ہدایت کار نتیش تیواری کی متوقع فلم ’’رامائن‘‘ ریلیز سے قبل ایک نئے تنازع کا شکار ہو گئی ہے۔ شری رام لیلا مہاسنگھ نے فلم سازوں سے مطالبہ کیا ہے کہ فلم کی دیوالی پر عالمی ریلیز سے پہلے تنظیم کے نمائندوں کے لیے خصوصی اسکریننگ رکھی جائے۔ تنظیم کے صدر ارجن کمار نے کہا کہ وہ ’’آدی پورش‘‘ جیسی مبینہ غلطیوں کی تکرار نہیں چاہتے اور دعویٰ کیا کہ رنبیر کپور کی بھگوان رام کی پیشکش ’’کمزور‘‘ محسوس ہوتی ہے۔

ہدایت کار نتیش تیواری کی بڑے بجٹ کی فلم ’’رامائن‘‘ کی ریلیز سے قبل ایک نیا تنازع سامنے آ گیا ہے۔ شری رام لیلا مہاسنگھ نے فلم کے پروڈیوسرز کو باضابطہ خط لکھ کر مطالبہ کیا ہے کہ فلم کی ہندوستان اور بیرونِ ملک ریلیز سے پہلے تنظیم کے ایک وفد کو خصوصی طور پر فلم دکھائی جائے تاکہ اس بات کا جائزہ لیا جا سکے کہ مذہبی جذبات کو ٹھیس پہنچانے والی کوئی بات یا منظر موجود نہ ہو۔ مہاسنگھ کے صدر ارجن کمار نے کہا کہ ’’ہم ‘آدی پورش’ جیسی غلطیوں کی دوبارہ تکرار نہیں چاہتے۔ اس لیے ضروری ہے کہ فلم ریلیز سے پہلے ہمیں دکھائی جائے تاکہ اگر کوئی اعتراض ہو تو اسے بروقت دور کیا جا سکے۔‘‘

یہ بھی پڑھئے: ’’فلم چار دیواری انسان کے نفسیاتی پہلوؤں کو ظاہر کرتی ہے‘‘

ارجن کمار نے فلم میں رنبیر کپور کی بھگوان رام کے کردار سے متعلق بھی تحفظات کا اظہار کرتے ہوئے کہا کہ ’’رنبیر کپور کی بھگوان رام کے طور پر پیشکش کمزور محسوس ہوتی ہے۔‘‘ انہوں نے مزید خبردار کیا کہ ’’اگر ہماری درخواست کو نظر انداز کیا گیا تو ہم ملک بھر میں احتجاج کرنے پر مجبور ہوں گے۔‘‘ مہاسنگھ کا کہنا ہے کہ ۲۰۲۳ء میں ریلیز ہونے والی فلم ’’آدی پورش‘‘ کے بعد مذہبی موضوعات پر بننے والی فلموں کے حوالے سے عوامی حساسیت بہت بڑھ گئی ہے، اس لیے وہ چاہتے ہیں کہ اس بار کسی بھی ممکنہ تنازع سے پہلے ہی بچا جائے۔

یہ بھی پڑھئے: ریتیش دیشمکھ کی ملازمت خطرے میں ہے، سلمان خان کے مذاق سے سوشل میڈیا پرہلچل

ابھی تک ’’رامائن‘‘ کے پروڈیوسرز، ہدایت کار نتیش تیواری یا مرکزی اداکار رنبیر کپور کی جانب سے اس تازہ مطالبے پر کوئی باضابطہ ردِعمل سامنے نہیں آیا۔ فلم میں رنبیر کپور بھگوان رام، سائی پلوی سیتا، یش راون، سنی دیول ہنومان اور روی دوبے لکشمن کے کردار ادا کر رہے ہیں۔ فلم دیوالی ۲۰۲۶ء پر ریلیز ہونا طے ہے۔ قابلِ ذکر ہے کہ حالیہ دنوں میں رنبیر کپور نے اپنے انتخاب پر ہونے والی تنقید کے جواب میں کہا تھا کہ ’’بھگوان رام کے کردار کے لیے کوئی ایک’’صحیح‘‘ چہرہ نہیں ہو سکتا۔ ہر شخص کی اپنی تشریح ہوتی ہے۔‘‘ 
فلم ’’رامائن‘‘ کو ہندوستانی سنیما کے سب سے بڑے منصوبوں میں شمار کیا جا رہا ہے، تاہم ریلیز سے کئی ماہ قبل ہی اس کے گرد مذہبی نمائندگی، کاسٹنگ اور تاریخی و ثقافتی درستگی سے متعلق بحث ایک بار پھر شدت اختیار کر گئی ہے۔