’’ویلکم ۴‘‘ پر باضابطہ طور پر کام شروع ہو گیا ہے اور فلم کا اسکرپٹ تیاری کے آخری مراحل میں داخل ہو چکا ہے۔ پروڈیوسر فیروز ناڈیاڈوالا نے تصدیق کی ہے کہ اس بار فلم پہلے سے زیادہ بڑے پیمانے پر تیار کی جا رہی ہے اور اس میں متعدد مزاحیہ ڈان کردار بھی شامل ہوں گے۔

اکشے کمار کی مقبول کامیڈی فرنچائز کی نئی قسط ’’ویلکم ۴‘‘ پر باضابطہ طور پر کام شروع ہو گیا ہے اور فلم کا اسکرپٹ تیاری کے آخری مراحل میں داخل ہو چکا ہے۔ پروڈیوسر فیروز ناڈیاڈوالا نے تصدیق کی ہے کہ اس بار فلم پہلے سے زیادہ بڑے پیمانے پر تیار کی جا رہی ہے اور اس میں متعدد مزاحیہ ڈان کردار بھی شامل ہوں گے۔ اس آنے والی فلم میں انیل کپور، نانا پاٹیکر اور پریش راول جیسے مقبول کرداروں کی واپسی متوقع ہے، جنہوں نے فرنچائز کی پہلی فلموں میں اپنی مزاحیہ اداکاری سے ناظرین کو بے حد محظوظ کیا تھا۔ پروڈیوسر فیروز ناڈیاڈوالا نے تصدیق کی ہے کہ ویلکم فرنچائز کی چوتھی قسط پر تیزی سے کام جاری ہے۔ ایک انٹرویو میں انہوں نے بتایا کہ فلم کا اسکرپٹ اس وقت ایڈوانس مرحلے میں ہے اور ٹیم جلد ہی اس کے بارے میں مزید تفصیلات شیئر کرے گی۔

یہ بھی پڑھئے: جنید خان اور سائی پلوی کی ’’ایک دن‘‘ کا ٹریلر جاری، کہانی یکطرفہ محبت پر مرکوز

انہوں نے کہا کہ فلم کے لیے جس موسیقی اور ایکشن کی منصوبہ بندی کی جا رہی ہے وہ بہت بڑے پیمانے پر ہوگی۔ ان کے مطابق اس بار فلم کی موسیقی کو عالمی انداز دینے کے لیے مشرق وسطیٰ، افریقہ، امریکہ اور چین سمیت مختلف خطوں کے موسیقاروں کے ساتھ مل کر کثیر ثقافتی موسیقی تیار کرنے کا منصوبہ بنایا گیا ہے۔ فیروز ناڈیاڈوالا نے مزید بتایا کہ اس فلم میں مشہور کردار ادے بھائی، مجنوں بھائی اور ڈاکٹر گھنگرو ایک ساتھ نظر آئیں گے اور اس بار کہانی میں ایک سے زیادہ ڈان بھی شامل ہوں گے۔ ان کے مطابق یہ کردار جب ایک ساتھ سامنے آئیں گے تو اس کا اثر بہت بڑا ہوگا اور ناظرین کے لیے یہ ایک یادگار تجربہ ثابت ہو سکتا ہے۔

یہ بھی پڑھئے: اکشے کمار کی ’’بھوت بنگلہ‘‘ کا نیا پوسٹرجاری، مداحوں نے کہا: گرو جی بس!

رپورٹس کے مطابق فلم کی اسکرپٹ کو اس انداز میں لکھا جا رہا ہے کہ نانا پاٹیکر، انیل کپور اور پریش راول کے کرداروں کو کہانی میں فطری انداز میں دوبارہ شامل کیا جا سکے۔ فلم کی کہانی اس بار پہلے حصوں سے مختلف ہوگی، تاہم مزاح اور انڈرورلڈ کے عناصر بدستور اس کا اہم حصہ رہیں گے۔ ذرائع کا کہنا ہے کہ اس نئی قسط میں کئی ایسے مزاحیہ ڈان کردار ہوں گے جو اپنی مجرمانہ سرگرمیوں سے زیادہ اپنی مزاحیہ حرکات اور دلچسپ ٹائمنگ کے لیے جانے جائیں گے۔ ان کرداروں کے لیے کئی معروف اداکاروں سے بات چیت بھی جاری ہے۔

یہ بھی پڑھئے: ابراہیم کو بالی ووڈ میں اپنا راستہ خود بنانا ہوگا: سیف علی خان

ویلکم فرنچائز کی مقبولیت کی ایک بڑی وجہ اس کے یادگار کردار رہے ہیں۔ انیل کپور کے ادا کردہ مجنوں بھائی اور نانا پاٹیکر کے کردار ائے شیٹی کو آج بھی بالی ووڈ کے سب سے دلچسپ مزاحیہ کرداروں میں شمار کیا جاتا ہے۔ ان دونوں کی اسکرین پر کیمسٹری اور مزاحیہ انداز کو شائقین نے بے حد پسند کیا تھا۔ اسی طرح پریش راول کا کردار ڈاکٹر گھنگرو بھی فلم کی کامیابی کا اہم حصہ رہا ہے۔ ان کی منفرد اداکاری اور مزاحیہ انداز نے اس کردار کو فرنچائز کا ایک یادگار عنصر بنا دیا تھا۔ حال ہی میں انیل کپور نے بھی اس فلم کے بارے میں بات کرتے ہوئے کہا کہ انہوں نے پہلی فلم اکشے کمار کے ساتھ کی تھی، دوسری فلم میں اکشے کمار شامل نہیں تھے جبکہ تیسری قسط میں انہیں شامل نہیں کیا گیا۔ ان کے مطابق اب چوتھی فلم میں وہ دوبارہ اکشے کمار کے ساتھ کام کرنے کے لیے پرجوش ہیں۔