رنبیر کپور نے فلم ’’رامائن‘‘ میں اپنے ڈبل رول کی تصدیق کر دی ہے، جس کے بعد سوشل میڈیا پر بحث تیز ہو گئی ہے۔ نتیش تیواری کی ہدایت کاری میں بننے والی اس فلم میں وہ نہ صرف بھگوان رام بلکہ پرشورام کا کردار بھی ادا کریں گے۔ ٹیزر میں سنہری کلہاڑی کی جھلک نے اس قیاس آرائی کو جنم دیا تھا، جسے اب خود اداکار نے درست قرار دیا ہے۔

بالی ووڈ کی سب سے زیادہ زیر بحث فلم ’’رامائن‘‘ ایک بار پھر خبروں میں آ گئی ہے، جہاں رنبیر کپور نے اپنے ڈبل رول کی باضابطہ تصدیق کر کے شائقین کو حیران کر دیا ہے۔ تازہ پیش رفت کے مطابق اداکار اس فلم میں بھگوان رام کے ساتھ ساتھ بھگوان پرشورام کا کردار بھی ادا کریں گے، جو کہانی کے ایک اہم اور پیچیدہ پہلو کو نمایاں کرتا ہے۔ خیال رہے کہ یہ قیاس آرائیاں اس وقت شروع ہوئیں جب نتیش تیواری کی ہدایت کاری میں جاری ہونے والے ٹیزر میں ایک سنہری کلہاڑی کی جھلک دکھائی گئی، جو روایتی طور پر پرشورام سے منسوب سمجھی جاتی ہے۔ اگرچہ ٹیزر میں پرشورام کو براہ راست نہیں دکھایا گیا تھا، تاہم اس علامتی منظر نے فوری طور پر سوشل میڈیا پر بحث کو جنم دیا، جہاں صارفین نے ڈبل رول کے امکانات پر قیاس آرائیاں شروع کر دیں۔

Ranbir Officially Confirms He is Playing Bhagwan Parshuram!#Ramayana pic.twitter.com/n2WxVroeP0

— RK🐰 (@rksbunny) April 3, 2026

اب رنبیر نے ایک انٹرویو میں اس کی تصدیق کرتے ہوئے کہا کہ ’’بھگوان وشنو کے مختلف اوتار ہیں، جن میں بھگوان رام اور بھگوان پرشورام شامل ہیں، اور ان کرداروں کو ادا کرنا میرے لیے ایک منفرد تجربہ رہا ہے۔‘‘ انہوں نے مزید وضاحت کی کہ ان دونوں کرداروں کے درمیان فرق کو سمجھنے کے لیے صرف ظاہری انداز کافی نہیں بلکہ ان کی روحانی اور جذباتی گہرائی کو سمجھنا ضروری ہے۔ اداکار کے مطابق انہوں نے اس کردار کے لیے ایک سال تک تیاری کی، جس میں انہوں نے نہ صرف جسمانی بلکہ ذہنی اور روحانی سطح پر بھی خود کو ان کرداروں کے قریب کرنے کی کوشش کی۔ ان کا کہنا تھا کہ ’’ایک اداکار کے طور پر اصل چیلنج کردار کی روح کو سمجھنا ہوتا ہے، اور میں نے یہی کرنے کی کوشش کی۔‘‘

The PARSHURAM Hint🧨🔥🧨🔥🧨#Ramayana pic.twitter.com/sCBPKrr8RS

— Freak4Flims (@Freak4Flims) April 2, 2026

تاہم اس اعلان کے بعد سوشل میڈیا پر ردعمل ملا جلا رہا۔ ایک طرف مداح اس ڈبل رول کو ایک جرات مندانہ اور دلچسپ تجربہ قرار دے رہے ہیں، جبکہ دوسری جانب کچھ ناقدین نے خدشہ ظاہر کیا ہے کہ ایک ہی اداکار کا دو اہم مذہبی کردار ادا کرنا کہانی کے توازن کو متاثر کر سکتا ہے۔ یہی نہیں ایک صارف نے لکھا کہ ’’ہم صرف ’’رام ‘‘ کے کردار کے متعلق فکر مند تھے، اور یہاں ایک اور کردار خطرے میں نظر آرہا ہے۔‘‘ ایک دوسرے صارف نے طنزیہ لکھا کہ ’’ہم سے ایک رنبیر برداشت نہیں ہورہا ہے، یہاں دوسرا بھی تیار ہے۔‘‘
خیال رہے کہ ’’رامائن‘‘ کو دو حصوں میں پیش کیا جا رہا ہے، جس کا پہلا حصہ دیوالی ۲۰۲۶ء جبکہ دوسرا ۲۰۲۷ء میں ریلیز ہونے کا منصوبہ ہے۔ یہ فلم نمیت ملہوترہ کی پروڈکشن میں بن رہی ہے اور اسے ہندوستانی سنیما کے سب سے بڑے اور مہنگے پروجیکٹس میں شمار کیا جا رہا ہے۔