ایس ایس راجامولی کو پیرس کی سینیماتیک فرانسیز (Cinémathèque Française) میں مستقل مقام سے نوازا گیا ہے۔ فلمساز نے سوشل میڈیا کے ذریعے اپنی خوشی اور تشکر کا اظہار کیا اور اس موقع کی ایک خاص یادگار جھلک بھی شیئر کی۔

حال ہی میں ایس ایس راجامولی کو پیرس کی سینیماتیک فرانسیز میں اعزاز سے نوازا گیا، جہاں دنیا کے معروف ترین فلمی آرکائیوز میں ان کے کام کو مستقل جگہ دی گئی۔ اس خصوصی اعزاز کے ساتھ ایک ایسا یادگار لمحہ بھی آیا جس نے راجامولی کو بے حد متاثر کیا۔ تقریب میں آسکر ایوارڈ یافتہ معروف فلم ساز کوسٹا گاوراس کی موجودگی خاص توجہ کا مرکز رہی۔ انہوں نے تقریباً آٹھ گھنٹے تک راجامولی کی فلمیں دیکھیں اور ان کی ماسٹر کلاس میں بھی شرکت کی۔

یہ بھی پڑھئے:جعفر جیکسن کی فلم ’’مائیکل‘‘ تاریخ کی سب سے زیادہ کمائی کرنے والی بایو پک بنی

ایس ایس راجامولی کا جذباتی پیغام
ایکس (سابقہ ٹویٹر) پر اپنے جذبات کا اظہار کرتے ہوئے راجامولی نے لکھا’’ پیرس میں میری موجودگی اور میری فلموں کی نمائش ہی میرے لیے ایک بہت بڑا اعزاز ہے، لیکن ایک ایسی خوشگوار حیرت بھی ہوئی  جس کی میں نے کبھی توقع نہیں کی تھی۔ اس احساس کو الفاظ میں مکمل طور پر بیان کرنا ممکن نہیں۔ دنیا کے عظیم ترین فلمی اداروں میں سے ایک کے ہالز میں، جو عظیم ہنری لانگلوا سے منسوب ہے، مستقل جگہ ملنا ایک ایسا اعزاز ہے جسے میں زندگی بھر یاد رکھوں گا۔‘‘
انہوں نے ۹۳؍ سالہ یونانی-فرانسیسی ہدایت کار کوسٹا گاوراس کا شکریہ ادا کرتے ہوئے کہا’’میں لیجنڈری   کوسٹا گاوراس اور سینیماتیک فرانسیز کے پورے خاندان کا تہہ دل سے شکر گزار ہوں کہ انہوں نے مجھے یہ اعزاز دیا اور ہندوستانی سنیما کو اتنی محبت اور گرمجوشی سے قبول کیا۔‘‘

یہ بھی پڑھئے:جعفر جیکسن کی فلم ’’مائیکل‘‘ تاریخ کی سب سے زیادہ کمائی کرنے والی بایو پک بنی

سینیماتیک فرانسیز کے بارے میں
 سینیماتیک فرانسیز کی بنیاد ہنری لانگلوا نے ۱۹۳۶ء میں رکھی تھی  اور اسے دنیا کے سب سے بااثر فلمی اداروں میں شمار کیا جاتا ہے۔ اس موقع پر راجامولی کی مشہور فلموں آر آر آر (۲۰۲۲ء)  ، ایگا (۲۰۱۲ء) اور باہوبلی: دی بِگننگ (۲۰۱۵ء) کی خصوصی نمائش بھی کی گئی۔