راج کپور کے سب سے چھوٹے بیٹے، رندھیر اور رشی کپور کے چھوٹے بھائی راجیو کپور کی پیدائش۲۵؍ اگست ۱۹۶۲ء کو ہوئی تھی۔ فلموں میں ان کی آمد۱۹۸۳ء کی فلم ’ایک جان ہیں ہم‘ سے ہوئی تھی۔

راج کپور کے سب سے چھوٹے بیٹے، رندھیر اور رشی کپور کے چھوٹے بھائی راجیو کپور کی پیدائش۲۵؍ اگست ۱۹۶۲ء کو ہوئی تھی۔ فلموں میں ان کی آمد۱۹۸۳ء کی فلم ’ایک جان ہیں ہم‘ سے ہوئی تھی۔ ان کے حصے میں ناکامیاں زیادہ رہیں، انہیں  اپنے فلمی کریئر میں زیادہ کامیابی نہیں  ملی، اسی لئے انہیں  ’ کامیاب باپ کا ناکام بیٹا‘ بھی کہا جاتا ہے۔ 
 راجیو کپور کو شہرت راج کپور کی بطور ڈائریکٹر آخری فلم’ رام تیری گنگا میلی‘(۱۹۸۵) سے ملی۔ یہ ان کے کریئر کی واحد سپر ہٹ فلم تھی۔ انہوں نے اپنے ۱۰؍سالہ فلمی کریئر میں محض۱۳؍ فلمیں کیں جن میں سے۱۲؍ فلاپ رہیں۔ ساتھ ہی ان کی ہٹ فلم ’رام تیری گنگا میلی‘ کی کامیابی کا سہرا بھی کی اداکارہ منداکنی کو دیا گیا۔ ان کی دیگر فلموں میں آسمان(۱۹۸۴ء)، لور بوائے (۱۹۸۵ء)، زبردست (۱۹۸۵ء)، ہم تو چلے پردیس (۱۹۸۸ء) ، میرا ساتھی، لاوا ، پریتی، زلزلہ، شکریہ ، ناگ ناگن اور زمیندار شامل ہیں۔ 
 ۱۹۹۰ء کی دہائی میں اداکاری کے بجائے راجیو کپور کی ساری توجہ فلم ڈائریکشن اور پروڈکشن پر مرکوز ہوگئی۔ 
 پہلے۱۹۹۱ء میں اپنے بھائی رندھیر کپور کی فلم حنا میں پروڈیوسر کے طور پر کام کیا جبکہ۱۹۹۶ء میں فلم پریم گرنتھ کی ہدایت کاری کی جس میں مرکزی کردار ان کے بڑے بھائی رشی کپور نے ادا کیا تھا۔ 
 انہوں نے منداکنی، کِیمی کاٹکر، امریتا سنگھ، وجیتا پنڈت، پدمنی کولہاپورے، میناکشی شیشادھری، ڈمپل کپاڈیا، دویا رانا، رتی اگنی ہوتری اور ٹینا منیم کے ساتھ کام کیا۔ ۱۹۹۸ء میں انہیں فلم فیئر ایوارڈ سے نوازا گیا جسے انہوں نے آر کے بینر کی جانب سے قبول کیا۔ 
 وہ ۱۹۹۹ء میں فلم ’آ اب لوٹ چلیں ‘ کے پروڈیوسر بھی تھے جس کے بعد انہوں نے بالی ووڈ سے دوری اختیار کرلی تھی۔ 
 راجیو کپور کا فلمی سفر اچھا نہیں رہا اور ان کی ذاتی زندگی بھی مصائب میں گزری۔ رام تیری گنگا میلی کے بعد راجیو اور ان کے والد راج کپور کے تعلقات میں تلخی آ گئی۔ راجیو کو یقین تھا کہ ان کے والد نے انہیں صحیح طریقے سے لانچ نہیں کیا تھا۔ راجیو نے سال۲۰۰۱ء میں آرتی سبھروال سے شادی کی لیکن وہ اپنی شادی شدہ زندگی میں کبھی خوش نہیں رہے۔ شادی کے دو سال مکمل ہونے سے پہلے ہی۲۰۰۳ء میں آرتی اور راجیو کے درمیان طلاق ہو گیا۔ اس کے بعد سے راجیو کپور تنہا زندگی گزار رہے تھے۔ 
  راجیوکپور نےانتقال سے قبل فلموں میں واپسی کا اعلان کیا تھا اور انہیں ڈائریکٹر آسوتوش گواریکر کی فلم میں کردار ادا کرنا تھا۔ اس فلم کا اعلان دسمبر۲۰۲۰ء میں ہوا تھا اور مرکزی کردار سنجے دت ادا کررہے ہیں لیکن وہ اس فلم میں  کام نہیں  کرسکے۔ 
 آخری بار راجیو کپور اپنے خاندان سے کرسمس کے موقع پر ملے تھے جس کی تصاویر کرینہ کپور نے انسٹاگرام پر شیئر کی تھیں۔ راجیو کپور کا انتقال ۹؍فروری۲۰۲۱ء کو۵۸؍ سال کی عمر میں ہوا۔