مراٹھی فلم ساز اور اداکار پروین ترڈے نے حالیہ دنوں میں انکشاف کیا تھا کہ بالی ووڈ سپر اسٹار شاہ رخ خان نے ان کی فلم ’’دیول بینڈ ۲‘‘کیلئے ۴۲؍ لاکھ روپے کے ڈی سی پی چارجز معاف کروادیئے تھے تاکہ معیاری مراٹھی سنیما کی حوصلہ افزائی کی جا سکے۔ اس انکشاف کے بعد سوشل میڈیا پر مختلف ردعمل سامنے آئے، جس پر ترڈے نے ایک ویڈیو جاری کرتے ہوئے ناقدین اور ٹرولز کو جواب دیا۔

مراٹھی فلم انڈسٹری کے معروف ہدایت کار، مصنف اور اداکار پروین ترڈے ایک بار پھر خبروں میں ہیں۔ چند روز قبل انہوں نے ایک انٹرویو میں انکشاف کیا تھا کہ بالی ووڈ کے سپر اسٹار شاہ رخ خان نے ان کی فلم ’’دیول بینڈ ۲‘‘ کی مدد کرتے ہوئے ۴۲؍  لاکھ روپے کے ڈی سی پی (ڈجیٹل سنیما پیکیج) اخراجات معاف کر کروادیئے تھے۔ ترڈے کے مطابق جب شاہ رخ خان کو معلوم ہوا کہ فلم کی ٹیم کے لیے یہ رقم ادا کرنا مشکل ہے تو انہوں نے مالی فائدہ حاصل کرنے کے بجائے مراٹھی سنیما کی حوصلہ افزائی کو ترجیح دی۔ اس انکشاف کے بعد سوشل میڈیا پر ملا جلا ردعمل سامنے آیا، جس میں بعض صارفین نے شاہ رخ کی تعریف کی جبکہ کچھ حلقوں نے اس معاملے پر تنقید بھی کی۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Planet Marathi प्लॅनेट मराठी (@planet.marathi)

اب پروین ترڈے نے انسٹاگرام پر ایک ویڈیو جاری کرتے ہوئے ان تنقیدوں کا جواب دیا ہے۔ ویڈیو میں انہوں نے کہا کہ وہ اس وقت پورے مہاراشٹر میں سفر کر رہے ہیں، لیکن کسی نے خاص توجہ نہیں دی۔ تاہم جیسے ہی انہوں نے ایک بڑے بالی ووڈ اسٹار کا نام لیا، مختلف حلقوں میں بحث شروع ہو گئی۔ انہوں نے کہا کہ ’’میں پورے مہاراشٹر میں گھوم رہا ہوں، لیکن کسی نے اس پر توجہ نہیں دی۔ جیسے ہی میں نے ایک بالی ووڈ سپر اسٹار کا نام لیا، سب کے قلم چلنے لگے۔ کچھ لوگوں نے پہلے بھی اس فلم کو روکنے کی پوری کوشش کی تھی لیکن کامیاب نہیں ہو سکے، اور اب وہ بالواسطہ طریقوں سے اس کا مقابلہ کرنے کی کوشش کر رہے ہیں۔‘‘

یہ بھی پڑھئے: ’’کاک ٹیل ۲‘‘ کا پہلے ہفتے ۷۶؍ کروڑ کا کاروبار

ترڈے نے اس موقع پر مراٹھی شاعر وندا کرندیکر کی ایک نظم کا حوالہ بھی دیا، جس کا مفہوم یہ تھا کہ کسی شخص کو اس کا جائز حق اور کریڈٹ دینے سے کسی کی اہمیت کم نہیں ہوتی بلکہ یہ انصاف اور دیانت داری کی علامت ہے۔ انہوں نے مزید کہا کہ اگر کسی نے مشکل وقت میں آپ کی مدد کی ہو تو اس کا اعتراف کھلے دل سے کرنا چاہیے۔ ان کے مطابق مدد کرنے والے کی شہرت یا حیثیت اہم نہیں ہوتی بلکہ اس کا عمل اہم ہوتا ہے۔ پروین ترڈے نے کہا کہ ’’چاہے وہ پیتیا ہو یا شاہ رخ خان، اس سے کوئی فرق نہیں پڑتا۔ اگر کسی نے آپ کی مدد کی ہے تو آپ کو عوامی طور پر اس کا شکریہ ادا کرنا چاہیے اور اس کی تعریف کرنی چاہیے۔‘‘

یہ بھی پڑھئے: یش چوپڑا نےفلم’نوری‘ فلاپ سمجھ کر بنائی تھی لیکن وہ سپرہٹ ثابت ہوئی

’’دیول بینڈ ۲‘‘ دراصل ۲۰۱۵ء میں ریلیز ہونے والی کامیاب مراٹھی فلم ’’دیول بینڈ‘‘ کا سیکوئل ہے۔ فلم میں معروف اداکار موہن جوشی نے مرکزی کردار ادا کیا ہے۔ ریلیز کے بعد فلم نے باکس آفس پر غیر معمولی کامیابی حاصل کی اور محدود بجٹ کے باوجود شاندار کاروبار کیا۔ اطلاعات کے مطابق تقریباً ۸؍ سے ۱۰؍ کروڑ روپے کے بجٹ سے تیار ہونے والی اس فلم نے دنیا بھر میں ۸۴؍ کروڑ روپے سے زائد کا کاروبار کیا ہے۔ اس کامیابی کے بعد ’’دیول بینڈ ۲‘‘ مراٹھی سنیما کی تاریخ کی سب سے زیادہ کمائی کرنے والی فلموں میں شامل ہو گئی ہے اور اس وقت راجہ شیواجی، سیرت اور بیپن بھری دیوا کے بعد چوتھے نمبر پر شمار کی جا رہی ہے۔ فلم کی غیر متوقع کامیابی اور شاہ رخ خان کی حمایت سے متعلق انکشاف نے نہ صرف مراٹھی فلم انڈسٹری میں گفتگو کو جنم دیا ہے بلکہ بالی ووڈ اور علاقائی سنیما کے تعلقات پر بھی نئی بحث چھیڑ دی ہے۔ ترڈے کے حالیہ بیان سے واضح ہوتا ہے کہ وہ اس معاملے کو محض ایک احسان کے اعتراف کے طور پر دیکھتے ہیں اور ان کے نزدیک مدد کرنے والے کا شکریہ ادا کرنا ایک فطری اور ضروری عمل ہے۔