ہالی ووڈ کی مشہور فلم سیریز’’راکی‘‘ کے سیکڑوں مداحوں نے امریکی شہر فلاڈیلفیا میں ایک منفرد عالمی ریکارڈ قائم کرکے فلم کی ۵۰ ؍ویں سالگرہ کو یادگار بنادیا۔ مشہور اداکار اور فلم ساز سلویسٹر اسٹالون کی ۱۹۷۶ ءمیں ریلیز ہونے والی فلم ’’راکی‘‘ کے مرکزی کردار راکی بالبوا سے متاثر ہوکر ۵۷۰ ؍افراد نے ایک ساتھ اس کا مخصوص حلیہ اختیار کیا ۔

 ہالی ووڈ کی مشہور فلم سیریز ’’راکی‘‘   کے سیکڑوں مداحوں نے امریکی شہر فلاڈیلفیا میں ایک منفرد عالمی ریکارڈ قائم کرکے فلم کی ۵۰ ؍ویں سالگرہ کو یادگار بنادیا۔ مشہور اداکار اور فلم ساز سلویسٹر اسٹالون  کی ۱۹۷۶ ءمیں ریلیز ہونے والی فلم ’’راکی‘‘ کے مرکزی کردار راکی بالبوا   سے  متاثر ہوکر ۵۷۰ ؍افراد نے ایک ساتھ اس کا مخصوص حلیہ اختیار کیا اور گنیز ورلڈ ریکارڈ میں اپنا نام درج کرایا۔ یہ اجتماع فلاڈیلفیا میوزیم آف آرٹ  کی ان مشہور سیڑھیوں کے سامنے منعقد ہوا، جو فلم میں راکی کی مشہور دوڑ کی وجہ سے دنیا بھر میں پہچانی جاتی ہیں۔۲۵۰؍ افراد کی شرط تھی، ۵۷۰ ؍مداحوں نے شرکت کی۔ اس عالمی ریکارڈ کے لیے کم از کم ۲۵۰ ؍افراد کا راکی بالبوا کے مخصوص لباس میں جمع ہونا ضروری تھا، تاہم منتظمین کو اس سے کہیں زیادہ کامیابی ملی اور مجموعی طور پر ۵۷۰ ؍افراد نے شرکت کرکے سابقہ ریکارڈ توڑ دیا۔ گنیز ورلڈ ریکارڈ کے نمائندے نے موقع پر موجود رہ کر شرکاء کی تعداد اور لباس کے مقررہ معیار کی تصدیق کی۔اس ریکارڈ کی خاص بات یہ تھی کہ تمام شرکاء نے فلم کے مرکزی کردار راکی بالبوا کا مشہور لباس زیب تن کیا ہوا تھا۔ اس میں سر پر سیاہ اونی ٹوپی، سرمئی رنگ کی سویٹ شرٹ، سرمئی ٹراؤزر اور سیاہ رنگ کے اونچے جوتے شامل تھے۔ یہی وہ لباس ہے جس میں سلویسٹر اسٹالون نے فلم میں راکی کا کردار ادا کیا تھا۔شرکاء کی بڑی تعداد دوپہر کے وقت فلاڈیلفیا میوزیم آف آرٹ کے سامنے جمع ہوئی۔ سرد ہواؤں اور ہلکی بارش کے باوجود مداحوں کا جوش برقرار رہا اور لوگ ایک دوسرے کی حوصلہ افزائی کرتے ہوئے عالمی ریکارڈ بنانے کی کوشش میں شریک ہوئے۔

Yo, Philly, you did it! 🥊 570 fans dressed up as Rocky Balboa and broke a Guinness World Record. Congratulations from the WBC to Philadelphia and everyone who joined this tribute to the Italian Stallion! 🏆 🎥 @visitphilly https://t.co/ms7VJCUy3Z

