بالی ووڈ اداکارہ جیکلین فرنانڈیز کی مشکلات ایک بار پھر بڑھتی ہوئی نظر آ رہی ہیں۔ سُکیش چندرشیکھر سے منسلک ۲۰۰؍ کروڑ روپے کی مبینہ وصولی اور منی لانڈرنگ کے معاملے میں اب جیکلین کو مکوکا (مہاراشٹر کنٹرول آف آرگنائزڈ کرائم ایکٹ) کے تحت بھی ملزم بنانے کا مطالبہ کیا گیا ہے۔

بالی ووڈ اداکارہ جیکلین فرنانڈیز کی مشکلات ایک بار پھر بڑھتی ہوئی نظر آ رہی ہیں۔ سُکیش چندرشیکھر سے منسلک ۲۰۰؍ کروڑ روپے کی مبینہ وصولی اور منی لانڈرنگ کے معاملے میں اب جیکلین کو  مکوکا (مہاراشٹر کنٹرول آف آرگنائزڈ کرائم ایکٹ)  کے تحت بھی ملزم بنانے کا مطالبہ کیا گیا ہے۔ اس سلسلے میں دہلی کی راؤز ایونیو عدالت میں درخواست دائر کی گئی ہے۔ عدالت نے درخواست پر دہلی پولیس سے جواب طلب کرتے ہوئے معاملے کی اگلی سماعت ۱۵؍ ستمبر  کو مقرر کردی ہے۔

یہ بھی پڑھئے:اب خوف کو پیچھے چھوڑنے کا وقت ہے، ایشا رِکھی نے ’’بگ باس ۲۰‘‘ میں آنے کی وجہ بتائی

واضح رہے کہ ۲۰۰؍ کروڑ روپے کے منی لانڈرنگ معاملے میں جیکلین پہلے ہی ملزم ہیں۔ مئی ۲۰۲۶ء میں دہلی کی عدالت نے ان کے خلاف الزامات طے کرنے کا حکم دیا تھا۔ دوسری جانب اسی معاملے سے منسلک جبری وصولی اور مکوکا کیس میں سُکیش چندرشیکھر اور دیگر ملزمان کے خلاف الزامات طے کیے گئے تھے۔ تاہم اس وقت دستیاب عدالتی رپورٹس میں جیکلین کو اس معاملے میں ملزم نہیں بتایا گیا تھا۔
اب دائر کی گئی نئی درخواست میں مطالبہ کیا گیا ہے کہ جیکلین فرنانڈیز کو بھی مکوکا کیس میں ملزم بنایا جائے۔ عدالت نے اس درخواست پر دہلی پولیس سے جواب طلب کیا ہے۔ پولیس کے جواب کی بنیاد پر عدالت یہ فیصلہ کرے گی کہ جیکلین کو اس معاملے میں ملزم بنانے کے مطالبے پر مزید کارروائی کی ضرورت بنتی ہے یا نہیں۔ یہ پورا معاملہ سُکیش چندرشیکھر پر عائد  ۲۰۰ ؍ کروڑ روپے کی مبینہ جبری وصولی  کے الزام سے شروع ہوا تھا۔ دہلی پولیس کے مطابق، جیل میں قید سُکیش نے رین بیکسی کے سابق پروموٹر شیوندر سنگھ کی اہلیہ ادیتی سنگھ سے مبینہ طور پر خود کو ایک بڑے سرکاری افسر کے طور پر پیش کیا تھا۔
الزام ہے کہ سُکیش نے ادیتی سنگھ کو ان کے شوہر کو جیل سے باہر نکلوانے اور قانونی مدد فراہم کرنے کا یقین دلایا اور اس کے بدلے بڑی رقم کا مطالبہ کیا۔ اسی شکایت کے بعد دہلی پولیس نے مقدمہ درج کیا اور تحقیقات شروع کیں۔ تحقیقات کے دوران یہ بات سامنے آئی کہ سُکیش جیل کے اندر سے ہی مبینہ طور پر ایک منظم نیٹ ورک چلا رہا تھا اور اس نیٹ ورک کے ذریعے رقم وصول کی جا رہی تھی۔ پولیس کی تحقیقات میں اس کے ساتھ کئی دیگر افراد کے نام بھی سامنے آئے۔

یہ بھی پڑھئے:دلیپ ٹرافی فائنل:ایشان کشن ٹرپل سنچری سے محروم ، ایسٹ زون نے ۷۰۸؍ رنز بنائے

بعد ازاں اس معاملے میں مکوکا کی دفعات بھی شامل کی گئیں۔ دہلی پولیس کی تحقیقات میں دعویٰ کیا گیا کہ سُکیش اور اس کے ساتھیوں نے مل کر ایک منظم جرائم کے سنڈیکیٹ کی طرح کام کیا۔مبینہ جرم سے حاصل ہونے والی رقم کے سلسلے میں انفورسمنٹ ڈائریکٹوریٹ (ای ڈی)  نے الگ سے منی لانڈرنگ کی تحقیقات شروع کیں۔ ای ڈی کا الزام ہے کہ مبینہ جرم سے حاصل رقم کا استعمال مہنگی اشیا اور دیگر چیزوں کی خریداری کے لیے کیا گیا۔
اسی تحقیقات کے دوران جیکلین فرنانڈیز کا نام بھی سامنے آیا۔ ای ڈی کے مطابق، سُکیش نے جیکلین کو مہنگے تحائف اور دیگر سہولتیں فراہم کی تھیں اور اداکارہ کو مبینہ جرم سے حاصل رقم سے منسلک فوائد حاصل ہوئے تھے۔تاہم جیکلین فرنانڈیز مسلسل یہ کہتی رہی ہیں کہ انہیں سُکیش کی مجرمانہ سرگرمیوں کے بارے میں کوئی علم نہیں تھا اور وہ خود بھی اس کے جھانسے کا شکار ہوئی تھیں۔