’’بھاگم بھاگ‘‘ کے ممکنہ سیکوئل کی خبروں کے بعد اب پریہ درشن کی ایک اور ہٹ کامیڈی ’’مالا مال ویکلی‘‘ کے فالو اپ کی اطلاعات سامنے آئی ہیں۔ ذرائع کے مطابق اصل کاسٹ سے رابطے شروع ہو چکے ہیں، اگرچہ یہ براہِ راست سیکوئل نہیں ہوگا بلکہ نئی کہانی اور کرداروں کے ساتھ پیش کیا جائے گا۔

چند ہفتے قبل ’’بھاگم بھاگ‘‘ کے سیکوئل کی رپورٹس منظرعام پر آئیں، جن میں زیادہ تر اصل کاسٹ کی واپسی کی بات کی گئی، البتہ گووندہ کی جگہ منوج باجپائی کے شامل ہونے کی قیاس آرائیاں بھی سامنے آئیں۔ اب اسی سلسلے میں فلمساز پریہ درشن کی ایک اور کامیاب فلم ’’مالا مال ویکلی‘‘ کے سیکوئل پر کام شروع ہونے کی اطلاعات ہیں۔
رپورٹس کے مطابق، میکرز نے اصل کاسٹ پریش راول، رتیش دیشمکھ، اور راج پال یادو سے رابطہ کیا ہے۔ ذرائع کے مطابق ’’مالا مال ویکلی ۲‘‘ کے لیے بات چیت شروع ہو چکی ہے۔ یہ براہِ راست سیکوئل نہیں ہوگا، بلکہ نئی ترتیب اور مختلف کرداروں کے ساتھ پیش کیا جائے گا۔ تاہم مرکزی خیال لالچی دیہاتیوں کے گرد ہی گھومے گا جو بڑی رقم ہتھیانے کی کوشش کرتے ہیں۔‘‘
ذرائع کا کہنا ہے کہ پریش راول نے زبانی منظوری دے دی ہے، اگرچہ معاہدہ تاحال فائنل نہیں ہوا، جبکہ دیگر اداکاروں سے مذاکرات جاری ہیں۔ ۲۰۰۶ء میں ریلیز ہونے والی ’’مالا مال ویکلی‘‘ ایک چھوٹے گاؤں کی کہانی تھی جہاں ایک شخص کو معلوم ہوتا ہے کہ ایک دیہاتی نے ایک کروڑ روپے کی لاٹری جیتی، مگر اچانک اس کی موت ہو جاتی ہے۔ اس کے بعد گاؤں والے لاٹری انسپکٹر سے حقیقت چھپانے اور رقم پر قبضہ جمانے کے لیے مضحکہ خیز منصوبے بناتے ہیں۔
فلم میں ریما سین، شکتی کپور، سدھا چندرن اور دیگر اداکار بھی شامل تھے۔ وقت گزرنے کے ساتھ یہ فلم ۲۰۰۰ء کی دہائی کی مقبول ترین کامیڈی فلموں میں شمار ہونے لگی اور ایک ’’کلٹ‘‘ درجہ حاصل کر چکی ہے۔ سیکوئل کیلئے شائقین میں جوش ہے، مگر چیلنج یہ ہوگا کہ نئی کہانی کس حد تک پرانی فلم کے دیہی مزاح اور سادہ مگر طنزیہ انداز کو برقرار رکھ پاتی ہے۔ حالیہ برسوں میں سیکوئلز کی بڑھتی ہوئی تعداد نے ناظرین کی توقعات کو بھی بلند کر دیا ہے، اور کسی بھی فالو اپ کے لیے اصل فلم کی یادگار کامیابی کا بوجھ اٹھانا آسان نہیں ہوگا۔