ایفروبیٹ کے بانی فیلہ انِکُلاپوکُٹّی ۲۰۲۶ء کے گریمی لائف ٹائم اچیومنٹ ایوارڈ حاصل کرنے والے افریقہ کے پہلے آرٹسٹ بن گئے ہیں۔ یہ اعزاز ان کے عالمی موسیقی پر طویل مدتی اثرات کے اعتراف میں دیا جا رہا ہے۔ ایوارڈ کی تقریب ۳۱؍ جنوری ۲۰۲۶ء کو لاس اینجلس میں منعقد ہو گی جس میں فیلہ کے خاندان کے افراد ان کی طرف سے اعزاز حاصل کریں گے۔

افریقی موسیقی کے لیجنڈ فیلہ انِکُلاپو کُٹّی نے تاریخ رقم کر دی ہے۔ انہیں امریکہ کی ریکارڈنگ اکیڈمی نے گریمی لائف ٹائم اچیومنٹ ایوارڈ سے نوازا ہے، اور وہ پہلے افریقی آرٹسٹ بن گئے ہیں جنہیں یہ اعزاز ملا ہے۔ یہ اعلان ۲۰۲۶ء کے گریمی اسپیشل میریٹ ایوارڈز کے سلسلے میں کیا گیا، اور ان اعزازات میں موسیقی کی دنیا کے چند عظیم نام بھی شامل ہیں۔یاد رہے کہ فیلہ کُٹّی ۱۹۹۷ء میں انتقال کر گئے تھے، لیکن ان کی موسیقی، خاص طور پر ایفروبیٹ، جو افریقی روایتی دھنوں، جاز، فنک اور سیاسی اظہار کا انوکھا امتزاج ہے، نے دنیا بھر میں موسیقی اور ثقافت پر گہرا اثر چھوڑا۔ ایوارڈ تقریب ۳۱؍ جنوری ۲۰۲۶ء کو لاس اینجلس کے ول شائر ایبل تھیٹر میں گریمی ویک کے دوران منعقد ہو گی، جہاں ان کا خاندان فیلہ کے اعزاز میں موجود ہوگا۔

Fela Kuti wasn’t just a music icon—he was a man of the people and a revolutionary who stood against injustice. pic.twitter.com/FcE4ZTVG6a

— Typical African (@Joe__Bassey) January 10, 2026

یہ بھی پڑھئے: اننیا پانڈے اور لکشیا کی ’’چاند میرا دل‘‘ کی ریلیز مؤخر

ریکارڈنگ اکیڈمی کے مطابق یہ لائف ٹائم اچیومنٹ ایوارڈ ان فنکاروں کو دیا جاتا ہے جن کی موسیقی میں طویل مدتی اور نمایاں شراکت رہی ہو، اور فیلہ کا شمار ان چند موسیقاروں میں ہوتا ہے جنہوں نے عالمی موسیقی کے نقشے پر اپنا نشان چھوڑا۔اس سال کے دیگر گریمی لائف ٹائم اچیومنٹ ایوارڈ حاصل کرنے والوں میں موسیقی کی تاریخ کے کچھ بڑے نام شامل ہیں:
(۱) کارلوس سانتانا
(۲) شاکا خان
(۳) شیر پاپ ایون
(۴) پال سائمن
(۵) وہِٹنی ہیوسٹن
یہ اعزازات گریمی اسپیشل میریٹ ایوارڈز کے تحت دیے جاتے ہیں، جو ریکارڈنگ اکیڈمی کی طرف سے موسیقی میں غیر معمولی خدمات کے اعتراف میں دئیے جاتے ہیں جبکہ ایوارڈ تقریب سالانہ گریمی ایوارڈ سے پہلے منعقد ہوتی ہے۔ 

یہ بھی پڑھئے: عالیہ بھٹ نے اپنی نئی پرائم ویڈیو فلم’’ڈونٹ بی شائی‘‘ کا اعلان کی

فیلہ کُٹّی کے اعزاز کے اعلان کے بعد دنیا بھر میں خاص طور پر افریقی موسیقی کمیونٹی میں جشن کا ماحول ہے، کیونکہ یہ اعزاز نہ صرف ان کی ذاتی میراث کو تسلیم کرتا ہے بلکہ افریقی موسیقی کے عالمی اثر کو بھی مضبوطی عطا کرتا ہے۔ فیلہ صرف گیتوں اور دھنوں تک محدود نہیں تھے، وہ اپنے سیاسی بیانات، نائیجیریا اور افریقہ میں سماجی جدوجہد، اور موسیقی کے ذریعے بدلاؤ اور آزادی کے پیغامات کے سبب عالمی سطح پر ایک علامتی شخصیت تھے۔ ریکارڈنگ اکیڈمی کے اس اقدام کو موسیقی کی عالمی برادری نے کافی سراہا ہے، اور ماہرین اسے افریقہ کے فنکاروں کے لیے ایک نیا مرحلہ قرار دے رہے ہیں، خاص طور پر اس دور میں جب ایفروبیٹ اور افریقی موسیقی دنیا بھر کے چارٹس اور موسیقی فیسٹیولز میں نمایاں مقام حاصل کر رہی ہیں۔