برطانیہ میں مقیم ہریانہ سے تعلق رکھنے والے ہندوستانی نژاد خاندان نے ایک غیر معمولی اعزاز حاصل کیا ہے جہاں ۲۳؍ سالہ تشار کمار اور ان کی والدہ پروین رانی ایک ہی وقت میں میئر منتخب ہوئے ہیں۔ تشار برطانیہ کے کم عمر ترین ہندوستانی نژاد میئر بن گئے جبکہ ان کی والدہ نے بھی ایک ہفتے بعد میئر کا عہدہ سنبھال لیا۔ یہ کامیابی برطانوی سیاست میں ہندوستانی برادری کی بڑھتی ہوئی نمائندگی کی علامت قرار دی جا رہی ہے۔

برطانیہ میں ہندوستانی نژاد ایک خاندان نے تاریخ رقم کرتے ہوئے ایک منفرد اور غیر معمولی اعزاز اپنے نام کر لیا ہے۔ ہریانہ سے تعلق رکھنے والے ۲۳؍ سالہ تشار کمار اور ان کی والدہ پروین رانی بیک وقت برطانیہ میں میئر منتخب ہو گئے ہیں۔ پی ٹی آئی کی رپورٹ کے مطابق، تشار کمار کو ۱۳؍ مئی کو ایلسٹری اینڈ بورہم ووڈ ٹاؤن کونسل کا میئر منتخب کیا گیا، جس کے ساتھ ہی وہ برطانیہ کے کم عمر ترین ہندوستانی نژاد میئر بن گئے۔ اس کے صرف ایک ہفتے بعد یعنی ۲۰؍ مئی کو ان کی والدہ پروین رانی کو ہارٹسمیر بورو کونسل کی میئر منتخب کر لیا گیا۔ یہ غیر معمولی کامیابی نہ صرف خاندان بلکہ برطانیہ میں مقیم ہندوستانی برادری کے لیے بھی باعث فخر سمجھی جا رہی ہے۔

یہ بھی پڑھئے: غزہ فلوٹیلا معاملہ: ملائیشیا اسرائیل کو عالمی عدالت میں لے جانے کی تیاری میں

اس خاندان کی جڑیں ہریانہ کے ضلع سونی پت کے روہنا گاؤں سے جڑی ہوئی ہیں، جبکہ وہ کئی برس تک روہتک میں مقیم رہے۔ خاندان ۲۰۱۳ء میں برطانیہ منتقل ہوا تھا۔ تشار کے والد سنیل دہیا کے مطابق، جب وہ برطانیہ آئے تو ان کے پاس مستقبل کے حوالے سے کوئی واضح منصوبہ نہیں تھا، تاہم مسلسل محنت اور سماجی خدمات نے انہیں اس مقام تک پہنچایا۔ تشار کمار نے کم عمری میں ہی عوامی زندگی میں قدم رکھا۔ وہ محض ۲۰؍ برس کی عمر میں کونسلر منتخب ہوئے اور ۲۰۲۳ء میں ایلسٹری اور بورہم ووڈ ٹاؤن کونسل کا حصہ بنے۔ بعد ازاں انہوں نے ڈپٹی میئر کے طور پر خدمات انجام دیں اور اب میئر منتخب ہو گئے ہیں۔

یہ بھی پڑھئے: بولیویا: حکومت مخالف مظاہرے شدید، صدر کے استعفے کا مطالبہ تیز

کنگز کالج (لندن) سے گریجویشن مکمل کرنے والے تشار اس سال ماسٹر ڈگری بھی حاصل کرنے والے ہیں۔ دوسری جانب، پروین رانی بھی مقامی سیاست اور کمیونٹی سروس میں ایک سرگرم شخصیت رہی ہیں۔ وہ اس سے قبل اسٹریٹ سین، پارکس، لیزر اینڈ کلچر کے لیے کیبنٹ ممبر، ہرٹسمیر کی ڈپٹی میئر، اور فلم و ٹیلی ویژن کی عالمی سفیر جیسے اہم عہدوں پر خدمات انجام دے چکی ہیں۔ خاندان کے مطابق، ماں اور بیٹے دونوں نے برطانیہ میں سماجی خدمات اور کمیونٹی پروگرامز میں بھرپور کردار ادا کیا ہے۔ وہ ہندی شکشا پریشد جیسی تنظیموں کے ذریعے برطانیہ میں پیدا ہونے والے بچوں کو مفت ہندی زبان بھی سکھاتے رہے ہیں۔

یہ بھی پڑھئے: ایران معاہدے پر ٹرمپ کو متاثر کرنے میں مشکل پیش آ رہی ہے: نیتن یاہو

تشار کمار نے اس موقع پر کہا کہ عمر کبھی بھی عوامی خدمت کی راہ میں رکاوٹ نہیں بننی چاہیے۔ ان کے مطابق نوجوان نسل کو چاہیے کہ وہ اپنی جڑوں سے جڑی رہے اور معاشرے میں مثبت کردار ادا کرے۔ برطانیہ میں ہندوستانی نژاد سیاستدانوں کی بڑھتی ہوئی نمائندگی کے درمیان اس ماں بیٹے کی کامیابی کو ایک تاریخی اور علامتی پیش رفت کے طور پر دیکھا جا رہا ہے، جس نے نہ صرف ہریانہ بلکہ پوری ہندوستانی برادری کو فخر کا موقع فراہم کیا ہے۔