نیٹ فلکس پر بالی ووڈ کی سب سے زیادہ دیکھی جانے والی فلموں میں شاہ رخ خان کی’’جوان‘‘، رنبیر کپور کی ’’اینیمل‘‘، عالیہ بھٹ کی ’’گنگوبائی کاٹھیا واڑی‘‘ اور کرن راؤ کی ’’لاپتہ لیڈیز‘‘ شامل ہیں، جنہوں نے عالمی سطح پر ریکارڈ ویورشپ حاصل کی۔

او ٹی ٹی پلیٹ فارمز نے گزشتہ چند برسوں میں فلم بینی کے رجحان کو نمایاں طور پر بدل دیا ہے، اور نیٹ فلکس بالی ووڈ فلموں کے لیے ایک مضبوط عالمی پلیٹ فارم بن چکا ہے۔ تازہ ترین اعداد و شمار کے مطابق، نیٹ فلکس پر سب سے زیادہ دیکھی جانے والی بالی ووڈ فلم ’’جوان‘‘ ہے، جس نے تقریباً ۷ء۳۳؍ ملین ویوز حاصل کیے۔ فلم کے خصوصی ورژن نے ناظرین کی دلچسپی دوبارہ بڑھائی اور اس کی مقبولیت میں نمایاں اضافہ کیا۔ دوسرے نمبر پر رنبیر کپور کی ’’اینیمل‘‘ ہے جسے ۴ء۳۱؍ ملین ویوز ملے۔ فلم اپنے طویل دورانیے، طاقتور اداکاری اور متنازع موضوعات کے باعث سوشل میڈیا اور عوامی مباحثوں میں نمایاں رہی، جس نے اس کی ویورشپ کو مزید تقویت دی۔

یہ بھی پڑھئے: جنیفر لوپیز وکرانت میسی کی فلم ’وہائٹ‘ کے ایک نغمہ کو آواز دیں گی

تیسرے نمبر پر عالیہ بھٹ کی ’’گنگوبائی کاٹھیا واڑی‘‘ ہے، جس نے ۱۴ء۳۱؍ ملین ویوز حاصل کیے۔ فلم نے ہندوستان کے ساتھ بین الاقوامی ناظرین میں بھی غیر معمولی مقبولیت حاصل کی اور کئی ممالک میں نیٹ فلکس کی ٹاپ ٹرینڈنگ لسٹس میں شامل رہی۔ اسی فہرست میں ’’لاپتہ لیڈیز‘‘ نے بھی مضبوط مقام بنایا، جسے ۱ء۳۱؍ ملین ویوز حاصل ہوئے۔ محدود بجٹ اور نئی کاسٹ کے باوجود، حقیقت پسندانہ کہانی اور مثبت عوامی ردعمل نے فلم کو نمایاں کامیابی دلائی۔ کرینہ کپور اور تبو کی ’’کریو‘‘ نے ۸ء۲۸؍ ملین ویوز حاصل کیے اور اپنے ہلکے پھلکے مزاح، اسٹائلش انداز اور مضبوط اداکاری کی بدولت ناظرین کی توجہ حاصل کی۔ اسی طرح، ’’فائٹر‘‘ نے ۵ء۲۷؍ ملین ویوز کے ساتھ ایریل ایکشن اور حب الوطنی کے موضوع پر نمایاں اثر چھوڑا۔

یہ بھی پڑھئے: شاہ رخ خان کی ’’کنگ‘‘ کی ۲۴؍ دسمبر ۲۰۲۶ء کو سنیما گھروں میں ریلیز ہوگی

نیٹ فلکس کی اوریجنل فلم ’’جانِ جاں‘‘ نے ۲ء۲۴؍ ملین ویوز حاصل کیے، جبکہ ’’شیطان‘‘ (۲۴؍ ملین) اور ’’ڈارلنگز‘‘ (۴ء۲۳؍ ملین) بھی اس فہرست میں شامل رہیں۔ خاص طور پر ’’ڈارلنگز‘‘ نے حساس سماجی مسئلے کو سیاہ مزاح کے انداز میں پیش کر کے ناظرین کے درمیان جگہ بنائی۔ مجموعی طور پر یہ فہرست اس بات کی عکاسی کرتی ہے کہ نیٹ فلکس نہ صرف بڑی کمرشیل فلموں بلکہ مضبوط کہانی اور منفرد موضوعات پر مبنی فلموں کو بھی عالمی سطح پر کامیابی دلانے میں اہم کردار ادا کر رہا ہے۔