اداکاری کی دنیا میں کچھ چہرے ایسے ہوتے ہیں جو آنکھوں میں اتر جاتے ہیں، کچھ ایسے جو دل میں جا بیٹھتے ہیں، اور پھر کچھ ایسے ہوتےہیں جو وقت کے ساتھ ساتھ اداکاری، شرافت، اور محنت کی جیتی جاگتی علامت بن جاتے ہیں۔

 اداکاری کی دنیا میں کچھ چہرے ایسے ہوتے ہیں جو آنکھوں میں اتر جاتے ہیں، کچھ ایسے جو دل میں جا بیٹھتے ہیں، اور پھر کچھ ایسے ہوتےہیں جو وقت کے ساتھ ساتھ اداکاری، شرافت، اور محنت کی جیتی جاگتی علامت بن جاتے ہیں۔ کاجل اگروال کا نام اسی فہرست میں شامل ہے۔ انہوں نے جنوبی ہند کی فلمی صنعت کو اپنی سادگی، دلکش اداؤں اور متوازن اداکاری سے نہ صرف جیتا، بلکہ بالی ووڈ میں بھی اپنا جادو جگایا۔ کاجل اگروال کی پیدائش ۱۹؍ جون ۱۹۸۵ءکوممبئی میں ہوئی۔ ان کے والد ونیت اگروال ٹیکسٹائل کے کاروبار سے وابستہ ہیں اور والدہ سومتی اگروال کنسلٹنٹ ہونے کے ساتھ ساتھ ان کی مینیجر بھی رہیں۔ کاجل نے اپنی ابتدائی تعلیم سینٹ این ہائی اسکول، ممبئی سے حاصل کی، اور بعد میں کیشوبھائی کالج آف کامرس سے ماس میڈیا (مارکیٹنگ) میں گریجویشن مکمل کیا۔ تعلیم کے دوران ہی ماڈلنگ اور اشتہاروں میں ان کی دلچسپی نے انہیں فلمی دنیا کی طرف مائل کیا۔ 
 کاجل نے فلمی دنیا میں اپنےکریئرکی شروعات ۲۰۰۴ءمیں ہندی فلم’کیوں ! ہو گیا نا...‘ سے کی، جس میں ان کا کردار مختصر تھا۔ لیکن یہ ابتدا ان کے عزم کی مظہر تھی۔ ۲۰۰۷ءمیں انہوں نے تیلگو فلم ’لکشمی کلیانم‘ سے بطور ہیروئن اپنے سفر کی باقاعدہ شروعات کی۔ اسی سال ان کی فلم ’چندمامہ‘ ریلیز ہوئی، جو کامیاب رہی اور انہیں بطور اداکارہ پہچان دلائی۔ 
 ۲۰۰۹ءمیں ریلیزہونے والی فلم ’مگدھیرا‘کاجل اگروال کے کریئرکا سب سے اہم موڑ ثابت ہوئی۔ اس فلم میں انہوں نے رام چرن کےساتھ کام کیا اور شہزادی متھراوتی کا کردار ادا کیا۔ یہ فلم نہ صرف سپر ہٹ ہوئی بلکہ کاجل کی اداکاری اور ان کے ڈبل رول کو ناقدین اور ناظرین دونوں نے سراہا۔ اسی فلم سے انہوں نے جنوبی ہندوستانی فلمی صنعت میں اپنی جگہ پکی کر لی۔ 
 اس کے بعد کاجل نے ایک کے بعد ایک کئی کامیاب فلمیں کیں، جن میں ’ڈارلنگ‘(پربھاس کے ساتھ)، ’برنداونم‘ (این ٹی آر جونیئر کے ساتھ)، ’مسٹر پرفیکٹ‘، ’بزنس مین‘، ’نائک‘ اور’بادشاہ‘جیسی فلمیں شامل ہیں۔ ان فلموں میں ان کا کردار کبھی رومانوی، کبھی سنجیدہ اور کبھی شوخ مزاج رہا، مگر ہر روپ میں وہ ناظرین کے دلوں کو بھا گئیں۔ کاجل نے۲۰۱۱ءمیں اجے دیوگن کے ساتھ فلم ’سنگھم‘سے بالی ووڈ میں بطور ہیروئن قدم رکھا۔ اس کے بعد۲۰۱۳ءمیں اکشے کمار کےساتھ فلم ’اسپیشل۲۶‘میں ان کا کردار اگرچہ مختصر تھا مگر مؤثر تھا۔ انہوں نے یہاں بھی اپنی موجودگی کا احساس دلایا۔ کاجل اگروال کی اداکاری کا سب سے نمایاں پہلو ان کی آنکھوں کی زبان، چہرے کا سکون، اور فطری انداز ہے۔ وہ جذباتی مناظر میں بھرپور تاثر دیتی ہیں، اور ان کی مسکراہٹ ان کی سب سے بڑی طاقت سمجھی جاتی ہے۔ چاہے وہ روایتی کردار ہو یا ماڈرن، وہ ہر روپ کو اپنالیتی ہیں۔ کاجل کو کئی بار بہترین اداکارہ کے طور پر مختلف فلمی ایوارڈز میں نامزد کیاگیا، جن میں فلم فیئر سائوتھ اور ایس آئی آئی ایم اےاور سنے ما ایوارڈشامل ہیں۔ فلم ’مگدھیرا‘کے لیے انہیں بہترین اداکارہ کا اعزاز بھی ملا۔ کاجل نے۳۰؍ اکتوبر۲۰۲۰ءکوگوتم کچلو سے شادی کی جو ایک کاروباری اور انٹیریئر ڈیزائنر ہیں۔ ۲۰۲۲ءمیں ان کے ہاں بیٹے کی پیدائش ہوئی جس کا نام نیل کچلو رکھا گیا۔ وہ ازدواجی زندگی کےساتھ اپنے فلمی کریئرکو متوازن اندازمیں جاری رکھے ہیں۔