سپر اسٹار رجنی کانت کی مشہور سائنس فکشن فلم ’’ایندھرن‘‘ (Enthiran/Robot) سے متعلق ایک ایسا راز سامنے آیا ہے جس نے ہندوستانی سنیما اور عالمی موسیقی کے مداحوں کی توجہ حاصل کرلی ہے۔ معروف موسیقار ایس تھمن نے انکشاف کیا ہے کہ آسکر ایوارڈ یافتہ موسیقار اے آر رحمان اور عالمی شہرت یافتہ پاپ اسٹار مائیکل جیکسن فلم ’’ایندھرن‘‘ کے لیے ایک خصوصی گانے پر مل کر کام کرنے والے تھے۔

سپر اسٹار رجنی کانت  کی مشہور سائنس فکشن فلم ’’ایندھرن‘‘ (Enthiran/Robot)  سے متعلق ایک ایسا راز سامنے آیا ہے جس نے ہندوستانی سنیما اور عالمی موسیقی کے مداحوں کی توجہ حاصل کرلی ہے۔ معروف موسیقار  ایس تھمن  نے انکشاف کیا ہے کہ آسکر ایوارڈ یافتہ موسیقار  اے آر رحمان  اور عالمی شہرت یافتہ پاپ اسٹار  مائیکل جیکسن  فلم ’’ایندھرن‘‘ کے لیے ایک خصوصی گانے پر مل کر کام کرنے والے تھے۔ تاہم مائیکل جیکسن کی جون ۲۰۰۹ء میں اچانک موت کے باعث یہ تاریخی میوزیکل تعاون مکمل نہ ہوسکا۔

یہ بھی پڑھئے:خواتین کی کرکٹ ٹیم نے ہندوستان کو ایشین گیمز میں پہلا طلائی تمغہ دلایا

ایس تھمن نے حالیہ گفتگو میں بتایا کہ اے آر رحمان نے مائیکل جیکسن کے ساتھ رجنی کانت کی فلم کے لیے ایک گانا بنانے کا منصوبہ بنایا تھا۔ تھمن کے مطابق دونوں فنکار صرف ابتدائی بات چیت تک محدود نہیں رہے تھے بلکہ ان کی ملاقات ہوئی اور گانے کے تصور پر بھی کام کیا گیا تھا۔تھمن نے بتایا کہ مائیکل جیکسن نے  مئی۲۰۰۹ء میں اس منصوبے کے لیے معاہدے پر دستخط کیے تھے، لیکن اس کے صرف ایک ماہ بعد ۲۵؍ جون ۲۰۰۹ءکو ان کا انتقال ہوگیا۔ یوں یہ ممکنہ تاریخی تعاون مکمل ہونے سے پہلے ہی ختم ہوگیا۔
 یہ بات پہلی مرتبہ سامنے نہیں آئی۔ اے آر رحمان خود بھی ۲۰۲۴ء میں مائیکل جیکسن سے اپنی ملاقات اور فلم ’’ایندھرن‘‘ کے لیے ان کے ساتھ کام کرنے کی کوشش کے بارے میں بتا چکے ہیں۔ رحمان کے مطابق  ۲۰۰۹ء میں ’’سلم ڈاگ ملیئینر‘‘ کے لیے آسکر جیتنے کے بعد انہوں نے لاس اینجلس میں مائیکل جیکسن سے ملاقات کی تھی۔ دونوں نے موسیقی اور عالمی امن سمیت مختلف موضوعات پر گفتگو کی۔ جیکسن نے رحمان سے ایک ممکنہ نئے  ’We Are the World‘  جیسے منصوبے پر بھی بات کی تھی۔
ہندوستان واپس آنے کے بعد رحمان نے فلم کے ہدایت کار  شنکر  کو مائیکل جیکسن سے ملاقات کے بارے میں بتایا۔ شنکر نے رحمان سے پوچھا کہ کیا مائیکل جیکسن فلم ’’ایندھرن‘‘ کے لیے گانا گا سکتے ہیں۔ رحمان نے جیکسن سے رابطہ کیا تو وہ اس تعاون کے لیے تیار ہوگئے تھے۔ رحمان کے مطابق جیکسن نے کہا تھا کہ وہ مل کر جو بھی منصوبہ بنائیں گے، اس پر کام کریں گے۔ دونوں کی مزید ملاقات بھی ہوئی، لیکن جیکسن کی طبیعت خراب تھی اور جون  ۲۰۰۹ء میں ان کا انتقال ہوگیا۔ فلم ’’ایندھرن‘‘میں رجنی کانت اور  ایشوریا رائے بچن  نے مرکزی کردار ادا کیے تھے جبکہ فلم کی ہدایت کاری شنکر نے کی تھی اور موسیقی اے آر رحمان نے دی تھی۔ فلم  ۲۰۱۰ء میں ریلیز ہوئی اور اپنی جدید ٹیکنالوجی، بڑے پیمانے کے ویژول ایفیکٹس اور موسیقی کی وجہ سے نمایاں رہی۔ایسے میں اگر مائیکل جیکسن بھی فلم کے میوزک کا حصہ بن جاتے تو یہ ہندوستان سنیما اور عالمی پاپ میوزک کے درمیان ایک غیر معمولی اشتراک ہوتا۔ ایس تھمن نے بھی اس ممکنہ تعاون کو ایک ایسی یاد قرار دیا جس کی اہمیت طویل عرصے تک برقرار رہتی۔

یہ بھی پڑھئے:شہزادی ڈائنا کی آخری رسومات سے متعلق دعویٰ تنازع کا مرکز بن گیا

ایس تھمن نے اسی گفتگو میں ایک اور بین الاقوامی میوزیکل تعاون کا ذکر کیا۔ انہوں نے بتایا کہ رام چرن کی فلم’’گیم چینجر‘‘  کے گانے  ’’ڈوپ ‘‘ کے لیے عالمی پاپ اسٹار  برٹنی اسپئیرز  کو شامل کرنے کی کوشش کی گئی تھی۔تھمن کے مطابق اس گانے کو انگریزی میں ایک بین الاقوامی سنگل کے طور پر پیش کرنے کا منصوبہ تھا اور ٹیم نے برٹنی اسپئیرز سمیت عالمی فنکاروں سے رابطہ کرنے کی کوشش کی، لیکن فلم کی ریلیز میں تاخیر کے باعث یہ منصوبہ بھی عملی شکل اختیار نہ کرسکا۔ مائیکل جیکسن اور اے آر رحمان کا فلم ’’ایندھرن‘‘ کے لیے ممکنہ تعاون آج بھی ہندوستانی فلمی موسیقی کی ان بڑی نامکمل کہانیوں میں شمار کیا جاتا ہے جو پردے پر تو نہیں آسکیں، لیکن ان کی تفصیل سامنے آنے کے بعد مداحوں کو اندازہ ہوتا ہے کہ اس دور میں بھارتی سنیما عالمی موسیقی کے بڑے ناموں کے ساتھ کس قدر بڑے تجربات کی منصوبہ بندی کر رہا تھا۔