سدھارتھ ملہوترہ دھرما پروڈکشنز کی ایک رومانوی ڈرامہ فلم میں کام کریں گے جسے شرن شرما ڈائریکٹ کریں گے۔ دونوں کی ۷؍ویں فلم کی شوٹنگ ممکنہ طور پر ۲۰۲۶ء کے موسمِ گرما میں ممبئی میں شروع ہوگی۔

ایسا لگتا ہے کہ سدھارتھ ملہوترہ  اور کرن جوہر ایک اور مشترکہ پروجیکٹ کے لیے تیار ہو رہے ہیں۔ حالیہ رپورٹس کے مطابق اداکار کرن جوہر کے بینر دھرما پروڈکشنز  کے تحت بننے والی نئی فلم میں مرکزی کردار ادا کرنے کے لیے آخری مرحلے کی بات چیت کر رہے ہیں۔ اگر یہ منصوبہ حتمی شکل اختیار کر لیتا ہے تو یہ سدھارتھ اور کرن کی ساتویں مشترکہ فلم ہوگی، جو سدھارتھ کے بالی ووڈ آغاز  کے بعد بن رہی ہے۔
اداکار سدھارتھ ملہوترہ نے ہندی فلم انڈسٹری میں قدم ۲۰۱۲ء کی فلم ’’اسٹوڈنٹ آف دی ایئر‘‘ سے رکھا تھا، جسے کرن جوہر نے ڈائریکٹ کیا تھا اور اسی فلم کے ذریعے وہ بطور ہیرو متعارف ہوئے۔ اس کے بعد دونوں نے دھرما پروڈکشنز کے تحت کئی منصوبوں پر ساتھ کام کیا۔ مڈ ڈے  کی رپورٹ کے مطابق نئی فلم ایک گہرا رومانوی ڈرامہ ہوگی جسے شرن شرما ڈائریکٹ کریں گے۔ کہانی جذباتی طور پر پیچیدہ رشتوں اور کرداروں کے درمیان پیدا ہونے والے تنازعات پر مبنی ہوگی۔اس پیش رفت سے واقف ایک ذرائع  نے بتایا کہ جب گزشتہ سال سدھارتھ کو اس فلم کا تصور پیش کیا گیا تو انہوں نے مثبت ردِعمل دیا تھا۔ انہوں نے زبانی طور پر رضامندی ظاہر کی تھی لیکن باضابطہ فیصلہ کرنے سے پہلے اسکرپٹ پڑھنا چاہتے تھے۔ اب معاملہ آخری مرحلے کی بات چیت میں ہے۔ ذرائع کے مطابق پروڈکشن ہاؤس سدھارتھ کے ساتھ دوبارہ کام کرنے کا خواہاں ہے کیونکہ انہیں لگتا ہے کہ یہ موضوع ان کی اسکرین پرسنالٹی کے مطابق ہے۔ اگر سب کچھ منصوبے کے مطابق ہوا تو فلم کی شوٹنگ ۲۰۲۶ء کے موسمِ گرما میں ممبئی میں شروع ہونے کا امکان ہے۔

یہ بھی پڑھئے:آبنائے ہرمز سے گزرنے کیلئے ہندوستان اور ایران میں طویل مدتی معاہدہ نہیں ہے

یہ پروجیکٹ اداکار اور فلم ساز کے درمیان طویل تعاون کی فہرست میں ایک اور اضافہ ہوگا۔  اسٹوڈنٹ آف دی ایئر   کے بعد سدھارتھ نے دھرما کی کئی فلموں میں کام کیا جن میں  ہنسی تو پھنسی، برادرز، کپور اینڈ سنز، بار بار دیکھو، اتفاق، شیرشاہ  اور  یودھا  شامل ہیں، جو ۲۰۲۴ء میں ریلیز ہوئی تھی۔

یہ بھی پڑھئے:سنر نے پہلی بار انڈین ویلز کا خطاب اپنے نام کر لیا

 کام کے محاذ پر سدھارتھ کو آخری بار گزشتہ سال ریلیز ہونے والی ایک فلم میں جھانوی کپور کے ساتھ دیکھا گیا تھا۔ اس وقت وہ اپنی آنے والی فلم وَن  پر کام کر رہے ہیں جس میں تمنا بھاٹیا بھی شامل ہیں۔ کیمرے سے دور، اداکار اپنی ذاتی زندگی کے ایک نئے مرحلے سے بھی لطف اندوز ہو رہے ہیں۔ سدھارتھ اور ان کی اہلیہ کیارا اڈوانی نے حال ہی میں اپنے پہلے بچے کا استقبال کیا ہے، جو ایک بیٹی ہے جس کا نام  سرایہ  رکھا گیا ہے۔