اسٹار بلے باز وراٹ کوہلی (۱۰۲؍رن) کی لگاتار دوسری سنچری اور رتوراج گائیکواڈ (۱۰۵؍رن) کی پہلی سنچری کی بدولت ہندوستان نے بدھ کو جنوبی افریقہ کے خلاف دوسرے ایک روزہ میچ میں ۵۰؍ اوورس میں ۵؍وکٹ کے نقصان پر۳۵۸؍رن کا بڑا اسکور کھڑا کیا۔ تاہم مہمان ٹیم نے اوپنر ایڈن مارکرم (۱۱۰؍رن) کی شاندار سنچری کی بدولت چار گیندیں باقی رہتے ہوئے چار وکٹوں سے جیت کر تین میچوں کی سیریز ۱۔۱؍ سے برابر کر دی۔

جنوبی افریقہ نے ۲ء۴۹؍ اوورز میں ۶؍ وکٹ پر ۳۶۲؍ رن بناکر ون ڈے کرکٹ میں تیسرا سب سے بڑا تعاقب مکمل کیا۔ یہ یقین کرنا مشکل ہے کہ جنوبی افریقہ نے ۳۵۹؍رن  کا ہدف اتنی آسانی سے حاصل کر لیا۔ وراٹ کوہلی کی ۵۳؍ویں اور رتوراج گائیکواڈ کی پہلی ون ڈے سنچری رائیگاں گئی۔ مہمانوں نے تاریخ رقم کرتے ہوئے سیریز کو زندہ رکھا ہے اور اب فیصلہ کن میچ ویزاگ میں کھیلا جائے گا۔ ایڈن مارکرم کی شاندار سنچری نے جنوبی افریقہ کو ابتدائی دھچکے کے بعد میچ میں برقرار رکھا۔ میٹ بریٹزکے نے ایک بہترین نصف سنچری اسکور کی جس میں ڈیوالڈ بریوس کے ساتھ شراکت داری نبھائی۔ بریوس نے بھی پانچ چھکے لگا کر اہم کردار ادا کیا۔ 
مارکرم نے ۹۸؍ گیندوں پر۱۱۰؍ رنز میں ۱۰؍ چوکے اور چار چھکے لگائے۔ میتھیو بریٹزکے نے ۶۴؍ گیندوں پر۶۸؍ رنز میں ۵؍ چوکے لگائے جبکہ بریوس نے ۳۴؍ گیندوں پر۵۴؍ رنز میں ایک چوکا اور پانچ چھکے لگائے۔ کوربن بوش نے۱۵؍ گیندوں پر چار چوکوں سمیت ۲۹؍ رنز کی ناٹ آؤٹ  اننگز کھیل کر جنوبی افریقہ کو برابری کرنے میں مدد دی۔ کیشو مہاراج۱۰؍ رنز بنا کر ناٹ آؤٹ رہے۔
جنوبی افریقہ نے ہدف کا تعاقب اچھی رفتار سے کیا۔ اوس نے بیٹنگ کے حالات کو بہتر کیا اور ہندوستان بھی گیند اور فیلڈ کے ساتھ بھی ٹھیک  تھا، لیکن تعاقب مکمل کرنے کے لیے انہیں ابھی بھی کچھ اسمارٹ اور پرسکون بلے بازی کی ضرورت تھی۔ کوئنٹن ڈی کاک جلد آؤٹ ہوگئے، لیکن مارکرم نے ٹاپ آرڈر میں ذمہ داری سنبھالی اور کپتان باؤما اور بریٹزکے کے ساتھ اہم شراکت داری قائم کی۔ جیسوال نے مارکرم کا  ۵۳؍ رن کیچ چھوڑا اور انہوں نے ۸۸؍ گیندوں پر سنچری اسکور کی۔ ان کے آؤٹ ہونے کے بعد بریٹزکے اور بریوس نے چوتھے وکٹ کے لیے ۹۲؍ رنز کی شراکت داری کی۔ دونوں نے اپنی نصف سنچری مکمل کی  لیکن دونوں میں سے کوئی بھی میچ ختم نہ کرسکا۔ اس سے ہندوستان کو تھوڑی امید کی کرن نظر آئی، خاص طور پر جب جینسن آؤٹ  ہو گئے اور ڈی زورزی زخمی ہوکر باہر چلے گئے۔ لیکن بوش نے اس امید کو جلد ہی ختم کردیا۔ پہلے ون ڈے میں ان کے پاس پارٹنرز کم پڑ گئے تھے اور انہیں جیت نہیں دلا سکے، لیکن آج انہوں نے مہاراج کے ساتھ مل کر چیز مکمل کیا۔

South Africa win the 2nd ODI by 4 wickets.

