آدتیہ دھر کی فلم ’’دھرندھر: دی ریوینج‘‘ نے باکس آفس پر غیر معمولی کارکردگی دکھاتے ہوئے ہندوستان اور بیرون ملک کئی ریکارڈ توڑ دیے ہیں۔ فلم، جس میں رنویر سنگھ، ارجن رامپال اور سنجے دت شامل ہیں، دنیا بھر میں ۱۵۰۰؍ کروڑ روپے کے قریب پہنچ چکی ہے، اس وقت یہ بیرون ملک کمائی کرنے والی تیسری ہندی فلم ہے۔ پہلے اور دوسرے نمبر پر شاہ رخ خان کی ’’پٹھان‘‘ اور ’’جوان‘‘ ہیں۔

بالی ووڈ کے فلم ساز آدتیہ دھر کی ایکشن ڈرامہ فلم ’’دھرندھر: دی ریوینج‘‘ نے ریلیز کے بعد سے باکس آفس پر شاندار کارکردگی کا مظاہرہ کرتے ہوئے نہ صرف ہندوستان بلکہ عالمی سطح پر بھی متعدد ریکارڈ قائم کر دیے ہیں۔ فلم میں رنویر سنگھ، ارجن رامپال اور سنجے دت مرکزی کرداروں میں نظر آ رہے ہیں۔ تازہ اعداد و شمار کے مطابق، فلم ہندوستان میں ایک ہزار کروڑ روپے کے ہندسے کے قریب پہنچ چکی ہے، جبکہ دنیا بھر میں اس کی مجموعی کمائی ۱۵۰۰؍ کروڑ روپے سے تجاوز کرنے کے قریب ہے۔ رپورٹ کے مطابق فلم نے ہندی ورژن میں تقریباً ۸۸۷؍ کروڑ روپے جبکہ تمام زبانوں میں مجموعی طور پر ۹۴۰؍ کروڑ روپے سے زائد کا بزنس کیا ہے۔ اندازہ لگایا جا رہا ہے کہ ڈب ورژنز کی بدولت فلم جلد ہی ایک ہزار کروڑ روپے کا سنگ میل عبور کر لے گی، تاہم اصل ہندی ورژن میں اس کا بزنس ممکنہ طور پر ۹۵۰؍ کروڑ روپے کے قریب محدود رہ سکتا ہے۔

یہ بھی پڑھئے: انیت پڈا کا ’’شکتی شالنی‘‘ میں ڈبل کردار

بین الاقوامی باکس آفس پر بھی فلم کی کارکردگی نمایاں رہی ہے۔ اطلاعات کے مطابق، فلم نے ۲۶؍ دنوں میں ۲۵ء۴۳؍ ملین ڈالر کی کمائی کی ہے، جو اسے دنیا بھر میں سب سے زیادہ کمائی کرنے والی ہندوستانی فلموں کی فہرست میں شامل کر رہی ہے۔ خاص بات یہ ہے کہ ’’دھرندھر: دی ریوینج‘‘ کو خلیجی ممالک میں ریلیز نہیں کیا گیا، اس کے باوجود اس کی بیرون ملک کمائی کو غیر معمولی قرار دیا جا رہا ہے۔
اس وقت بیرون ملک باکس آفس پر سب سے زیادہ کمائی کرنے والی فلموں میں شاہ رخ خان کی ’’پٹھان‘‘ تقریباً ۴۹؍ ملین ڈالر کے ساتھ پہلے نمبر پر جبکہ ’’جوان‘‘ ۴۸؍ ملین ڈالر کے ساتھ دوسرے نمبر پر ہے۔ ’’دھرندھر: دی ریوینج‘‘ اس فہرست میں تیسرے نمبر پر ہے۔ 

یہ بھی پڑھئے: ذاکر خان کے متنازع بیان پر سدھارتھ آنند کا ردعمل

مزید برآں، فلم نے ’’پشپا ۲: دی رول‘‘ کی مجموعی کمائی کو بھی چیلنج کرنا شروع کر دیا ہے، جس نے ۲۰۲۴ء میں ۱۶۰۰؍ کروڑ روپے سے زائد کا بزنس کیا تھا۔ رپورٹس کے مطابق اس سال صرف ایک بڑی فلم ایسی ہے جو ’’دھرندھر: دی ریوینج‘‘ کی کمائی کو چیلنج کر سکتی ہے، اور وہ ہے ’’رامائن‘‘، جس میں رنبیر کپور، یش اور سنی دیول مرکزی کردار ادا کر رہے ہیں۔ یہ فلم دیوالی ۲۰۲۶ء کے موقع پر ریلیز ہونے والی ہے۔