اکشے کمار اور سیف علی خان کی فلم ’’حیوان‘‘ سے کافی توقعات وابستہ تھیں کیونکہ اس میں دونوں اداکار ۱۸؍ سال بعد ایک ساتھ بڑے پردے پر واپس آئے ہیں۔ تاہم ریلیز کے بعد فلم کو باکس آفس پر مایوس کن آغاز کا سامنا کرنا پڑا۔ پریہ درشن کی ہدایت کاری میں بننے والی اس فلم نے پہلے دن ہندوستان میں تقریباً ۳؍کروڑ روپے نیٹ کمائے۔

اکشے کمار اور سیف علی خان کی فلم ’’حیوان‘‘ سے کافی توقعات وابستہ تھیں کیونکہ اس میں دونوں اداکار ۱۸؍ سال بعد ایک ساتھ بڑے پردے پر واپس آئے ہیں۔ تاہم ریلیز کے بعد فلم کو باکس آفس پر مایوس کن آغاز کا سامنا کرنا پڑا۔ پریہ درشن کی ہدایت کاری میں بننے والی اس فلم نے پہلے دن ہندوستان میں تقریباً ۳؍کروڑ روپے نیٹ  کمائے جبکہ دوسرے دن بھی اس کی کمائی صرف ۵۰ء۲؍ کروڑ روپے  رہی۔ دوسرے دن کے اختتام تک فلم کا عالمی مجموعی کلیکشن تقریباً۶۰ء۸؍ کروڑ روپے  تک پہنچا۔ ’’حیوان‘‘ دراصل ۲۰۱۶ء کی ملیالم فلم ’’اوپّام‘‘ (Oppam)  کا ہندی ریمیک ہے۔ فلم میں سیف علی خان نے بصارت سے محروم شخص  شیام  کا کردار ادا کیا ہے، جبکہ اکشے کمار ایک خطرناک کردار  پرشورام  کے روپ میں نظر آئے ہیں۔ بومن ایرانی، شریا پِلگاؤںکر اور سیامی کھیر بھی اہم کرداروں میں شامل ہیں۔ فلم کی کہانی ایک ایسے بصارت سے محروم شخص کے گرد گھومتی ہے جو ایک بچی کو خطرناک دشمن سے بچانے کی کوشش کرتا ہے۔ ’’حیوان‘‘ کی کمزور شروعات نے خاص طور پر اس لیے توجہ حاصل کی ہے کیونکہ اس فلم کے ذریعے معروف ہدایت کار پریہ درشن  نے کئی برس تک کامیڈی فلمیں بنانے کے بعد سنجیدہ اور تھرلر سنیما کی طرف واپسی کی ہے۔ پریہ درشن نے اپنے کریئر کا آغاز ہندی سنیما میں ڈرامہ اور سنجیدہ فلموں سے کیا تھا، جن میں ’’گردش‘‘ اور ’’وراثت‘‘ شامل ہیں، لیکن ’’ہیرا پھیری‘‘ کی کامیابی کے بعد ان کی شناخت کامیڈی فلموں کے ہدایت کار کے طور پر مضبوط ہوگئی۔ 

یہ بھی پڑھئے:مالیگاؤں: محکمۂ صحت میں عارضی ملازمت کیلئے امیدواروں کی کثرت

ہدایت کار نے خود بھی کہا تھا کہ وہ کامیڈی فلمیں بناتے بناتے تھک چکے ہیں اور’’حیوان‘‘ ان کے لیے ایک نئے باب کا آغاز ہے۔ ان کے مطابق وہ اب ایسے موضوعات کی طرف واپس آنا چاہتے ہیں جہاں کہانی اور کردار بنیادی حیثیت رکھتے ہوں، نہ کہ صرف مسلسل کامیڈی یا گگس۔  فلم کے باکس آفس پر کمزور ردعمل نے ایک بار پھر یہ سوال کھڑا کردیا ہے کہ کیا پریہ درشن کی  غیر مزاحیہ ہندی فلمیں  کامیڈی فلموں جیسی عوامی مقبولیت حاصل کر پاتی ہیں؟ ان کی کامیڈی فلموں نے جہاں انہیں بالی ووڈ کے کامیاب ترین مزاحیہ ہدایت کاروں میں شامل کیا، وہیں سنجیدہ موضوعات پر بنائی گئی ان کی بعض ہندی فلمیں اسی سطح کی تجارتی کامیابی حاصل نہیں کرسکیں۔

یہ بھی پڑھئے:’’کامیابی فوراً نہیں ملتی، کبھی کبھی صبر کے ساتھ انتظار بھی کرنا پڑتا ہے‘‘

’’حیوان‘‘ ‘ کو تنقیدی سطح پر بھی ملی جلی آرا ملی ہیں۔ بعض ناقدین نے فلم کے تصور اور آخری حصے کو سراہا، لیکن اسکرین پلے، رفتار اور بعض کرداروں کی پیشکش پر سوالات اٹھائے گئے۔  ہندوستان ٹائمز  نے فلم کو ۳؍ اسٹار دیتے ہوئے اسے ایک ایسا تھرلر قرار دیا جس میں اچھا تصور ہونے کے باوجود مجموعی طور پر اتار چڑھاؤ نظر آتا ہے۔  اکشے کمار اور سیف علی خان کی طویل عرصے بعد واپسی، پریہ درشن کی ہدایت کاری اور سنجیدہ تھرلر کی پیشکش کے باوجود ’’حیوان‘‘  کو باکس آفس پر وہ آغاز نہیں مل سکا جس کی توقع کی جارہی تھی۔ اب فلم کے لیے ویک اینڈ کی کمائی انتہائی اہم ہوگی، کیونکہ مضبوط اختتام ہفتہ ہی اس کے ابتدائی کمزور رجحان کو کسی حد تک تبدیل کرسکتا ہے۔