گلوکارہ مونالی ٹھاکر نے فلم ’’ان پڑھ‘‘ کے کلاسک گیت ’’آپ کی نظروں نے سمجھا‘‘ گا کر دھرمیندر کو خراج عقیدت پیش کیا۔

لیجنڈری بالی ووڈ اداکار دھرمیندر ۲۴؍ نومبر ۲۰۲۵ء کو دنیا سے رخصت ہوئے۔ ان کے انتقال کے بعد فلمی دنیا اور مداحوں کی جانب سے تعزیت اور خراجِ عقیدت کا سلسلہ جاری ہے۔ اسی سلسلے میں گلوکارہ مونالی ٹھاکر نے ایک خصوصی تقریب میں دھرمیندر کو جذباتی انداز میں یاد کیا اور ان کی فلم ’’ان پڑھ‘‘ کے لازوال گیت ’’آپ کی نظروں نے سمجھا‘‘ کو نہایت خوبصورتی سے پیش کیا۔ تقریب کے ویڈیو میں دیکھا جا سکتا ہے کہ مونالی نہایت سادگی اور خلوص سے یہ کلاسک گانا پیش کر رہی ہیں۔ ان کی آواز نے پورے ماحول کو جذباتی اور پراثر بنا دیا۔

یہ بھی پڑھئے: ویر داس کا ممبئی کی خراب فضائی آلودگی پر طنزیہ گانا

سامعین نے خاموشی اور احترام کے ساتھ اس لمحے کو محسوس کیا، کچھ نے اسے موبائل میں محفوظ کیا جبکہ کئی لوگ اس گیت سے جڑی پرانی یادوں میں کھو گئے۔ واضح رہے کہ ’’ان پڑھ‘‘ کی ہدایت کاری موہن کمار نے کی تھی اور فلم میں بلراج ساہنی، دھرمیندر، مالا سنہا اور ششی کلا نے اہم کردار نبھائے تھے۔ ’’آپ کی نظروں نے سمجھا‘‘ کو لتا منگیشکر نے گایا، خیام نے کمپوز کیا اور اس کے بول راجہ مہدی علی خان نے لکھے تھے۔

دھرمیندر کی آخری جھلک
دھرمیندر جلد اپنی آخری فلم ’’اکیس‘‘ میں نظر آئیں گے۔ حال ہی میں فلم سازوں نے ان کی لکھی ہوئی آخری پنجابی نظم کا ویڈیو شیئر کیا، جس میں وہ خود اس نظم کو پڑھتے ہوئے دکھائی دیتے ہیں۔ نظم کا عنوان ہے: ’’آج بھی جی کردا ہے، پنڈ اپنے نو جانو۔‘‘ یہ ان کے گہرے جذبات اور اپنے گاؤں سے بے پناہ محبت کو خوبصورتی سے بیان کرتی ہے۔ فلمسازوں نے سوشل میڈیا پر نظم شیئر کرتے ہوئے لکھا:’’دھرم جی مٹی کے سچے بیٹے تھے، ان کے الفاظ بھی اسی مٹی کی خوشبو رکھتے ہیں۔ یہ نظم ایک تڑپ ہے… ایک افسانے سے دوسرے افسانے کو خراجِ عقیدت۔‘‘

یہ بھی پڑھئے: ۵۶؍ویں ہندوستانی بین الاقوامی فلمی میلے میں ہندوستان کی تخلیقی شخصیات کو یاد کیا گیا

دھرمیندر اور اسرانی کی آخری جھلک
ویڈیو کا ایک انتہائی اہم لمحہ وہ تھا جب دھرمیندر اور کامیڈین اسرانی ایک ساتھ اسکرین پر نظر آئے۔ شائقین کیلئے انہیں ایک ساتھ دیکھنا ایک جذباتی منظر تھا۔