پنجابی گلوکار اور اداکار دلجیت دوسانجھ نے ایک اور تاریخی اعزاز اپنے نام کر لیا ہے۔ لاس اینجلس سٹی کونسل نے ان کی موسیقی اور ثقافتی خدمات کے اعتراف میں ۶؍جنوری۲۰۲۷ء کو’’دلجیت دوسانجھ ڈے‘‘ قرار دے دیا ہے۔

اپنی شاندار کامیابیوں میں ایک اور اعزاز کا اضافہ کرتے ہوئے، پنجابی گلوکار اور اداکار دلجیت دوسانجھ کے نام اب ایک پورا دن مختص کر دیا گیا ہے، اور یہ اعزاز ہندوستان میں نہیں بلکہ لاس اینجلس میں دیا گیا ہے۔ ایک نئے سنگِ میل کے طور پر، لاس اینجلس سٹی کونسل نے۶؍ جنوری۲۰۲۷ء کو ’’دلجیت دوسانجھ ڈے‘‘ قرار دیا ہے۔ یہ اعزاز موسیقی کی دنیا میں ان کی بے مثال خدمات اور امریکی مرکزی دھارے کی تفریحی صنعت میں اپنی ثقافت کو فروغ دینے کے اعتراف میں دیا گیا ہے۔ 

یہ ہے’’دلجیت دوسانجھ ڈے‘‘
ہندوستان سے تعلق رکھنے والے دلجیت دوسانجھ نے گزشتہ چند برسوں میں امریکہ میں خود کو سب سے محبوب پنجابی گلوکاروں میں شامل کر لیا ہے۔ ان کی فنی خدمات کے اعتراف میں لاس اینجلس سٹی کونسل نے ایک پورا دن ان کے نام کر دیا ہے۔ اس اعزاز کو مزید خاص بنانے والی بات یہ ہے کہ یہ دن ان کی سالگرہ، یعنی۶؍ جنوری، کو منایا جائے گا۔ جمعہ کو گلوکار نے ایک ویڈیو شیئر کی جس میں وہ لاس اینجلس کی کونسل وومن مونیکا روڈریگز کے ساتھ کھڑے ہیں۔ ویڈیو میں مونیکا روڈریگز انہیں اس اعزاز کے بارے میں بتاتی ہیں۔ خبر سن کر دلجیت نے کہا کہ وہ بے حد حیران اور جذباتی ہیں اور ان کے پاس الفاظ نہیں ہیں۔ 

 

 

 

 

 

View this post on Instagram

 

 

 

 

 

 

 

 

 

 

 

A post shared by TEAM DOSANJH (@teamdiljitglobal)

ویڈیو شیئر کرتے ہوئے دلجیت نے کیپشن میں لکھا:’لاس اینجلس میں دلجیت دوسانجھ ڈے۔ ‘‘انہوں نے مزید کہا: لاس اینجلس سٹی کونسل نے باضابطہ طور پر ایک شہری قرارداد منظور کی ہے جس کے تحت۶؍ جنوری۲۰۲۷ءکو `’’دلجیت دوسانجھ ڈے‘‘ قرار دیا گیا ہے۔ 

اعزازی بیان میں دلجیت دوسانجھ کوپنجابی اور جنوبی ایشیائی موسیقی کی صنعتوں میں ایک نمایاں اور انقلابی قوت قرار دیا گیا، جنہوں نے روایتی پنجابی موسیقی کو جدید ہپ ہاپ، پاپ اور عالمی موسیقی کے انداز کے ساتھ ملا کر بین الاقوامی موسیقی کے منظرنامے پر گہرا اور دیرپا اثر چھوڑا ہے۔ یہ اعزاز ان کے ارینا ورلڈ ٹور کے لاس اینجلس میں ۱۸؍جون۲۰۲۶ءکے شو سے قبل دیا گیا ہے۔ 

یہ بھی پڑھئے: فلاپ فلمز کی وجہ سے ’پنوتی‘ لیکن ’مہرہ‘ کی کامیابی کے بعد ’لکی‘ کہا جانے لگا تھا

مداح خوشی سے جھوم اٹھے
جیسے ہی دلجیت نے یہ ویڈیو شیئر کی، یہ سوشل میڈیا پر تیزی سے وائرل ہو گئی۔ مداحوں نے بھرپور خوشی کا اظہار کیا۔ ایک صارف نے تبصرہ کرتے ہوئے لکھا:’’واہ! کمال کر دیا، جادو والا!‘‘

دلجیت دوسانجھ اس سے پہلے بھی کئی تاریخی کامیابیاں حاصل کر چکے ہیں۔ وہ کوچیلا ویلی میوزک اینڈ آرٹس فیسٹیول میں پرفارم کرنے والے پہلے پنجابی فنکار بنے، جبکہ دنیا بھر کے بڑے اسٹیڈیمز میں مکمل طور پر ہاؤس فل شوز کرنے والے پہلے پنجابی گلوکار کا اعزاز بھی اپنے نام کر چکے ہیں۔