Updated: November 29, 2025, 1:00 PM IST
| Ranchi
روہت شرما اور وراٹ کوہلی ایک ساتھ سب سے زیادہ بین الاقوامی میچ کھیلنے والی جوڑی بن جائےگی،کوہلی توجہ کا مرکز رہیں گے۔
وراٹ کوہلی اور روہت شرما۔ تصویر:آئی این این
ہندوستان اور جنوبی افریقہ کے درمیان ۳؍ میچوں کی یکروزہ سیریز کا آغاز ۳۰؍ نومبر سے ہوگا۔ پہلا مقابلہ رانچی میں منعقد ہوگا اور اس میچ کے ساتھ ہی وراٹ کوہلی اور روہت شرما کی جوڑی ایک نئی تاریخ رقم کر دے گی۔ اس مقابلے کے ساتھ ہی روہت شرما اور وراٹ کوہلی ایک ساتھ سب سے زیادہ بین الاقوامی میچ کھیلنے والے ہندوستانی کھلاڑیوں کی جوڑی بن جائےگی۔اس کے ساتھ ہی کوہلی۔ روہت کی جوڑی سچن تینڈولکر اور راہل دراوڑ کا ریکارڈ توڑ دے گی، جنہوں نے ایک ساتھ ۳۹۱؍ بین الاقوامی میچ کھیلے ہیں۔فی الحال روہت۔کوہلی کی جوڑی نے بھی اتنے ہی میچ ایک ساتھ کھیلے ہیں۔ یعنی رانچی کا میچ ان کا ۳۹۲؍واں مشترکہ بین الاقوامی مقابلہ ہوگا۔
وراٹ کوہلی توجہ کا مرکز ہوںگے
ہندوستان اور جنوبی افریقہ کے درمیان ۳۰؍ نومبر کو جے ایس سی اے کرکٹ اسٹیڈیم میں ہونے والی ۳؍میچوں کی سیریز کے پہلے میچ میں وراٹ کوہلی توجہ کا مرکز ہوں گے۔ اس کی بنیادی وجہ یہ ہے کہ وہ مہندر سنگھ دھونی کے پسندیدہ اس گراؤنڈ سے محبت کرتے ہیں، جہاں بلے سے مسلسل رن بنتے ہیں۔ کرکٹ شائقین ایک بار پھر ان سے بڑی اننگز کی توقع کر رہے ہیں۔
وراٹ کوہلی اس گراؤنڈ پر اب تک ۵؍ میچ کھیل چکے ہیں۔ انہوں نے ۴؍ اننگز میں بیٹنگ کرتے ہوئے ۱۹۲؍کے اوسط سے ۳۸۴؍رن بنائے جن میں ۲؍ سنچریاں اور ایک نصف سنچری شامل ہے۔ کوہلی نے اس گراؤنڈ پر ۱۵؍نومبر ۲۰۱۴ء کو سری لنکا کے خلاف ۱۳۹؍رن بنائے، جو اس گراؤنڈ پر کسی بھی ہندوستانی بلے باز کا مشترکہ طور پر سب سے زیادہ اسکور ہے۔ اس کے علاوہ انہوں نے ۸؍مارچ ۲۰۱۹ء کو آسٹریلیا کے خلاف ۱۲۳؍رن بنائے تھے۔ غیر ملکی کھلاڑیوں میں آسٹریلیا کے اینڈریو میتھیوز نے ۲۰۱۴ء میں ۱۳۹؍رن بنا کر اس گراؤنڈ پر کسی بھی غیر ملکی کھلاڑی کا سب سے زیادہ اسکور بنایا ہے۔
روہت شرما سے اچھی بلے بازی کی امید
دوسری طرف روہت شرما کا بلا اس گراؤنڈ پر خاموش رہا۔ سابق ہندوستانی کپتان نے یہاں ۴؍ میچ کھیلے ہیں اور صرف ۴۳؍رن بنائے ہیں جن میں ان کا سب سے زیادہ اسکور ۱۴؍ہے۔ اس بار تماشائیوں کو ان سے بڑی اننگز کی امید ہوگی۔ روہت کے ساتھ آل راؤنڈر رویندر جڈیجہ نے بھی بلے سے اچھی کارکردگی کا مظاہرہ نہیں کیا ہے۔ انہوں نے ۳؍ میچوں میں صرف ۲۴؍رن بنائے ہیں جبکہ بولنگ میں انہوں نے ۶؍ وکٹ حاصل کئے ہیں۔
جے ایس سی اے اسٹیڈیم میں ہندوستان کی طرف سے اب تک ۳؍ سنچریاں اسکور کی گئی ہیں جن میں وراٹ کوہلی نے ۲؍ اور شریس ایئر نے ایک سنچری بنائی ہے۔ شریس نے ۹؍اکتوبر ۲۰۲۲ء کو جنوبی افریقہ کے خلاف ۱۱۳؍رنوں کی ناقابل شکست اننگز کھیلی تھی۔ وہیں ۳۰؍نومبر سے شروع ہونے والے ونڈے میچ کے لئے دونوں ٹیموں کے کھلاڑیوں نے جمعہ کو جم کر پریکٹس کی۔