’’بارڈر ۲‘‘ کے بعد اہان شیٹی اور میدھا رانا ایک بار پھر ساتھ نظر آئیں گے، ٹینو سریش دیسائی کی ہدایت کاری میں بننے والی ایکشن اور رومانوی فلم کی شوٹنگ بھوپال میں شروع ہوگئی ہے۔

بالی ووڈ میں اپنی شناخت بنانے والی اداکارہ میدھا رانا نے اداکار اہان شیٹی کی آئندہ فلم’’سنکی‘‘ میں شمولیت اختیار کرلی ہے۔ فلم میں وہ اہان شیٹی کی محبوبہ اور مرکزی خاتون کردار کے طور پر نظر آئیں گی۔ یہ فلم ایکشن، رومانس اور جذباتی کہانی کا امتزاج ہوگی، جس کی ہدایت کاری معروف فلم ساز ٹینو سریش دیسائی کررہے ہیں۔ میدھا رانا اور اہان شیٹی دونوں اس سے قبل فلم ’’بارڈر ۲‘‘ میں کام کرچکے ہیں، تاہم اس فلم میں دونوں کو الگ الگ اداکاروں کے ساتھ دکھایا گیا تھا۔ اب ’سنکی‘ میں پہلی مرتبہ دونوں مرکزی جوڑی کے طور پر پردے پر ایک ساتھ نظر آئیں گے۔ فلم کی شوٹنگ بھوپال میں شروع ہوچکی ہے اور میدھا بھی وہاں فلم کی ٹیم کے ساتھ شامل ہونے والی ہیں۔ میدھا رانا نے فلم ’’بارڈر ۲‘‘ میں اداکار ورون دھون کی اہلیہ دھنونتی کا کردار ادا کیا تھا۔ اس فلم میں ان کی اداکاری کو ناظرین کی جانب سے پذیرائی ملی۔ فلم میں سنی دیول، ورون دھون، اہان شیٹی، دلجیت دوسانجھ، مونا سنگھ، انیا سنگھ اور سونم باجوا سمیت کئی اہم اداکار شامل تھے۔ ’’بارڈر ۲‘‘ میں کامیابی کے بعد میدھا رانا اپنی اگلی فلم کے انتخاب میں جلدبازی نہیں کرنا چاہتی تھیں۔ وہ ایسے کردار کی تلاش میں تھیں جس میں انہیں اپنی اداکاری کے ساتھ ساتھ ایکشن صلاحیتوں کو بھی پیش کرنے کا موقع ملے۔ ’’سنکی‘‘ کی کہانی سننے کے بعد انہوں نے اس پروجیکٹ سے وابستہ ہونے کا فیصلہ کیا۔

یہ بھی پڑھئے:کرسٹیانو رونالڈو کا پرتگال کی قومی فٹ بال ٹیم سے ریٹائرمنٹ کا اعلان

فلم سے وابستہ اطلاعات کے مطابق میدھا رانا گزشتہ تقریباً دو ماہ سے اپنے کردار کی تیاری کررہی ہیں۔ اس دوران انہوں نے متعدد ورکشاپس میں حصہ لیا اور خصوصی تربیت حاصل کی تاکہ وہ اپنے کردار کے مختلف پہلوؤں کو بہتر انداز میں پیش کرسکیں۔ فلم میں ان کا کردار صرف رومانوی نہیں ہوگا بلکہ اس میں جذباتی شدت اور ایکشن کے عناصر بھی شامل ہوں گے۔ اداکارہ کے لیے یہ کردار اس لحاظ سے بھی اہم ہے کہ انہیں ایک مختلف انداز میں اپنی صلاحیتوں کا مظاہرہ کرنے کا موقع ملے گا۔

یہ بھی پڑھئے:رنبیر کپور اور یش کی’’رامائن‘‘ ایڈوانس بکنگ میں ’’چنئی ایکسپریس‘ سے بھی پیچھے

’’سنکی‘‘ کی ہدایت کاری ٹینو سریش دیسائی کررہے ہیں، جو اس سے قبل ’’رستم‘‘ اور’ ’مشن رانی گنج‘‘ جیسی فلموں کی ہدایت کاری کرچکے ہیں۔ فلم کو ایک ایکشن رومانوی ڈرامے کے طور پر پیش کیا جارہا ہے، جس میں محبت، جذبات اور بھرپور ایکشن دیکھنے کو ملے گا۔ تاہم فلم کی اصل کہانی اور کرداروں سے متعلق تفصیلات کو فی الحال خفیہ رکھا گیا ہے۔ فلم کے پروڈیوسر اداروں میں وی دی پیپل، روئرنگ ریور پروڈکشنز اور پالس اینڈ پیئرز انٹرٹینمنٹ شامل ہیں۔
 فلم’ ’سنکی‘‘ کی شوٹنگ فی الحال بھوپال میں جاری ہے اور اسے ۲۰۲۷ء کی پہلی ششماہی میں سنیما گھروں میں ریلیز کرنے کا منصوبہ ہے۔ فلم کا پہلا لک بھی جلد جاری کیے جانے کی توقع ہے۔ اہان شیٹی اور میدھا رانا کی نئی جوڑی کو لے کر فلمی حلقوں میں دلچسپی پیدا ہوگئی ہے، خاص طور پر اس لیے کہ دونوں ’’بارڈر ۲‘‘ کے بعد ایک بار پھر ساتھ کام کررہے ہیں، لیکن اس مرتبہ ان کا رشتہ پردے پر رومانوی ہوگا۔واضح رہے کہ میدھا رانا نے ۲۰۲۲ء میں ویب سیریز ’’لندن فائلز‘‘ کے ذریعے اداکاری کی دنیا میں قدم رکھا تھا، جس میں انہوں نے ارجن رامپال اور پورب کوہلی کے ساتھ کام کیا۔ اس کے بعد وہ فلم’ ’فرائیڈے نائٹ پلان‘‘ میں بھی نظر آئیں۔ دوسری جانب اہان شیٹی نے فلم ’’تڑپ‘‘ سے بالی ووڈ میں اپنے کریئر کا آغاز کیا تھا۔ اب ’’سنکی‘‘ ان کے آئندہ اہم پروجیکٹس میں شمار کی جارہی ہے۔