انگلینڈ کے سابق کپتان اور عالمی فٹ بال آئیکون David Beckham کو اس ماہ ہالی ووڈ واک آف فیم میں اسٹار سے نوازا جائے گا۔ لاس اینجلس میں ۱۲؍ جون کو منعقد ہونے والی تقریب میں بیکھم کو کھیل اور تفریح کے شعبوں میں ان کی غیر معمولی خدمات کے اعتراف میں یہ اعزاز دیا جائے گا۔ یہ اعزاز ایسے وقت میں دیا جا رہا ہے جب امریکہ، کنیڈا اور میکسیکو فیفا ورلڈ کپ ۲۰۲۶ء کی میزبانی کر رہے ہیں۔

فٹ بال کی دنیا کے مشہور ترین ناموں میں شمار ہونے والے انگلینڈ کے سابق کپتان ڈیوڈ بیکھم اپنے شاندار کریئر میں ایک اور تاریخی سنگ میل عبور کرنے جا رہے ہیں۔ ہالی ووڈ چیمبر آف کامرس نے اعلان کیا ہے کہ بیکھم کو ۱۲؍ جون کو لاس اینجلس میں ہالی ووڈ واک آف فیم کا ستارہ عطا کیا جائے گا۔ یہ تقریب ہالی ووڈ بلیوارڈ پر منعقد ہوگی اور بیکھم کو اسپورٹس انٹرٹینمنٹ کے زمرے میں یہ اعزاز دیا جائے گا۔ اس موقع کی اہمیت اس لیے بھی بڑھ گئی ہے کہ یہ تقریب فیفا ورلڈ کپ ۲۰۲۶ء کے ابتدائی مرحلے کے دوران منعقد ہو رہی ہے، جس کی میزبانی مشترکہ طور پر امریکہ، کنیڈا اور میکسیکو کر رہے ہیں۔

Arise, Sir David Beckham. ✨

This morning at Windsor Castle, The King presented Sir David Beckham with a Knighthood for Services to Sport and to Charity. pic.twitter.com/BpRQJ1lIJG

— The Royal Family (@RoyalFamily) November 4, 2025

رپورٹس کے مطابق بیکھم کے اسٹار کی نقاب کشائی لاس اینجلس میں ہوگی، جبکہ اسی روز کیلیفورنیا کے انگل ووڈ میں امریکہ اور پیراگوئے کے درمیان ورلڈ کپ کا میچ بھی کھیلا جائے گا۔ ہالی ووڈ چیمبر آف کامرس کی پروڈیوسر اینا مارٹینیز نے اس موقع پر کہا کہ امریکہ میں فٹ بال کے فروغ میں ڈیوڈ بیکھم کا کردار غیر معمولی رہا ہے۔ ان کے مطابق بیکھم نے نہ صرف کھیل بلکہ تفریح اور عالمی ثقافت پر بھی گہرا اثر چھوڑا ہے، اسی لیے انہیں واک آف فیم کا ستارہ دینا ایک انتہائی موزوں فیصلہ ہے۔ واضح رہے کہ ۱۹۹۰ء کی دہائی میں ڈیوڈ بیکھم مانچسٹر یونائٹیڈ کے ساتھ اپنی پیشہ ورانہ زندگی کا آغاز کیا اور جلد ہی دنیا کے مقبول ترین فٹ بالرز میں شامل ہو گئے۔ اپنے کریئر کے دوران انہوں نے متعدد قومی اور بین الاقوامی اعزازات حاصل کیے اور انگلینڈ کی قومی ٹیم کی قیادت بھی کی۔

یہ بھی پڑھئے: رنویـر سنگھ تنازع پر کنگنا نے کہا: جب حیثیت بڑھتی ہے تو دشمن بھی بڑھتے ہیں

کھیل کے میدان سے باہر بھی بیکھم نے اپنی شناخت قائم کی۔ ۲۰۱۹ء میں انہوں نے پروڈکشن کمپنی Studio 99 کی مشترکہ بنیاد رکھی، جبکہ ان کی عالمی شہرت میں اس وقت مزید اضافہ ہوا جب انہوں نے سابق پاپ اسٹار اور وکٹوریہ بیکھم سے شادی کی۔ خیال رہے کہ واک آف فیم کا اعزاز بیکھم کو حال ہی میں برطانوی شاہی اعزاز نائٹ ہڈ ملنے کے بعد دیا جا رہا ہے، جو انہیں شاہ چارلس سوم کی جانب سے عطا کیا گیا تھا۔ نائٹ ہڈ کے بعد ہالی ووڈ واک آف فیم کا ستارہ ان کے طویل اور کامیاب کریئر میں ایک اور نمایاں اضافہ سمجھا جا رہا ہے۔ فٹ بال، کاروبار، میڈیا اور تفریح کے شعبوں میں بیکھم کی مسلسل کامیابیوں نے انہیں دنیا کی سب سے زیادہ بااثر کھیلوں کی شخصیات میں شامل کر دیا ہے، اور واک آف فیم کا یہ اعزاز ان کی اسی عالمی مقبولیت کا اعتراف ہے۔