اکیڈمی ایوارڈز کے آئندہ ایڈیشنز کے شیڈول اور نشر کرنے کے طریقہ کار میں بڑی تبدیلیوں کا اعلان کر دیا گیا ہے۔ ۹۹؍ واں آسکر ۱۴؍ مارچ ۲۰۲۷ء جبکہ ۱۰۰؍ واں آسکر ۵؍ مارچ ۲۰۲۸ء کو منعقد ہوگا۔ تقریب کے مقام کو بھی مستقبل میں تبدیل کیا جا رہا ہے، جبکہ نشریاتی حقوق اے بی سی سے منتقل ہو کر ڈجیٹل پلیٹ فارمز کو دے دئیے گئے ہیں۔ اکیڈمی آف موشن پکچر آرٹس اینڈ سائنس کے مطابق یہ تبدیلیاں ناظرین کے تجربے کو جدید بنانے کیلئے کی جا رہی ہیں۔

اکیڈمی ایوارڈز، جو دنیا کے سب سے معتبر فلمی اعزازات میں شمار کئے جاتے ہیں، نے اپنی آئندہ تقریبات کے شیڈول، مقام اور نشریاتی حکمت عملی میں اہم تبدیلیوں کا باضابطہ اعلان کر دیا ہے۔ اکیڈمی آف موشن پکچر آرٹس اینڈ سائنس کی جانب سے جاری کردہ تازہ ترین تفصیلات کے مطابق ۹۹؍ واں آسکر ایوارڈز ۱۴؍ مارچ ۲۰۲۷ء بروز اتوار منعقد ہوگا، جبکہ ۱۰۰؍ ویں سالگرہ کے موقع پر ۲۰۲۸ء کا آسکر ۵؍ مارچ کو منعقد کیا جائے گا۔ دونوں تقریبات کا آغاز مقامی وقت کے مطابق شام ۷؍ بجے (امریکی وقت) کیا جائے گا۔

رپورٹس کے مطابق یہ دونوں ایڈیشنز ’’ڈولبی تھیٹر‘‘ میں منعقد کئے جانے والے آخری ایونٹس ہوں گے، جہاں یہ تقریب گزشتہ کئی دہائیوں سے منعقد ہوتی رہی ہے۔ اس کے بعد آسکرز کو لاس اینجلس کے ’’ایل اے لایئو‘‘ کمپلیکس میں منتقل کر دیا جائے گا، جہاں ’’پیکوک تھیٹر‘‘ مرکزی مقام کے طور پر استعمال کیا جائے گا۔ یہ منتقلی ایک نئے معاہدے کے تحت عمل میں لائی جا رہی ہے، جو اکیڈمی آف موشن پکچر آف آرٹس اینڈ سائنس اور اے ای جی کے درمیان طے پایا ہے۔ اس معاہدے کی مدت ۱۰؍ سال رکھی گئی ہے، جس کی تصدیق ۲۶؍ مارچ ۲۰۲۶ء کو کی گئی تھی۔

مقام کی تبدیلی کے ساتھ ساتھ نشریاتی نظام میں بھی ایک بڑی تبدیلی سامنے آئی ہے۔ اطلاعات کے مطابق آسکرز کے اسٹریمنگ حقوق اب یوٹیوب کو منتقل کر دیے گئے ہیں، جس کے باعث اے بی سی کے ساتھ طویل عرصے سے جاری شراکت داری ختم ہو جائے گی۔ یہ شراکت داری ۱۹۷۶ء سے جاری تھی اور تقریباً ۵۳؍ سال تک آسکرز اسی چینل پر نشر ہوتے رہے۔ نئے انتظام کے تحت ۱۰۱؍ واں آسکر، جو ممکنہ طور پر مارچ ۲۰۲۹ء کے اوائل میں منعقد ہوگا، ایک ڈجیٹل اسٹریمنگ سروس کے ذریعے براہ راست نشر کیا جائے گا، جہاں ناظرین کو مفت لائیو اسٹریمنگ کی سہولت بھی فراہم کی جائے گی۔

یہ بھی پڑھئے: مدھوبالا کی بایوپک کیلئے سارہ ارجن کو منتخب کیا گیا: رپورٹ

اکیڈمی کے مطابق یہ تبدیلیاں ناظرین کے تجربے کو مزید بہتر بنانے اور ڈجیٹل دور کے تقاضوں سے ہم آہنگ کرنے کیلئے کی جا رہی ہیں۔ اس کے ساتھ ساتھ ریڈ کارپٹ پری شو، پسِ پردہ مواد، نامزدگیوں کے اعلانات اور دیگر خصوصی پروگرام بھی اسی ڈجیٹل حکمت عملی کا حصہ ہوں گے۔ یہ پیش رفت اس بات کی عکاسی کرتی ہے کہ عالمی سطح پر بڑے ایوارڈ شوز بھی اب روایتی نشریاتی پلیٹ فارمز سے ہٹ کر ڈجیٹل اسٹریمنگ کی جانب تیزی سے منتقل ہو رہے ہیں، تاکہ وسیع تر ناظرین تک رسائی حاصل کی جا سکے۔