We go to Vizag with the series levelled at 1-1.

Scorecard ▶️ https://t.co/oBs0Ns6SqR#TeamIndia | #INDvSA | @IDFCFIRSTBank pic.twitter.com/rGOhm95NnI

— BCCI (@BCCI) December 3, 2025

اس سے قبل ہندوستان نے دوسرے ون ڈے میں شاندار بیٹنگ کا مظاہرہ کرتے ہوئے ۵؍وکٹ پر۳۵۸؍ رنز کا پہاڑ جیسا اسکور کھڑا کر دیا۔ اس میں بڑا کردار  وراٹ کوہلی اور رتوراج گائیکواڑ کی عمدہ سنچریوں کارہا۔ وراٹ کوہلی نےرانچی کی سنچری کے بعد رائے پور میں بھی اپنا فارم جاری رکھتے ہوئے۹۳؍ گیندوں پر ۱۰۲؍ رنز (۷؍ چوکے، ۲؍ چھکے) کی کلاسک اننگز کھیلی۔رتوراج گائیکواڑ نے اپنے ون ڈے کریئر کی پہلی سنچری اسکور کرتے ہوئے۸۳؍ گیندوں پر۱۰۵؍ رنز (۱۲؍ چوکے، ۲؍ چھکے) بنائے۔دونوں نے مل کر۱۹۵؍ رنز کی مضبوط شراکت قائم کی، جس نے ہندوستان کی اننگ کو بنیاد فراہم کی۔

یہ بھی پڑھئے:غزہ: سردی کی شدت سے نمٹنے کیلئے سرگرمیاں تیز

وکٹوں کے درمیان ان کی دوڑ شاندار رہی اور یہ شراکت ہندوستان کے اس بڑے مجموعے کی اصل ریڑھ ثابت ہوئی۔کپتان کے ایل راہل نے بھی اپنا فارم برقرار رکھتے ہوئے۴۳؍گیندوں پر ۶۶؍ رنز ناٹ آؤٹ (۶؍ چوکے،۲؍ چھکے) بنائے۔آخر میں انہوں نے رویندر جڈیجا کے ساتھ مل کر اسکور کو۳۵۰؍رن  سے آگے تک پہنچایا۔ روہت شرما ۱۴؍ اور یشسوی جیسوال۲۲؍ رنز بنا کر آؤٹ ہوئے، لیکن گائیکواڑ نے دباؤ میں آتے ہی ذمہ دارانہ اننگز کھیلی۔

یہ بھی پڑھئے:کیا رشمیکا مندانا فروری میں وجے دیوراکونڈا سے شادی کر رہی ہیں؟

مارکو جینسن  کی شارٹ گیندوں کو سنبھل کر کھیلنے کے بعد وہ کھل کر برسے۔ دوسری جانب کوہلی نے سینئر پارٹنر کے طور پر رہنمائی کی اور اسکور کو تیزی سے آگے بڑھایا۔ایک مرحلے پر لگ رہا تھا کہ ہندوستان   سے آگے چلا جائے گا، لیکن جنوبی افریقہ نے آخری اوورس میں شاندار لوٹتے ہوئے اسکورنگ کی رفتار کو روکے رکھا۔اس کے باوجود ہندوستان نے آخری اوور میں ۱۸؍ رنز بٹورے اور مجموعہ ۵؍وکٹ ۳۵۸؍رن  تک پہنچا دیا۔جڈیجا ۲۴؍رنز بنا کر ناٹ آؤٹ رہے۔مارکو جینسن نے ۶۳؍ رنز دے کر ۲؍ وکٹ حاصل کئے جبکہ ناندرے برگر اورلونگی  اینگیڈی نے ایک ایک کامیابی حاصل کی۔