بالی ووڈ کے معروف فلم ساز  مہیش بھٹ ۷۳؍برس کے ہوگئے ہیں۔ مہیش بھٹ۲۰؍ستمبر ۱۹۴۸ء کو ممبئی میں پیدا ہوئے تھے۔ ان کے والد نانا بھائی بھٹ فلم انڈسٹری کے معروف فلم ساز تھے۔

بالی ووڈ کے معروف فلم ساز  مہیش بھٹ ۷۳؍برس کے ہوگئے ہیں۔ مہیش بھٹ۲۰؍ستمبر ۱۹۴۸ء کو ممبئی میں پیدا ہوئے تھے۔ ان کے والد نانا بھائی بھٹ فلم انڈسٹری کے معروف فلم ساز تھے۔ گھر میں فلمی ماحول کی وجہ سے ان کی دلچسپی  فلموں کی جانب مائل  ہوگئی  اور وہ ڈائریکٹر بننے کا خواب دیکھنے لگے۔ تعلیم مکمل کرنے کے بعد ، انہوں نے پروڈیوسر ڈائرکٹر راج کھوسلہ کے معاون کے طور پر کام کرنا شروع کیا۔
 مہیش بھٹ نے اپنے فلمی کریئر کا آغاز ۱۹۷۰ءمیں ایک دستاویزی فلم ’سنکٹ‘ سے کیا۔ اس کے بعد ، انہوں  نے’ `منزلیں اور بھی ہیں‘،’وشواس گھات‘،’لہو کے دو رنگ‘ ،’نیا دور‘ اور’ابھیمنیو‘ جیسی کئی فلموں کی ہدایت کاری کی لیکن ان فلموں سے انہیں زیادہ فائدہ نہیں ہوا۔۱۹۸۲ءمیں مہیش بھٹ کو فلم ’ارتھ‘کی ہدایت کاری کا موقع ملا۔ اس فلم میں سمیتا پاٹل ، شبانہ اعظمی اور کلبھوشن کھربندا نے مرکزی کردار ادا کئے تھے ۔ یہ فلم  باکس آفس پر سپر ہٹ ثابت ہوئی۔ اس کے ساتھ ہی  وہ ناقدین کا دل جیتنے میں بھی کامیاب رہے۔
 ۱۹۸۴ءمیں ریلیز ہونے والی فلم’سارانش‘ مہیش بھٹ کی ہدایت کاری میں ایک سپر ہٹ فلم ثابت ہوئی۔ اس فلم میں انوپم کھیر اور روہنی ہتھنگڑی اور سونی رازدان نے مرکزی کردار ادا کئے  تھے۔ مہشں بھٹ  کو ماسکو فلم فیسٹیول میں بہترین اسکرین پلے  کے لئے  ایوارڈ سے بھی نوازا گیا تھا۔۱۹۸۶ءمیں ریلیز ہونے والی فلم’نام‘مہیش بھٹ کی ہدایت کاری میں بننے والی اہم فلموں میں شمار کی جاتی ہے۔ اس فلم میں سنجے دت اور کمار گورو نے اہم کردار ادا کیےتھے۔ اگرچہ اس فلم کےسبھی گانے سپر ہٹ  ہوئے لیکن پنکج ادھاس کی شاندار  آواز میں گانا’’چٹھی آئی ہے وطن سے چٹھی آئی ہے‘ اب بھی سننے والوں کی آنکھوں کو نم کردیتا ہے۔
 ۱۹۹۰ءکی فلم’عاشقی‘ مہیش بھٹ کے فلمی سفر کی ایک اور سپر ہٹ فلم ثابت ہوئی۔ فلم کی کامیابی کے بعد  اداکار راہل رائے راتوں رات  اسٹار بن گئے۔۱۹۹۱ء کی فلم ’سڑک‘ کو مہیش بھٹ کی ہدایت کاری میں بننے والی اہم فلموں میں شمار کیا جاتا ہے۔ اس فلم میں سنجے دت اور پوجا بھٹ نے مرکزی کردار ادا کیے تھے۔۱۹۹۱ءمیں مہیش بھٹ کی ہدایت کاری میں ایک اور سپر ہٹ فلم ’دل ہے کہ مانتا نہیں‘ریلیز ہوئی۔ عامر خان اور پوجا بھٹ کے مرکزی کرداروں والی اس فلم کی کہانی ہالی ووڈ فلم ’اٹ ہیپنڈ ون نائٹ‘ پر مبنی تھی۔۱۹۹۳ءمیں مہیش بھٹ کو ایک بار پھر اداکار عامر خان کے ساتھ فلم ’ہم ہیں راہی پیار کے‘ میں کام کرنے کا موقع ملا جو ان کے فلمی  کیریئر کی ایک اور سپر ہٹ فلم ثابت ہوئی۔ اس فلم میں عامر خان اور جوہی چاولہ کی جوڑی کو ناظرین نے کافی پسند کیا۔
 ۱۹۹۵ءمیں مہیش بھٹ نے بھی چھوٹے پردے کا رخ کیا اور شوبھا ڈےکی کہانی’سوابھیمان‘کی ہدایت کاری کی۔ یہ سیریل ناظرین میں کافی  مقبول ہوا۔ ۱۹۹۸ءمیں ریلیز فلم’تمنا‘ کو مہیش بھٹ کی ہدایت کاری میں بننے والی اہم فلموں میں شمار کیا جاتا ہے۔ ۱۹۹۸ءمیں مہیش بھٹ کی ایک اور سپر ہٹ فلم’زخم‘ ریلیز ہوئی۔فلم میں اپنی بہترین اداکاری کے لئے اجے دیوگن کوجہاں بہترین اداکاری  کے قومی ایوارڈ  سے نوازا گیا وہیں مہیش بھٹ کو بہترین کہانی کے لئے فلم فیئر ایوارڈ  دیا گیا ۔مہیش بھٹ کو ان کے فلمی کریئر میں ۳؍ بار فلم فیئر ایوارڈ سے نوازا گیا۔ انہوں نے۳؍دہائی طویل فلمی کریر میں تقریباً ۵۰؍فلموں کی ہدایت کاری کی ہے۔