؍ کے بنانے والوں کو اس سیزن میں بعض ناظرین کی جانب سے کمزور کاسٹ کے حوالے سے تنقید کا سامنا ہے، تاہم گلوکار قاضی توقیر شو کے سب سے زیادہ زیرِ بحث رہنے والے شرکا میں شامل ہوگئے ہیں۔ سیزن کے پہلے ’ویک اینڈ کا وار‘ میں میزبان سلمان خان نے بھی قاضی توقیر کی تعریف کی اور ان کے سفر کو سراہا۔ سنیچر کو سلمان خان نے گرینڈ پریمیئر کے بعد پہلی مرتبہ گھر میں موجود شرکا سے بات چیت کی۔ انہوں نے بعض شرکا کو اپنی کارکردگی بہتر بنانے کا مشورہ دیا، جبکہ قاضی توقیر کی حوصلہ افزائی کرتے ہوئے ان کے سفر کی تعریف کی۔ 
سلمان خان نے قاضی توقیر کو سراہا
بگ باس۲۰؍ کی تازہ قسط میں سلمان خان نے گھر میں پہلے ہفتے کے دوران قاضی توقیر کی کارکردگی کی تعریف کرتے ہوئے کہا، ’’میں آپ سب کو ایک بات بتانا چاہتا ہوں، اس گھر میں چاہے کتنے ہی ستارے موجود ہوں، لیکن آپ سب کے درمیان صرف ایک راک اسٹار ہے، اور وہ قاضی توقیر ہے۔ قاضی، آپ نے پورا ہفتہ بہت اچھا کھیلا۔ ‘‘ بعد ازاں سلمان خان نے تمام شرکا کو ایکٹیویٹی ایریا میں بلایا اور قاضی توقیر کو مرکزِ نگاہ بناتے ہوئے ان سے گزشتہ دو دہائیوں کے سفر کے بارے میں سوال کیا۔ انہوں نے کہا، ’’مجھے ایک بات بتاؤ، تمہیں زندگی میں اتنی جلدی سب کچھ مل گیا۔ تم راک اسٹار بن گئے، اریجیت سنگھ کے ساتھ شو کیا، شو جیتا۔ اریجیت اس وقت بہت اچھا کر رہے ہیں۔ اب تمہیں یہ پلیٹ فارم ملا ہے، لیکن گزشتہ ۲۰؍ برسوں میں تم نے کیا کیا؟‘‘قاضی نے جواب دیا، ’’میں نے بہت سے لائیو شوز کئے۔ ‘‘سلمان خان نے مزید کہا، ’’جب تم شو میں داخل ہوئے تو لوگ سوچ رہے تھے کہ تم گاتے کیسے ہو، لیکن اب وہ تمہاری تعریف کرتے نہیں تھکتے۔ لوگ تمہارے مزاح اور پرفارمنس کو پسند کر رہے ہیں۔ بعض اوقات زندگی میں کچھ چیزیں بہت جلد مل جاتی ہیں اور پھر اتنی ہی جلدی چھن بھی جاتی ہیں۔ ہالی ووڈ میں جان ٹراولٹا کے پاس ۲۰؍سال تک کام نہیں تھا، لیکن اس نے محنت کرنا نہیں چھوڑا۔ اسی طرح بوبی دیول، جو آج کے بڑے ستاروں میں شمار ہوتے ہیں، ایک مشکل دور سے گزرے، لیکن انہوں نے بھی ہمت نہیں ہاری۔ ہر شخص کی زندگی میں اتار چڑھاؤ آتے ہیں اور مشکل وقت میں آپ کو دس گنا زیادہ محنت کرنی پڑتی ہے۔ ‘‘

یہ بھی پڑھئے: اکشے کمار سے محبت برقرار، مداح نے فینڈم سے کنارہ کشی اختیار کرلی

میزبان نے مزید کہا، ’’برے وقت کی ایک اچھی بات یہ ہے کہ وہ ختم ہوجاتا ہے، اور جب آپ اچھے وقت کو معمولی سمجھنے لگتے ہیں، جیسا کہ میں بھی کبھی کبھی کرتا ہوں، تو وہ بھی ختم ہوجاتا ہے۔ میں جانتا ہوں کہ برے وقت میں محنت کرتے رہنا چاہیے، جیسا کہ قاضی توقیر نے کیا۔ انہوں نے بہت کچھ حاصل کیا، پھر وہ سب کھو دیا، لیکن انہوں نے کام کرنا نہیں چھوڑا۔ ‘‘سلمان خان نے قاضی کی جدوجہد کو سراہتے ہوئے کہا کہ مشکلات اور چیلنجز کے باوجود ذہنی طور پر مضبوط رہنا سب سے بڑی کامیابی تھی، جسے بہت سے لوگ برقرار نہیں رکھ پاتے۔ انہوں نے کہا کہ لوگوں کو قاضی توقیر سے یہ سبق سیکھنا چاہیے کہ مشکل حالات میں بھی ہمت نہ ہاریں اور محنت جاری رکھیں۔