— World Boxing Council (@WBCBoxing) November 14, 2026

یہ بھی پڑھئے:ہندوستانی فلموں نے بولنا سیکھا تو اُردو زبان ہی کا سہارا لیا
 ریکارڈ کی تصدیق ہونے کے بعد تمام شرکاء نے خوشی کا اظہار کیا اور فلم کے مشہور منظر کو حقیقت میں دہراتے ہوئے میوزیم کی سیڑھیوں پر دوڑ لگائی۔ اس موقع پر مداحوں نے اپنی مٹھیاں ہوا میں بلند کرکے راکی کے مخصوص انداز میں جشن منایا اور یادگار تصاویر بنوائیں۔فلم ’’راکی‘‘ میں مرکزی کردار کو انہی ۷۲؍ سیڑھیوں پر دوڑتے ہوئے دکھایا گیا تھا۔ یہ منظر فلم کی سب سے مقبول جھلکیوں میں شمار ہوتا ہے اور آج بھی دنیا بھر سے آنے والے سیاح اور فلم کے مداح ان سیڑھیوں پر چڑھ کر راکی کے انداز کو دہراتے ہیں۔
یہ عالمی ریکارڈ فلم ’’راکی‘‘ کی ریلیز کے ۵۰ ؍سال مکمل ہونے کی مناسبت سے منعقد ہونے والی خصوصی تقریبات کا حصہ تھا۔ فلم ۱۹۷۶ ءمیں ریلیز ہوئی تھی اور اس کی کہانی جنوبی فلاڈیلفیا کے ایک عام باکسر راکی بالبوا کے گرد گھومتی ہے، جسے دنیا کے ہیوی ویٹ باکسنگ چیمپئن اپولو کریڈ کے خلاف مقابلے کا غیر معمولی موقع ملتا ہے۔فلم میں راکی کا کردار ادا کرنے کے ساتھ اس کی کہانی بھی سلویسٹر اسٹالون نے خود لکھی تھی۔ فلم کی تیاری پر ایک ملین ڈالر سے بھی کم خرچ ہوئے تھے، لیکن اس نے باکس آفس پر شاندار کامیابی حاصل کی اور بہترین فلم سمیت کئی اہم آسکر ایوارڈز اپنے نام کیے۔ اس فلم نے سلویسٹر اسٹالون کو عالمی شہرت دلائی اور راکی بالبوا کو سنیما کی تاریخ کے مقبول ترین کرداروں میں شامل کردیا۔

یہ بھی پڑھئے:’ شیئربازار میں اندراج ٹاٹا سنس کے بنیادی فلسفے کو ہی بدل دےگا‘

فلاڈیلفیا میں راکی کی ۵۰ ؍ویں سالگرہ کے موقع پر کئی دیگر تقریبات بھی منعقد کی گئیں۔ ان میں راکی کے فلمی انداز میں سیڑھیاں چڑھنے کا مقابلہ، راکی کے مجسمے کی دوبارہ رونمائی اور فلم کے ایک مشہور تربیتی منظر کی نقل کرتے ہوئے گوشت کے ٹکڑوں پر مکے مارنے کا چیلنج شامل تھا۔منتظمین کے مطابق راکی رن  میں ۴۵ ؍ہزار افراد کی شرکت متوقع تھی، جن کا تعلق امریکہ کی تمام ۵۰ ؍ریاستوں اور دنیا کے ۷۵ ؍ممالک سے تھا۔ اس طرح راکی کی فلمی میراث کو خراجِ عقیدت پیش کرنے کے لیے فلاڈیلفیا ایک بڑے عالمی جشن کا مرکز بن گیا۔
راکی بالبوا کا کردار صرف ایک باکسر کی کہانی نہیں بلکہ جدوجہد، حوصلے، خود اعتمادی اور نامساعد حالات کے باوجود ہمت نہ ہارنے کی علامت بن چکا ہے۔ یہی وجہ ہے کہ فلم کی ریلیز کے پانچ دہائیوں بعد بھی اس کے مداح دنیا بھر میں موجود ہیں۔فلاڈیلفیا میں ۵۷۰؍ افراد کا ایک ساتھ راکی کا روپ دھارنا اس بات کا ثبوت ہے کہ بعض فلمیں محض تفریح تک محدود نہیں رہتیں بلکہ عوامی ثقافت اور اجتماعی یادوں کا حصہ بن جاتی ہیں۔ اس عالمی ریکارڈ نے نہ صرف فلم کے مداحوں کو ایک جگہ جمع کیا بلکہ راکی بالبوا کے اس پیغام کو بھی تازہ کردیا کہ کامیابی صرف جیتنے میں نہیں بلکہ آخری لمحے تک جدوجہد جاری رکھنے میں بھی ہے۔