کینے ویسٹ (Kanye West ) کو ایک اور دھچکا لگا ہے۔ پولینڈ میں ان کا جون ۲۰۲۶ء کا کنسرٹ منسوخ کر دیا گیا ہے۔ حکام نے ان کے سام دشمن بیانات کو بنیاد بنا کر فیصلے کو ’’ناقابل قبول‘‘ قرار دیا۔ اس سے قبل لندن اور فرانس میں بھی ان کے شوز متاثر ہو چکے ہیں، جس سے ان کے عالمی ٹور پر سوالیہ نشان لگ گیا ہے۔

امریکی ریپر Kanye West، جو حالیہ برسوں میں اپنی موسیقی سے زیادہ متنازع بیانات کی وجہ سے خبروں میں رہے ہیں، کو ایک اور بڑا دھچکا اس وقت لگا جب پولینڈ میں ان کا طے شدہ کنسرٹ منسوخ کر دیا گیا۔پولینڈ کے شہر شور زوف میں واقع سلیشین اسٹیڈیم میں ۱۹؍ جون ۲۰۲۶ء کو ہونے والا یہ شو اب سرکاری طور پر منسوخ کر دیا گیا ہے۔ اسٹیڈیم کے ڈائریکٹر ایڈم سٹرزیوزکی نے ایک بیان میں کہا کہ ’’ہم آپ کو مطلع کرنا چاہتے ہیں کہ ۱۹؍ جون ۲۰۲۶ء کو ہونے والا کینے ویسٹ کا کنسرٹ رسمی اور قانونی وجوہات کی بنا پر نہیں ہوگا۔‘‘

یہ بھی پڑھئے: نیٹ فلکس سیریز Glory کا ٹریلر جاری، اسپورٹس کرائم ڈرامہ پر جوش

یہ فیصلہ ایسے وقت میں سامنے آیا ہے جب Kanye West پہلے ہی یورپ میں شدید ردعمل کا سامنا کر رہے ہیں۔ ان کے لندن شو کو منسوخ کر دیا گیا جبکہ فرانس میں کنسرٹ ملتوی ہو چکا ہے، جس سے واضح ہوتا ہے کہ ان کے حالیہ بیانات نے عالمی سطح پر شدید ردعمل پیدا کیا ہے۔ پولینڈ کی وزیر ثقافت مارٹا سینکواسکا نے اس فیصلے کی حمایت کرتے ہوئے کہا کہ ’’پولینڈ میں کینے ویسٹ کنسرٹ کا انعقاد ناقابل قبول ہے۔ ہم ایک ایسے فنکار کے بارے میں بات کر رہے ہیں جس نے عوامی طور پر سام دشمن خیالات کا اظہار کیا ہے۔‘‘ انہوں نے مزید کہا کہ ’’یہ محض تنازع نہیں بلکہ نفرت کو معمول پر لانے کی کوشش ہے۔‘‘

یہ بھی پڑھئے: ستیش کوشک اداکاری سے ہنسانے کا ہنر خوب جانتے تھے

انہوں نے واضح کیا کہ ایک ایسے ملک میں جس کی تاریخ دوسری عالمی جنگ اور ہٹلر کے دور کے مظالم سے گہری جڑی ہوئی ہے، ایسے بیانات کو نظر انداز نہیں کیا جا سکتا۔ ان کا کہنا تھا کہ ’’فنکارانہ آزادی کا مطلب یہ نہیں کہ ہر چیز کو اجازت دی جائے۔ ثقافت نفرت پھیلانے والوں کے لیے جگہ نہیں بن سکتی۔‘‘ یہ بات بھی قابل ذکر ہے کہ کینے ویسٹ نے ماضی میں ایسے بیانات دیے ہیں جنہیں سام دشمن اور متنازع قرار دیا گیا، جس پر انہیں عالمی سطح پر تنقید کا سامنا کرنا پڑا۔ تاہم، انہوں نے پولینڈ میں کنسرٹ کی منسوخی پر ابھی تک کوئی ردعمل ظاہر نہیں کیا۔
پولینڈ میں اس فیصلے کو تاریخی تناظر میں بھی دیکھا جا رہا ہے، جہاں دوسری جنگ عظیم کے دوران بڑے پیمانے پر تباہی اور انسانی جانوں کا نقصان ہوا۔ ایسے پس منظر میں، عوامی شخصیات کے بیانات کو زیادہ حساسیت سے دیکھا جاتا ہے۔