کارتک آرین کی پچھلی فلم کو عوام نے زیادہ پسند نہیں کیا تھا، لیکن ان کی اداکاری ہمیشہ مداحوں کو اچھی لگتی رہی ہے۔ اس سال ان کی دو فلمیں ریلیز ہوں گی، جن میں سے ایک انوراگ باسو کے ساتھ ہے۔ اس فلم کا کام پچھلے سال ہی مکمل ہو گیا تھا، مگر دیوالی سے مؤخر ہونے کے بعد اس کی نئی ریلیز تاریخ سامنے نہیں آئی۔ دوسری طرف’’ناگزیلا‘‘ اگست میں ریلیز کی جائے گی۔ اسی دوران کارتک آرین کبیر خان کے ساتھ ایک اور اسپورٹس ڈراما پر کام کرنے جا رہے ہیں۔ آئیے جانتے ہیں یہ فلم کس پر مبنی ہے۔

کارتک آرین نے اپنے کام سے بارہا سب کو متاثر کیا ہے۔ اگرچہ ان کی پچھلی فلم باکس آفس پر خاص کامیابی حاصل نہیں کر سکی، پھر بھی اداکار کی مانگ کافی زیادہ ہے اور کئی ہدایتکار انہیں اپنی فلموں کے لیے سائن کر رہے ہیں۔ وہ تقریباً دو فلموں کی شوٹنگ مکمل کر چکے ہیں، مگر انوراگ باسو والی فلم کے بارے میں اب تک کوئی واضح خبر نہیں ہے۔ اسے پچھلے سال دیوالی پر ریلیز ہونا تھا، جس میں کارتک کے ساتھ سری لیلا نظر آنے والی تھیں، لیکن اب تک اس کی نئی تاریخ کا اعلان نہیں ہوا۔ البتہ ’’ناگزیلا‘‘ اگست میں ریلیز ہوگی۔ اسی دوران کارتک آرین نے کبیر خان کے ساتھ دوبارہ ہاتھ ملا لیا ہے۔
کچھ عرصہ پہلے یہ خبر آئی تھی کہ کارتک آرین نے ’’ناگزیلا‘‘ سے پہلے ہی اپنی ایک اور فلم کی شوٹنگ شروع کر دی تھی۔ وہ کشمیر گئے تھے جہاں ایک شیڈول مکمل کیا گیا جبکہ باقی کام کبیر خان کے ساتھ بعد میں کیا جائے گا۔ واپسی پر انہوں نے ’’ناگزیلا‘‘ مکمل کر لی۔ اسی کے ساتھ ہدایتکار نے۱۶؍ مارچ کو پریل کے ایک ریسٹورنٹ میں اپنی نئی فلم کی شوٹنگ شروع کر دی۔
 کارتک کس اسپورٹس ڈراما پر کام کر رہے ہیں؟
کارتک آرین اس سے پہلے کبیر خان کے ساتھ’’چندو چیمپئن‘‘ میں بھی کام کر چکے ہیں۔ اب دونوں ایک نئے اسپورٹس ڈراما کے لیے دوبارہ اکٹھے ہو گئے ہیں، جس کا ابھی تک کوئی حتمی نام نہیں رکھا گیا۔ یہ فلم کشمیر کی باصلاحیت کک باکسنگ کھلاڑی تجمُل اسلام سے متاثر ہے۔ تاہم، ابھی تک یہ واضح نہیں کہ ان کا کردار کون سی اداکارہ ادا کرے گی۔ خبروں کے مطابق کارتک آرین اس فلم میں ان کے کوچ کا کردار نبھائیں گے۔

یہ بھی پڑھئے:ایران کے ساتھ جاری تنازع کے درمیان ٹرمپ نے اپنا بیجنگ کا دورہ ملتوی کردیا

شوٹنگ کے پہلے دن پریل کے ایک ریسٹورنٹ میں تقریباً ۷۰؍ جونیئر آرٹسٹ موجود تھے اور سیٹ کو عام دن کی طرح سادہ انداز میں تیار کیا گیا تھا۔ امید ہے کہ کارتک آرین اس ہفتے کے آخر تک ٹیم میں شامل ہو جائیں گے۔کہا جا رہا ہے کہ کارتک آرین اس کردار کے لیے کک باکسنگ کی تربیت بھی لے رہے ہیں۔ ممبئی میں تقریباً دو ہفتوں تک شوٹنگ جاری رہے گی، جس کے بعد طویل شیڈول کے لیے ٹیم کشمیر جائے گی۔ کبیر خان اور ان کی ٹیم نے فروری میں کشمیر میں تفصیلی ریکی بھی کی تھی۔

یہ بھی پڑھئے:امتیاز علی کی ’’مَیں واپس آؤں گا‘‘ کا ٹیزر ریلیز

کون ہیں تجمل اسلام؟
تجمُل اسلام ہندوستان کی پہلی اور کم عمر ترین دو مرتبہ عالمی کک باکسنگ چیمپئن ہیں۔ صرف۷؍ سال کی عمر میں انہوں نے ۲۰۱۶ء میں ورلڈ کک باکسنگ چیمپئن شپ کے انڈر۸؍زمرے میں گولڈ میڈل جیتا تھا۔ جموں و کشمیر سے تعلق رکھنے والی اس کھلاڑی نے ۲۰۲۱ء میں انڈر۱۴؍ کیٹیگری میں بھی یہی کامیابی حاصل کی۔ انہوں نے کشمیر میں کھیلوں کی سہولیات کی کمی پر آواز بھی اٹھائی  اور۲۰۱۹ء میں بانڈی پورہ میں اپنی ٹریننگ اکیڈمی قائم کی۔