اداکار راگھو جویال نے ان خبروں کو مسترد کر دیا ہے جن میں دعویٰ کیا جا رہا تھا کہ وہ شاہ رخ خان کی آئندہ فلم ’’کنگ‘‘ میں مرکزی ویلن کے نوجوان روپ کا کردار ادا کریں گے۔ راگھو نے ان رپورٹس کو ’’سراسر جھوٹ‘‘ قرار دیتے ہوئے کہا کہ فلم کی کہانی بالکل مختلف اور منفرد ہے۔ تاہم انہوں نے اپنے اصل کردار کے بارے میں کوئی تفصیل بتانے سے گریز کیا۔

بالی ووڈ اداکار راگھو جویال نے شاہ رخ خان کی مجوزہ ایکشن فلم ’’کنگ‘‘ میں اپنے کردار سے متعلق گردش کرنے والی خبروں کی سختی سے تردید کر دی ہے۔ گزشتہ چند دنوں سے مختلف میڈیا رپورٹس میں دعویٰ کیا جا رہا تھا کہ راگھو فلم میں جیکی شروف کے بیٹے اور مرکزی ویلن کے نوجوان روپ کا کردار ادا کریں گے، جو نوجوان شاہ رخ خان کے مدمقابل ہوگا۔ تاہم اداکار نے ان تمام قیاس آرائیوں کو بے بنیاد قرار دیا ہے۔مووی ٹاکیز کو دیے گئے انٹرویو میں راگھو جویال نے واضح الفاظ میں کہا کہ ’’یہ بالکل، سراسر جھوٹ بول رہے ہیں۔ ایسا کچھ بھی نہیں ہے۔ یہ ایک بالکل مختلف چیز ہے۔ فلم کی کہانی بہت منفرد اور بالکل الگ ہے۔‘‘

یہ بھی پڑھئے: کرن جوہر کے ’’دی ٹریٹرز‘‘ سیزن ۲؍کے مقابلے میں شامل ہونےوالوں کا اعلان

جب ان سے فلم میں اپنے اصل کردار کے بارے میں پوچھا گیا تو انہوں نے تفصیلات بتانے سے انکار کرتے ہوئے کہا کہ ’’جب آپ فلم دیکھیں گے، تب ہی آپ کو پتا چلے گا کہ حقیقت کیا ہے اور کیا نہیں۔‘‘ راگھو نے فلم کے ہدایت کار سدھارتھ آنند کی بھی تعریف کی اور کہا کہ وہ فلم کو ایک بالکل نئے انداز میں پیش کر رہے ہیں۔ انہوں نے کہا کہ ’’یہ بہت منفرد فلم ہے۔ سدھارتھ سر جس انداز میں اسے بنا رہے ہیں، وہ واقعی مختلف ہے۔ جس طرح شاٹس فلمائے جا رہے ہیں، وہ عام فلموں سے بالکل الگ ہیں۔‘‘
اداکار نے یہ بھی بتایا کہ فلم میں ان کا حلیہ بھی پہلے سے بالکل مختلف ہوگا۔ انہوں نے کہا کہ ’’میرا لک ہر فلم میں مختلف ہوتا ہے، لیکن اس فلم میں بھی آپ مجھے ایک بالکل نئے انداز میں دیکھیں گے۔‘‘  واضح رہے کہ ’’کنگ‘‘ شاہ رخ خان اور ان کی صاحبزادی سہانا خان کی پہلی مشترکہ فلم ہے۔ فلم میں دپیکا پڈوکون، ابھیشیک بچن، رانی مکھرجی، جیکی شروف، انیل کپور، ارشد وارثی، جے دیپ اہلاوت، سوربھ شکلا، ابھے ورما اور دیگر اداکار بھی اہم کرداروں میں نظر آئیں گے۔

یہ بھی پڑھئے: ’’لکی بھاسکر ۲‘‘ کی تیاری شروع، ذوالقر سلمان کی بلاک بسٹر فلم کا سیکوئل بنے گا

ریڈ چلیز انٹرٹینمنٹ اس سے قبل فلم کا ٹیزر جاری کر چکی ہے، جس میں شاہ رخ خان کے کردار ’’کنگ‘‘ کو ایک سابق گینگسٹر کے طور پر دکھایا گیا ہے۔ فلم کی ریلیز ۲۴؍ دسمبر ۲۰۲۶ء کو متوقع ہے۔ دوسری جانب راگھو جویال ان دنوں اپنی نئی فلم ’’بھائی تیرا اسٹار ہے‘‘ کی کامیابی سے لطف اندوز ہو رہے ہیں، جبکہ ’’کنگ‘‘ میں ان کے کردار کے بارے میں شائقین میں تجسس برقرار ہے۔ تاہم اداکار نے واضح کر دیا ہے کہ ان سے متعلق گردش کرنے والی حالیہ افواہیں درست نہیں اور فلم کی اصل کہانی ان خبروں سے بالکل مختلف ہے۔