۱۱؍ سال قبل دیے گئے ایک انٹرویو میں نانا پاٹیکر نے اپنے کرکٹ سے لگاؤ کا ذکر کرتے ہوئے بتایا تھا کہ وہ بچپن میں اچھے کرکٹر تھے اور آف اسپن گیند بازی کیا کرتے تھے۔ وہ ممبئی کے مشہور شیواجی پارک میں مشق کرنے والے بلے بازوں کو گیندیں کراتے تھے۔

بالی ووڈ کے معروف اور باصلاحیت اداکار نانا پاٹیکر ۷۵؍ برس کی عمر میں دنیا سے رخصت ہوگئے۔ نانا پاٹیکر کو گوا میں واقع اپنے گھر پر اچانک شدید قلبی دورہ پڑا۔ طبی ٹیم فوری طور پر ان کی رہائش گاہ پہنچی، جہاں وہ بے ہوش حالت میں پائے گئے تھے۔ بعد ازاں انہیں منی پال اسپتال لے جایا گیا، جہاں ڈاکٹروں نے صبح تقریباً ۵؍ بجکر ۲۰؍ منٹ پر انہیں مردہ قرار دے دیا۔ اسپتال کے مطابق انہیں بچانے کی بھرپور کوشش کی گئی، تاہم وہ جانبر نہ ہوسکے۔
نانا پاٹیکر نے ہندوستانی سنیما میں تقریباً پانچ دہائیوں پر محیط اپنے شاندار سفر کے دوران ایسے کردار ادا کیے جو آج بھی ناظرین کے ذہنوں میں زندہ ہیں۔ ان کی منفرد اداکاری، طاقتور مکالمہ ادائیگی اور کرداروں میں حقیقت کا رنگ بھرنے کی صلاحیت نے انہیں ہندی اور مراٹھی سنیما کا ایک نمایاں نام بنا دیا تھا۔ تاہم بہت کم لوگ جانتے ہیں کہ اداکاری سے پہلے نانا پاٹیکر کا اصل شوق  کرکٹ  تھا۔

یہ بھی پڑھئے:کرسٹیانو رونالڈو نے لیونل میسی کو ’گلے لگنے‘ کا پیغام بھیجا

تقریباً ۱۱؍ سال قبل دیے گئے ایک انٹرویو میں نانا پاٹیکر نے اپنے کرکٹ سے لگاؤ کا ذکر کرتے ہوئے بتایا تھا کہ وہ بچپن میں اچھے کرکٹر تھے اور آف اسپن گیند بازی کیا کرتے تھے۔ وہ ممبئی کے مشہور شیواجی پارک میں مشق کرنے والے بلے بازوں کو گیندیں کراتے تھے۔ ان کے مطابق حالات سازگار نہ ہونے اور مالی مشکلات کی وجہ سے وہ کرکٹ میں اپنے کریئر کو آگے نہیں بڑھا سکے۔
نانا پاٹیکر نے بتایا تھا کہ ہندوستان اور پاکستان کے درمیان کرکٹ میچ ان کے لیے خاص اہمیت رکھتے تھے۔ ان کا کہنا تھا کہ جب ہندوستان  اور پاکستان کا مقابلہ ہوتا تھا تو وہ ٹی وی کے سامنے سے ہٹنا پسند نہیں کرتے تھے۔ کرکٹ کے لیے ان کا جوش عمر بڑھنے کے باوجود کم نہیں ہوا تھا۔ انہوں نے یہاں تک کہا تھا کہ اگر وہ تقریباً ۱۰؍ دن مشق کرلیں تو آج بھی اچھی گیند بازی کرسکتے ہیں۔ نانا پاٹیکر کے کرکٹ سے جنون کا سب سے دلچسپ پہلو ان کی وراٹ کوہلی کے لیے بے حد پسندیدگی تھی۔ ایک پرانے انٹرویو میں انہوں نے وراٹ کوہلی کو اپنے پسندیدہ کرکٹرز میں شمار کرتے ہوئے ایسی بات کہی تھی جو اب ان کے انتقال کے بعد دوبارہ سوشل میڈیا پر تیزی سے وائرل ہوگئی ہے۔
نانا پاٹیکر نے کہا تھا کہ وراٹ کوہلی ان کے پسندیدہ کھلاڑی ہیں اور اگر وراٹ جلد آؤٹ ہوجائیں تو ان کا کھانا کھانے کا بھی دل نہیں کرتا۔ ان کا یہ بے ساختہ بیان اس بات کی عکاسی کرتا تھا کہ وہ صرف ایک فلمی شخصیت ہی نہیں بلکہ ہندوستانی کرکٹ کے بھی انتہائی پرجوش مداح تھے۔ نانا پاٹیکر کی یہ پرانی ویڈیو ان کے انتقال کے بعد دوبارہ منظر عام پر آئی اور شائقین نے اسے بڑے پیمانے پر شیئر کیا۔

یہ بھی پڑھئے:شاہ رخ خان نے نانا پاٹیکر کو یاد، کہا: ’’ہیرو بننے کی کوشش میں اداکار کو مت کھونا‘‘

نانا پاٹیکر کے انتقال پر کرکٹ کی دنیا سے بھی تعزیتی پیغامات سامنے آئے۔ وراٹ کوہلی نے انہیں بھارتی سنیما کا حقیقی لیجنڈ قرار دیتے ہوئے خراج عقیدت پیش کیا اور کہا کہ ان کا کام اور ورثہ آنے والی نسلوں تک زندہ رہے گا۔ نانا پاٹیکر کا اصل نام وشواناتھ پاٹیکر تھا۔ یکم جنوری  ۱۹۵۱ء کو مہاراشٹر کے رائے گڑھ ضلع کے مروڈ میں پیدا ہونے والے نانا پاٹیکر نے اپنے فنی سفر کا آغاز تھیٹر سے کیا اور بعد میں فلمی دنیا کا رخ کیا۔