گوتم گمبھیر نے شاہ رخ خان کے ساتھ اپنی ملاقات کی تصویر انسٹاگرام پر شیئر کی اور لکھا کہ شاہ رخ خان نہ صرف بالی ووڈ بلکہ دلوں کے بھی بے تاج بادشاہ ہیں، جب بھی ہم ملتے ہیں، ان کیلئے میرا احترام اور محبت بڑھ جاتی ہے، ابھی ان سے بہت کچھ سیکھنا باقی ہے۔

شاہ رخ خان اپنی بلاک بسٹر فلم جوان میں شاندار اداکاری کے سبب ہر جگہ چھائے ہوئے ہیں۔ ہر شعبے کے افراد ان کی اداکاری کو سراہ رہے ہیں۔ حال ہی میں انہوں نے گوتم گمبھیر سے ملاقات کی۔ اس ضمن میں گوتم گمبھیر نے ان کے ساتھ ملاقات کی تصویر اپنے انسٹاگرام اکاؤنٹ پر شیئر کی ہے جس میں دونوں کو سیاہ رنگ کی ٹی شرٹ میں دیکھا جاسکتا ہے۔ گوتم گمبھیر نے تصویر کے کیپشن میں لکھا ہے کہ ’’ شاہ رخ خان نہ صرف بالی ووڈ بلکہ دلوں کے بھی بادشاہ ہیں۔ ہم جب بھی ملتے ہیں میرے دل میں ان کیلئے احترام اور محبت بڑھ جاتی ہے۔ ایس آر کے آپ سے بہت کچھ سیکھنا ہے۔ خیال رہے کہ گوتم گمبھیر اور شاہ رخ خان کے بہت پرانے تعلقات ہیں۔ گوتم گھمبیر نے ۲۰۱۱ء تا ۲۰۱۷ء آئی پی ایل فرنچائز کولکاتا نائٹ رائڈرس کی کپتانی کی تھی جس کے بانی شاہ رخ خان ہیں۔ ۲۰۱۲ء اور ۲۰۱۴ء میں گوتم کی کپتانی میں کے کے آر نے آئی پی ایل کی ٹرافی اپنے نام کی تھی۔ دونوں مرتبہ گمبھیر نے بیٹنگ کی تھی خاص طور پر ۲۰۱۲ء میں انہوں نے ۱۷؍ میچوں میں ۵۹۰؍ رن بنائے تھے۔ وہ کے کے آر کے سب سےزیادہ رن حاصل کرنے والے کھلاڑی رہے ہیں۔