جنوبی ہندوستان کے سپر اسٹار رجنی کانت ہندستانی فلم انڈسٹری کی تاریخ کی سب سے بڑی اور اثر انگیز شخصیات میں سے ایک ہیں۔ رجنی کانت صرف ایک اداکار ہی نہیں بلکہ ایک کلچرل آئیکون ہیں۔ ان کا اسٹائل، ڈائیلاگ ڈیلیوری اور منفرد اسکرین پریزنس نے انہیں دنیا بھر میں مقبول بنایا ہے۔ ان کی زندگی جدوجہد، محنت اور کامیابی سےبھرپور ہے۔ رجنی کانت کا اصل نام شیواجی راؤ گائیکواڑہے۔ان کی پیدائش ۱۲؍دسمبر ۱۹۵۰ءکوبنگلورو، کرناٹک میں ہوئی۔ 

تمل فلموںکے مشہور ڈائریکٹر کے بال چندر نےایک ڈرامہ میں رجنی کانت کی کارکردگی دیکھی جس سےوہ بہت متاثرہوئے۔ ۱۹۷۵ءمیں کے بال چندر کی ہدایتکاری میں بنی تمل فلم اپوروا رنگاگل سے رجی کانت نے اپنےفلمی کیریر کی شروعات کی۔ اس فلم میں کمل ہاسن نے اہم کردار ادا کیا تھا۔ ۱۹۷۸ء میں آئی فلم بھیروی میں رجنی کانت کو کلیدی رول ادا کرنے کا پہلا موقع ملا۔ یہ فلم باکس آفس پر سپر ہٹ ثابت ہوئی۔ اس فلم کے ساتھ ہی رجنی کانت بھی سپر اسٹاربن گئے ۔اس کے بعد۱۹۸۰ءمیںرجنی کانت کی ایک اور سپر ہٹ فلم بلا ریلیز ہوئی۔ بلا امیتابھ کی سپر فلم ڈان کا ریمیک تھا۔ 

۱۹۸۳ءمیںریلیز فلم اندھا قانون کے ذریعہ رجنی کانت نےبالی ووڈ میں بھی قدم رکھا۔ اس فلم میں رجنی کانت کی اداکار ی نہایت شاندار تھی۔ ناظرین نےرجنی کانت کا یہ اندازبہت پسند کیا۔ اندھا قانون سپر ہٹ فلم رہی۔اسی دوران رجنی کانت نے’جان جانی جناردھن‘میں ٹرپل رول کیا ، حالانکہ یہ فلم باکس آفس پرکوئی خاص اثر نہیں دکھا سکی۔ نوے کی دہائی میں رجنی کانت ساوتھ فلموں کے سپر اسٹار بن گئے۔ رجنی کانت نے جتنی بھی فلموں میں کام کیاسبھی باکس آفس پر تقریباً ہٹ رہیں۔ ۲۰۰۷ء میں رجنی کانت کی فلم شیواجی دی باس ریلیز ہوئی۔ اس فلم نے باکس آفس پر کامیابی کے نئے جھنڈے گاڑے۔شیواجی دی باس ہندستانی سنیما کی تاریخ میں پہلی فلم ہے جس نے ہالی ووڈ کی تکنیک کا ستعمال کیا۔ ۲۰۱۰ءمیں رجنی کانت کی فلم روبوٹ ریلیز ہوئی۔ اس فلم میں رجنی کانت کے ساتھ ایشوریہ رائے تھیں۔ روبوٹ نے۲۵۵؍کروڑروپے سے زیادہ کی کمائی کرکے نئی تاریخ رقم کی۔ روبوٹ رجنی کانت کی تمل فلم انتھرن کا ہندی ورزن تھا۔ ۲۰۱۴ءمیں رجنی کانت کی۲؍فلمیں ’کوچڈیان‘ اور لنگا ریلیز ہوئی۔ حالانکہ دونوں فلمیں ٹکٹ کھڑی پر کوئی خاص کمال نہیں دکھا سکی۔ 

رجنی کانت کی شہرت صرف ہندستان تک ہی محدود نہیں ہے بلکہ وہ جاپان، مشرق وسطیٰ، جنوب مشرقی ایشیا اور امریکہ میں بھی بے حد مقبول ہیں۔ سپر اسٹار ہونے کے باوجود رجنی کانت بہت سادہ لوح انسان ہیں۔وہ عیش و عشرت کی زندگی کے بجائے سادگی پسند کرتے ہیں۔ تقریباً ہر فلم میں رجنی کانت کے کچھ مشہور ڈائیلاگز ہوتے ہیں، جو وہ اپنے خاص انداز میں بولتے ہیں۔ یہ ڈائیلاگز اکثر کوئی پیغام دیتے ہیں یا پھر فلم کے ولن کو خبردار کرتے ہیں۔ رجنی کانت نے بہت اعزازات حاصل کیے، جن میں پدم بھوشن،پدم وبھوشن، نیشنل فلم ایوارڈ،فلم فیئر اسپیشل ایوارڈشامل ہیں۔ رجنی کانت نے اپنی فلموں خاص طور پر تمل فلموں کے لیے بے شمار ایوارڈز حاصل کیے ہیں۔