بالی ووڈ کی ہٹ ایکشن فلم Kill کے سیکوئل Kill 2 کی باضابطہ تیاری شروع ہو گئی ہے۔ اداکار لکشیا ایک بار پھر کمانڈو امرت راٹھوڈ کے کردار میں نظر آئیں گے، جبکہ کہانی پہلے ہی فائنل کر لی گئی ہے۔ فلم کو بڑے پیمانے پر مزید شدید ایکشن اور نئے انداز کے ساتھ پیش کیا جائے گا۔

حالیہ برسوں کی سب سے زیادہ شدید اور حقیقت کے قریب ایکشن فلموں میں شمار ہونے والی ’’کِل‘‘ اب اپنے سیکوئل کے ساتھ واپس آرہی ہے۔ رپورٹس کے مطابق ’’کِل ۲‘‘ باضابطہ طور پر ڈیولپمنٹ کے مرحلے میں داخل ہو چکی ہے، جس میں مرکزی کردار کے لیے لکشیا کی واپسی تقریباً طے ہے۔ فلم ایک بار پھر دھرما پروڈکشن اور سکھیا انٹرٹینمنٹ کے اشتراک سے بنائی جائے گی۔ اطلاعات کے مطابق سیکوئل کی کہانی مکمل طور پر تیار کر لی گئی ہے اور پری پروڈکشن کا آغاز رواں سال ستمبر کے آس پاس متوقع ہے۔
نئی فلم کے بارے میں بتایا جا رہا ہے کہ اس میں کہانی کو ایک بالکل نئی ترتیب اور ٹائم لائن میں منتقل کیا جائے گا، جبکہ اصل فلم کا خام اور زمینی ایکشن اسٹائل برقرار رکھا جائے گا۔ سیکوئل کو پہلے سے کہیں بڑے پیمانے پر تیار کیا جا رہا ہے، جہاں لڑائی اور زیادہ خطرناک مشنز کو مرکزی حیثیت دی جائے گی۔ اس بار بھی کہانی ایک این ایس جی کمانڈو کے گرد گھومے گی جو ایک انتہائی منظم اور مسلح دشمن گروہ کے خلاف لڑتا دکھائی دے گا، جس سے فلم میں ایک بار پھر ہائی آکٹین ایکشن کی توقع کی جا رہی ہے۔

یہ بھی پڑھئے: فلم ’’راجا شیواجی ‘‘ کی ریلیز سے قبل وکی کوشل اور رتیش دیشمکھ کی ملاقات

تاہم، کیمرے کے پیچھے ایک بڑی تبدیلی سامنے آئی ہے۔ نکھل ناگیش بھٹ جنہوں نے پہلی فلم کی ہدایت کاری کی تھی، سیکوئل کا حصہ نہیں ہوں گے کیونکہ وہ اپنے نئے پروجیکٹ میں مصروف ہیں جس میں سنی دیول شامل ہیں۔ اس کے باعث پروڈیوسرز اس وقت نئے ہدایتکار کی تلاش میں مختلف ناموں پر غور کر رہے ہیں۔ دوسری جانب، لکشیا کو فلم کے لیے سخت جسمانی تیاری اور جدید جنگی انداز کی تربیت سے گزرنا ہوگا۔ رپورٹس کے مطابق شوٹنگ ۲۰۲۶ء کے آخر میں شروع ہو سکتی ہے۔ فی الحال وہ ٹائیگر شروف اور جھانوی کپور کے ساتھ اپنی فلم ’’لگ جا گلے‘‘ کی شوٹنگ میں مصروف ہیں، جس کے بعد وہ سیکوئل کی تیاری شروع کریں گے۔

یہ بھی پڑھئے: نمرت کور اہلووالیہ کا نیا فرنچ لُک موضوع بحث

یاد رہے کہ ’’کِل‘‘ نے عالمی سطح پر خاصی پذیرائی حاصل کی تھی۔ اس کا پریمیر ٹورنٹو انٹرنیشنل فلم فیسٹیول میں ہوا تھا، جہاں اسے مڈنائٹ میڈنیس کیٹیگری میں رنر اپ قرار دیا گیا۔ بعد ازاں اسے ٹرائیبیکا فلم فیسٹیول میں بھی پیش کیا گیا اور جولائی ۲۰۲۴ء میں تھیٹر ریلیز کے بعد ناقدین کی تعریف سمیٹی۔ فلم کی کامیابی کا اندازہ اس بات سے لگایا جا سکتا ہے کہ اس نے دنیا بھر میں تقریباً ۶۰؍ ملین ڈالر کا بزنس کیا۔ اس کے ساتھ ہی ہالی ووڈ میں بھی اس کے انگریزی ریمیک پر کام جاری ہے، جسے لائنس گیٹ اور ۸۷؍ الیون انٹرٹینمنٹ تیار کر رہے ہیں، جو ’’جان وِک‘‘ جیسی مشہور فرنچائز کے پیچھے موجود ہیں۔